JEREMÍAS 25 - Qullan Arunaka DC

Uñisirinakan amsta tuqit jutatapa

1Kunapachatix Josiasan yuqapa Joacín reyix Judá uraqi pusi mara apnaqkäna ukkhaw, Tatitux Jeremiasaru Judá markatak mä yatiyäwi churäna. Ukkharakiw Nabucodonosor reyix Babilonia uraqi mä mara apnaqañ qalltaskäna.

2Jeremías profetasti kuntix Tatitux yatiykatayna uka arunak taqi Judá markpacharu, Jerusalén markankirinakar yatiyäna, akham sasa:

3“Kunapachatix Amón jaqin yuqapa Josiasax Judá uraqi tunka kimsan mara apnaqaskäna ukat jichhakamaxa, niya pä tunka kimsan maranakäxiwa, Tatitusti ukkhatpachaw nayarux parlitäna, ukatsti nayax jumanakarux mayamp mayampi parlapxaraksma, ukampis jumanakax janiw nayarux ist'apkistati.

4Tatitux jumanakarux mayamp mayampi profetanakap khithanipxtam, ukampis jumanakax janiw ist'apktati, jupanakan parlatanakaparus janiw ist'añ munapkäyätati, janirakiw phuqhañsa munapkäyätati.

5Uka profetanakasti jumanakarux sapxäyätamwa: ‘Jan wali sarnaqäwinakama, jan wali luräwinakam apanukupxam, ukhamat kawkïr uraqtix Tatitux jumanakarusa nayra awkinakamarus churkatayna ukan wiñayatak jakapxañamataki.

6Jan yaqha diosanakar arkapxamti; janirak jupanakarus yupaychapxamti. Tatiturux jan q'apisiyapxamti jumanak pachpan lurasit diosanakar yupaychasa, jupasti janirakiw kuna jan walt'añsa apayanipkätamti’ sasa.

7Jichhasti Tatitux siwa: ‘Jumanakax janiw nayarux ist'añ munapkistati; jumanak pachpan lursusit diosanakar yupaychasaw nayar q'apisiyapxista; taqi ukasti jumanakatak pachpa jan walïniwa’ sasa.

8“Ukat taqi ch'aman Tatitux saraki: ‘Niyakixay jumanakax arunakaxar jan ist'apkstatixa,

9jichhax amsta tuqinkir taqi markanakaruw jawsayä, nayatak lurir Nabucodonosor Babilonia uraqin reyiparu, jupanakaw aka markaru, taqi jaqinakaru, taqi jak'ankir markanakar nuwantapxani. Ukanakarusti q'alpun t'unjäxa; wiñayatak laqayaruw tukuyä, mulljaskañaru, axsarkañaruw tukuyarakï.

10Jupanak taypin phunchhäwi q'uchunaksa, kusiskañ q'uchunaksa chhaqtayäwa, jaqichasïwi q'uchunaka, qhunan ruxuqitapsa chhaqtayarakïwa, janiw mayampis lamparanakan qhanatapax utanakan uñjaskxaniti.

11Taqi aka markasti, laqayanakar tukuyat t'unjatäniwa. Paqallqu tunka mararakiw aka markanakax Babiloniankir reyin apnaqat uñjasipxani.

12Uka paqallqu tunka maranaka phuqhasxipansti, Babiloniankir reyiru, markapampirusa juchanak luratanakapat wayt'arakï, ukatsti wiñayatakiw t'unjarakï. Naya, Tatituw uk arsta.

13Uka markxarusti taqi kunatix aka qillqatan utjki, kunanaktix yatiykta taqi ukanak puriyanï; taqi kunanaktix Jeremías profetax nayan sutixar taqi markanakar yatiykäna ukanaka.

14Babilonionakarusti, jach'a markanaka, ch'aman reyinakaw t'aqhisiyas apnaqapxarakini. Ukhamat kunatix jan wali luratanakapat katuqañapax wakiski uk churä.’ ”

Markanakan mutuyäwipa

15Israelan Tatitu Diosapasti sarakituwa: “Jeremías, amparaxankki uka qirux phiñasiñaxampix vinompi phuqhantatjamawa. Jichhax jum katxarum ukatsti kawkïr markanakarutix nayax khitkäma ukanakar umarayanim.

16Kunapachatix umantapkani ukapachasti waq'aqiñ qalltapxani, ukatsti luqhi jaqinakjamaw sarnaqapxarakini, kuna nuwasiñanaktix nayax jupanakxar apayankä uka layku” sasa.

17Nayasti Tatitun amparapat uka tilinki apaqta, ukatsti kawkïr markanakarutix jupax khitkitu taqi ukanakaruw umañapatak churarakta.

