LEVÍTICO 3 - Qullan Arunaka DC

Sumankthapiñatak luqtäwinaka

1“Khititix uywanakapata mä qachu vaca jan ukax mä urqu vacsa Tatitumpi sumankthapiñatak luqtkani ukax jan kuna kamacht'at uywäñapawa.

2Khititix waxt'a luqtkani ukax, uka uywan p'iqipxarux amparap luqxatañapa, ukatsti Tatitump Jikisiñ Carpar mantañäkis ukawjan kharinukuñapa. Ukatsti sacerdotenakaw altaran thiyanakap uka wilampi ch'allsupxañapa.

3“Khititix sumankthapiñatak uywa luqtkani ukax mä nakt'ayat waxt'a Tatitur luqtañapa, jiphillanakan lik'inakapa,

4maymurunakan lik'inakapa, jikhanin lik'inakapa, k'iwchxankki uka lik'inaka, maymurunakamp chika apaqatäñapawa.

5Sacerdotenakaw taqi uka lik'inak altarxar nakhantayapxani, kawkhantix altarxan nakhantayatäñatak luqtäwix nakhaski ukxar apxatasa, ukasti Tatitutakix mä suma q'apkir waxt'äniwa.

6“Khititix sumankthapiñatak mä oveja luqtkani ukasti, urqüpasa, qachüpasa, jan kuna kamacht'atäñapawa.

7Uka luqtäwitix mä ovejänixa, Tatitur luqtkasax

8uka uywan p'iqipxaruw amparap luqxatani, ukat Tatitump Jikisiñ Carpa nayraqatan kharinukxani. Ukatsti sacerdotenakax uywan wilapampiw altaran thiyanakap ch'axch'suni.

9“Khititix sumankthapiñatak mä oveja Tatitur luqtkani ukasti nakhantat waxt'jam luqtañapawa, wich'inkxa jikhanitpach khariqani, jiphillanakan lik'ipamppacha,

10maymurunaksti lik'imppacha, jikhani lik'inakamppacha, k'iwchxankki uka lik'inakamppacha, uksti maymurunakamp chika apaqarakini.

11Ukatsti, sacerdotex taqi ukanak altarxaruw nakhantayani, ukasti Tatitur jach'añchañatak nakt'ayat manq'añ waxt'äkaspas ukhamäniwa.

12“Uka luqtäwitix mä cabränixa, Tatitur luqtkani

13ukkhasti, amparap uka uywan p'iqipxar luqxatani, ukat Tatitump Jikisiñ Carpa nayraqatan kharinukxani.

14“Khititix uka uywa luqtkani ukax nakhantat waxt'ata Tatitur luqtañapawa, jiphillanakan lik'inakapa,

15maymurunakan lik'inakapa, jikhanin lik'inakapa, k'iwchxankki ukan lik'inakapa, maymurunakamp chika apaqatäñapawa.

16Ukatsti, sacerdotex altarxaruw taqpach nakhantayani mä suma q'apkiri manq'añ waxt'ata. Taqpach lik'inakasti Tatitutakiwa.

17“Aka kamachisti wiñayatakiwa, wawanakapan wawanakapatakiwa, kawkhantix jumanakax jakapkäta ukkhanxa, janipun wilsa, lik'sa manq'apxamti.”