1 Tatay,
nayar nuwirinakampix jumay nuwasim;
nayampi ch'axwirinakampix jumay ch'axwam.
2Jark'aqasiñam katxarusim,
yanapt'iriy jutita;
3lanzam apxarusim,
nayar nuwañatak jalxatirinakar saykatam;
¡nayaw atipjayirimätxa! sitaya.
4Nayar jiwayañ munirinakax,
mä p'inqay atipjayasipxpan,
nayatak ñanqha amtirinakasa,
p'inqachat jaltxapxarakpan;
5¡thayan apat jipir uñtatäpxpan;
Tatitun angelapan jaqunukut uñjasipxpan!
6¡Thakhipax ch'amakäpan, llust'arakïpan,
Tatitun angelapamp arktat uñjasipxpan!
7Ina ch'usat nayatakix sipit wakichapxi;
jiwañ p'iyanak jalantañaxatak wakichapxi.
8¡Chijix akatjamat jupanakar katuntpan!
¡Pachpa sipitanakapar jalt'apxpan!
¡Jan walt'añar puripxpan!
9Nayasti Tatitumpiw kusisï,
nayar qhispiyatapat layku.
10Taqpach chuymaxampiw arsü:
“Tatay, ¿khitirak jumjam utjisti?
Jila ch'aman jaqinakan amparapata,
jan yäqat jaqirux qhispiytaxa,
ch'ama apjir jaqita
jan kunan jaqirux qhispiytaxa.”
11K'ari irkatirinakaw nayatakix uñsti,
kuntix jan yatkta uk jiskhipxitu.
12Aski lurataxatxa, jan walimpiw kutiyapxitu,
ukhamätanakapax walpun llakisiyitu;
13jupanakar usuntir uñjasaxa,
walpun jupanakat llakisïyäta,
khankha isimpi isthapisisaw ayuno luräyäta,
chuyma manqhixansti, Tatituruw mayirapïyäta.
14Taykaxas jiwkaspa,
jilaxasa, masixas jiwkaspa
ukhamaw chuymas kawkst'at sarnaqäyäta.
15Liwisitax uñjasasti,
taqpachaniw nayat larusipxi;
jan uñt'at jaqinakjamaw
nayarux wal nuwjapxitu.
16Qhuru kankañampiw nayat sawkasipxitu,
uñisiñat laka ch'akhanakap t'urusirapipxitu.
17Tatay,
¿janit kuns jupanakarux lurkäta?
¡Uka jan wali jaqinakax jiwayañpun munapxitu!
¡Jakañaxay qhispiyita, ukakiw utjxitu!
18Nayasti qullan tantachasïwin yuspagaräma;
¡waranq waranqa jaqinak taypin yupaychäma!
19Uñisirinakaxax janikiy nayat larusipxitpati;
uñisirinakaxax janikiy ina ch'usat
nayranakapsa ch'irmisipxpati.
20Jupanakax janiw suman jakasiñ thaqhapkiti,
suman jakasir jaqinakar
k'arintañatakikiw amtasipki;
21wali jach'at nayatak lakapsa jist'arapxi:
“Uñtapxam, nayrasampiw uñjtanxa” sasa.
22¡Tatay,
jumaw taqi kun uñjtaxa!
¡Janikiy amukt'amti!
¡Janikiy nayat jayarst'amti!
23Dios Tatay, ¡arxatt'asitaya!
Tatay, chiqaparuy uñjita.
24Dios Tatay,
chiqapar uñjañamampiy taripita.
¡Janikiy nayat larusipxitpati!
25Janikiy jupanakax sapxpati:
“¡Ukpï uñjañ munäyätanxa!
¡Jichhax jan mayampitakiw aynacht'aytanxa!” sasa.
26Llakir puritaxat kusisirinakax
p'inqachjatay uñjasipxpan;
nayat juk'ampi amuyasirinakax
p'inqachjatay sarnaqapxpan.
27Nayan atipañax munirinakasti
q'uchupxpan, kusisipxarakpan,
jan qarjasis arsupxpan:
“¡Tatitux jach'a ch'amaniwa,
uywatapar sum jakasir uñjasax kusisiwa!” sasa.
28Aski kankañamat arsupunïwa;
¡sapüruw yupaycharakïma!
Who We AreWhat We EelieveWhat We Do
2025 by iamachristian.org,Inc All rights reserved.
