NÚMEROS 13 - Qullan Arunaka DC

Moisesan uñaqirinak Canaán uraqir khithatapa(Dt 1.19-33)

1Tatitux Moisesar sänwa:

2“Mä qawqha jaqinak Canaán uraqir khitham, kawkïr uraqtix nayax israelitanakar churkä uka uraq uñaqanipxañapataki. Sapa ayllut mayni jilïripar khitham” sasa.

3Moisesasti Tatitun arsutaparjamaw Parán wasarat jupanakar khithäna. Uka jaqinakasti israelitanak taypin jilïr chachanakkamakïnwa.

4Khithat jilïrinakasti akanakänwa: Rubén ayllutxa, Samúa sat Zacur chachan wawapa;

5Simeón ayllutxa, Safat sat Horí chachan yuqapa;

6Judá ayllutxa, Caleb sat Jefuné chachan yuqapa;

7Isacar ayllutxa, Igal sat José chachan yuqapa;

8Efraín ayllutxa, Oseas sat Nun chachan yuqapa;

9Benjamín ayllutxa, Paltí sat Rafú chachan yuqapa;

10Zabulón ayllutxa, Gadiel sat Sodí chachan yuqapa;

11Manasés ayllutxa, Gadí sat Susí chachan yuqapa;

12Dan ayllutxa, Amiel sat Guemalí chachan yuqapa;

13Aser ayllutxa, Setur sat Micael chachan yuqapa;

14Neftalí ayllutxa, Nahbí sat Vapsí chachan yuqapa;

15Gad ayllutxa, Gueuel sat Maquí chachan yuqapa.

16Ukanakaw Moisesan khithat jilïr jaqinakan sutinakapaxa, jupanakarusti Canaán uraqi uñakipiriw khithäna. Oseas sat Nun chachan yuqaparux Josué sutimpiw Moisesax sutichäna.

17Moisesax Canaán uraqir jupanak khitkän ukapachasti, akham sänwa:

—Négueb wasar chiqanjam sarapxam, ukatsti qullu tuqinakaruw makhatapxäta.

18Uka markax kunjämätaynas uk sum uñjanipxäta, ukan jakir jaqinakax ch'aman jaqinakati, jan ukax t'ukha jaqinakakicha; juk'anikiti jan ukax waljanïtaynacha taqi ukanak uñjanipxäta.

19Markanakapax chhujllanakat luratakiti, jan ukax, suma pirqanakampi sayt'ayatacha, kawkha uraqintix jakapki ukax suma laq'ati, jan ukax janicha,

20uraqix suma achur uraqiti, jan ukax, janich suma achurïki, quqanakaniti, jan ukax, janicha, taqi ukanak uñjanipxam. Jan axsarapxamti; ukatsti uka uraqin achunakap apanipxäta —sasa.

Ukapachasti uvanakan nayrïr achunakap apthapiñ urunakänwa.

21Uka chachanakasti sarasin uka uraq uñakipapxäna, aynach tuqit qalltapxäna, Sin sat wasarata, ukawjatsti Rehob chiqakamaw sarapxäna, ukasti Hamat jak'ankiwa.

22Négueb wasaranjam mantasin Hebrón chiqakamaw puripxäna. Hebrón markax Soan sat egipcio marka utt'ayaskän ukat paqallq mara nayraw utt'ayasitayna. Uka markan Ahimán, Sesai, Talmai chachanakax jakapxäna, jupanakasti Anac sat jach'a tansa jaqin wawanakapänwa.

23Ukatsti mä jisk'a jawiraruw puripxäna; ukawjan jupanakax uva wayun alip khuchhuqapxäna, uksti paniniw mä lawar warkuntat kallanipxäna, ukatsti granadanaka, higonaka apthapipxarakïna.

24Uka jisk'a jawirarusti Escol sutimpiw sutichapxäna, ukawjan israelitanakax uva wayun alip khuchhuqapxatap layku.

25Ukxarusti, pusi tunka urunak uka uraqi uñakipasinsti,

26Parán wasaran Cadés sat chiqaruw kuttanxapxäna. Ukan Moisesampi, Aaronampi, taqpach israelitanakampix jikxatasipxäna. Ukatsti kuntix yatxatanipkatayna taqi ukanak jupanakar yatiyapxäna, uka uraqit apanipkatayna uka achunaksa uñacht'ayapxarakïnwa.

27Moisesarusti sapxänwa:

—Khithapkista uka uraqiruw nanakax sarapxta. Chiqpachapuniw uka uraqin lechesa, misk'isa umjam jalsuski, uñjam, aka achunakaw uka uraqin achuraki.

28Ukampis ukan jakir jaqinakax wali ch'amaninakawa, markanakasti wali jach'anakawa, suma uyuchrantatarakiwa. Anac sat jach'a tansa jaqin wawanakaparus uñjanipxtwa.

29Négueb wasar tuqinxa amalecita jaqinakaw jakapxi, qullu tuqinakansti hitita jaqinaka, jebuseo jaqinaka, amorreo jaqinakaw jakapxi, ukatsti quta irananakana, Jordán jawir jak'anxa, cananeo jaqinakaw jakapxaraki —sasa.

30Jaqinakax Moisesatakiw arusipxäna, ukampis Caleb chachaw uka jaqinakar amukt'ayäna, akham sasa:

—¡Uka uraq katuntir sarapxañäni! ¡Jiwasax katuntañäniwa!

31Ukampis jupamp chik saririnakax sapxänwa:

—¡Janiw uka jaqinakampix nuwasksnati! Jupanakax jiwasat sipan juk'amp ch'amaniwa —sasa.

32Ukatsti israelitanakarux uñaqanipkatayna uka uraqin jan walïtap sapxäna:

—Uñakipir sarapkta uka uraqix, ukan jakir jaqinakarux jiwarayiwa, ukan uñjanipkta taqi uka chachanakax wali jach'anakawa.

33Jach'a tansa jaqinak uñjanipxarakta, Anac chachan wawanakaparu. Nanakasti jupanak thiyanxa, t'iju t'ijunakar uñtatakiw uñjasipxta, jupanakas ukham uñjapxarakitu —sasa.