1Jonasatakix janiw walïkänti kuntix Tatitux lurkän ukaxa, jupasti walipuniw mayjt'asïna.
2Ukat Tatiturux mayisïna, akham sasa:
—Tatay, markaxankaskäyät ukkhax akhamäñapxa yatipuniyätwa. Ukat Tarsis markar jaltañar uchasta, nayax juman khuyapayasiri, llamp'u chuyman Diosätam yattwa, janiw ukspach phiñasktati; jach'a munasiñanïtam laykux mutuyañatak amtkta uksa, amthapisisax janiw ukham lurkxtati.
3Ukat Tatay, achikt'asinsma, jichhax jakañax apaqxita. Jakaskañat sipansa jiwxañakiw wakisispa —sasa.
4Tatitusti sarakïnwa:
—¿Jumatakix walikïskiti chuyma ukham mayjt'ayasitamaxa? —sasa.
5Ukatsti Jonás profetax Nínive markat mistuwayxasinxa, markat inti jalsu tuqiruw purïna, ukatsti, layminakat mä ch'iwirt'asiñ ukawjan lurt'asïna, uka ch'iwir qunt'asisaw suyäna kunarus uka markax tukuni uk uñjañataki.
6Tatit Diosasti Jonasan p'iqipxar ch'iwxatañapatakix mä ali jilsuyäna, ukhamat kusisit jikxatasiñapataki; Jonasasti uka ali utjatapatxa wali kusisitänwa.
7Ukampis qhipür willjtasti, Tatitux uka alir t'urjañapatakix mä laq'u wakichäna, uka alisti pharsuwayxänwa.
8Intix jalsunxäna ukapachasti, Tatitux mä junt'u thaya inti jalsu tuqit thayt'aniñapatak wakichäna, intix wali ch'amampiw Jonasan p'iqipxar junt'untäna, amuyasitapatxa ch'amapas q'ala thayjtatjamänwa, jiwxañak munxäna. Ukat säna:
—Jakañat sipansa jiwxañakiw wakisxaspa —sasa.
9Tatitusti juparux jiskt'änwa:
—¿Uka alin pharsxatapat phiñasitamax walikïskiti? —sasa.
Jonás profetax sarakïnwa:
—¡Jïsa, walikïskiwa, phiñasiñatsa niyaw jiwaskta! —sasa.
10Tatitusti Jonasarux sarakïnwa:
—Janixay jumax uka ricino alirux ayruskstatixa, janixay jilaykarakstasa; mä arumanak alsuwayi, qhipa arumarusti jiwxakirakiwa. Ukampis jumax uka alit khuyapt'ayastawa.
11Ukatsa juk'ampiw nayan khuyapayasiñaxax Nínive markatakix utjañapa, uka jach'a markan patak pä tunka waranqa, ukatsa jila jaqinakaw utji, wawanakjam jan amuyt'asirinaka, uywanakas waljarakiwa —sasa.
Who We AreWhat We EelieveWhat We Do
2025 by iamachristian.org,Inc All rights reserved.