18Jerusalén markaru, Judá uraqinkir taqi markanakaru, reyinakapampi taqi jilïrinakapampi umañapatakiw churta, ukhamat jupanakan t'unjatäñapataki, markanakapas q'ala tukjat apanukutäñapataki, axsarkaña mulljaskañ tukjatäñapataki. Aka arunak qillqaski ukkhakamas uka markanakan axsarkañaru, mulljaskañaru, ñanqhar tukutäñapataki.

19Uka kipkarakiw Egipto markan faraón reyiparusa, jilïrinakaparusa, khitinakatix jupampïki ukanakarusa, taqi jaqinakaparus umañapatak churarakta,

20ukhamarak yaqha markankir jaqinakax uka markan utjapki ukanakarusa, Uz markanakan reyinakaparusa, filisteonakan uraqipankir markanakaparusa: Ascalón, Gaza, Ecrón, ukat Asdod ukat jilt'irinakarusa;

21Edom, Moab, Amón;

22Tiro, Sidón sata uka markanakan taqi reyinakaparusa; Mediterráneo sata uka jach'a quta tuqinkir reyinakarusa;

23Dedán, Tema, Buz, uka markanakan reyinakaparusa;

24Arabia tuqinkir taqi reyinakarusa; wasara tuqin utjapki uka yaqha markankir jaqinakan reyinakaparusa;

25Zimri, Elam, Media siski uka markan reyinakaparusa;

26amsta tuqinkir taqi reyinakarusa kawkïrinakatix jak'a pura jakapki ukanakarusa. Taqi akapachan utjir markanakaruw umañapatak churta. Qhiparusti Babiloniankir reyiw umt'arakini.

27Ukatsti Tatitux sarakituwa: “Jupanakarusti sarakim, naya, taqi ch'aman Tatitu, Israelan Diosapaw arsta, machjasiñkama, waq'jasiñkama, jan mayampi sartkañatak uraqir liwirtapxañapkam umapxpan, kuna nuwasiñanaktix nayax jupanakaru apayankä uka layku.

28Janitix uka tilinki katuqas umañ munapkani ukapachasti, jupanakarux sarakim: ‘Taqi ch'aman Dios Tatitux siwa: Munapxamsa, janis munapkam, umapxapunïtawa.

29Jichhasti kawkïr markatix nayatak yaqhachatäkäna uka markxaruw mutuyäwinakax apayanï. ¿Jumanakasti amuyapxtati jan mutuyataki qhiparañxa? Janiw ukhamaki jumanakax qhiparapkätati, nuwasiñanaksti taqi akapachankir jaqinakxaruw apayanï. Naya, Tatituw uk arsta.’

30“Jumasti Jeremías, taqi akanak nayan sutixar yatiyaskakim, jupanakarusti sarakim:

‘Tatitux jach'a arupampiw arsu,

alaxpachatpacha, kawkhantix jakki uka qullan chiqatpacha.

Tamapatakix kunjämatix uva ch'irwirinakax arnaqasipxi

ukhamaw arnaqasi,

taqi jaqinakatakiw arnaqasi.

31Jupan jach'at arnaqasitapasti

akapach tukuskamaw ist'asi,

Tatitusti jichhax taqi markanakaruw

luratanakapatjam wayt'añ qalltani,

taqi jaqinakarusti taripäwiruw jawsarakini,

jan wali jaqinakarusti jiwañatakiw juchañchani.

Tatituw uk arsu.’ ”

32Taqi ch'aman Tatitusti siwa:

“Mä markat mä markaruw

t'aqhisiñax purinini;

aka uraqi tukusitxa,

mä jach'a thayaw sarti.”

33Khitinakarutix Tatitux uka urux jiwaraykani ukanakasti

mä thiyat mä thiyakamaw aka uraqin liwirtapxani.

Janiw khitis jupanakat jachkaniti,

janirakiw khitis uka jiwatanak imt'añatak apthapkaniti;

q'añu t'unar uñtat waranukutäpxaniwa.

34¡Awatirinaka, wararipxam, usuyasiñat wararipxam!

¡Jumanaka, tamar irpirinaka, uraqin qurumnaqapxam!

Jumanakar khariraña pachax purinxiwa,

jumanakarusti lik'i ovejanakarjamaw kharirapxätam.

35Awatirinakax janiw jaltapkaniti,

tama irpirinakas janiw imantasipkaniti.

36Awatirinakax arnaqasipxiwa;

tama irpirinakax usuyasiñat arnaqasipxi,

chhuxllanakapa Tatitun q'al pharsuyatap layku.

37Tatitux walpun phiñasi,

ukat uka suma ch'uxña pampanakap t'unji.

38Putupat mistunir leonar uñtataw jupax mistuni,

jupanakan markapasti q'ala t'unjataw uñjasi,

Tatitun phiñasiñapax mä ninjamaw aqti,

mä jach'a nuwasïwi apayaniraki.