1Samuel profetasti jiwxänwa, Israelita jaqinakax taqin tantacht'asisaw jiwxatapat jachapxäna. Ukatsti Ramá chiqankir utaparuw imt'xapxäna. Uka qhipatsti Davidax Parán sata wasararuw sarxäna.
Davidampi, Abigailampi2Maón tuqinsti mä qamiri jaqiw utjäna, kimsa waranqa ovejani, waranqa cabritoni, Carmel markan alakip lurir jaqïnwa, ukansti ovejanakapat t'arwa yawirïna.
3Uka jaqisti Nabal satänwa. Caleb chachan wila masipat saraqiri. Jupasti qhuru jan wali jaqirakïnwa. Ukampis Abigail warmipax wali suma uñnaqt'an ch'ikhi warmïnwa.
4-5Davidasti wasarankkasinxa, Nabal sat jaqin Carmel chiqana ovejanakapat t'arwa yawiskatap yatïna. Ukatsti tunka uywatanakaparuw khithäna Davidan sutipxar Nabal jaqiru aruntiri,
6ukhamarak aka yatiyäwi arunak churiri: “Munat jilata, nayax juman walikïskañam munta, wila masimasa ukhamarak khitinakatix jumampïki ukanakasa.
7Ovejanakamat t'arwa yawiskatam yatta. Ukhamarakiw jumax Carmel chiqana awatirinakaman nanakampïskatap yatpachäta. Jupanakan nanakampi chikäñapkamax janipuniw kuna jan walis luratäpkänti, janirakiw kunas apaqatäpkänti.
8Ukanakatsti uywatanakamaruw jiskt'asma, jupanakaw uk qhanañchapxiristam. Jichhasti, jumax aka waynanakaru sum uñjañamatakiw achikt'assma, ukatsti jupanakarusa, nayarusa, kunatix utjktam ukanak churapxita, nayax juman wawamjamarakïtwa” sasa.
9Davidan uywatanakapax Nabal jaqiruw uka arunak yatiyapxäna, ukatsti kuntix Nabal jaqix sañapäkän uk yatiñkamaw qhiparapxäna.
10Ukampis Nabal jaqix sänwa:
—¿Khitis Davidaxa? ¿Khitis uka Jesé jaqin yuqapaxa? ¡Jichhürunakan walja uywatanakaw uywiripat jaltxasipki!
11¿Kunatarak nayasti kawkïr manq'añtix irnaqirinakaxataki wakichkta uk yaqha jan uñt'at jaqinakar churästi? —sasa.
12Davidan uywatanakapasti thakhinjamaw kuttawayxapxäna. Ukatsti Davidan ukar purisax kuntix Nabal jaqix siskatayna taqi ukanak yatiyapxäna.
13Ukatsti Davidax jaqinakaparux sänwa:
—¡Taqini nuwasiñ yänakam wakicht'asipxam! —sasa.
Jaqinakapasti Davidjamarakiw espadanakap wak'anakapar uchasipxäna; ukatsti pusi patak jaqinakaw jupamp chika sarapxäna, ukchañkamasti pä patak jaqinakax kunanakatix utjkäna ukanak uñjiriw qhiparapxäna.
14Ukampis Nabal jaqin mayni uywatapax Nabal jaqin Abigail warmipar yatiyiriw saräna akham sasa:
—Davidax wasaratpach yatiyirinakarux uywirisar aruntañatak khithanïna, ukampisa jupax wal thithïna.
15Uka jaqinakasti nanakampix sumakiw sarnaqapxäna. Uka urunakan jupanakampi pampan sarnaqkasinxa, janipuniw kuna ñanqhsa lurapkitänti, janirakiw kunsa apaqapkitänti.
16Jan ukasti, nanakarusa, uywanakaxarusa uruy arumaw uñjapxitäna.
17Ukampis juman chachamax wali qhurupuniwa, janiw parlxayañjamäkisa, jichhax jumax kunatix lurañamäki ukanakat amuyt'am, chiqpachansa jupatakisa, masinakapatakis jan walt'añaw jutani —sasa.
18Ukatsti jank'akiw Abigail warmix apxarüna: pä patak t'ant'a, pä lip'ichi wayaqa vinompi, phisqa oveja kankatampi, pusi tunka kilo grano jamp'itampi, waña uvat lurat patak tortampi, waña higot lurat pä pataka tortampi; ukanaksti asnonakaruw khumxatawayi,
19ukat uywatanakaparuw säna:
—Jumanakax nayraqat sarapkam, nayasti qhipat jutä —sasa.
Abigail warmisti chachapar jan yatiyasawa,
20mä asnor qunxatasin jamasanjam uka qullut saraqanïna. Ukatsti akatjamat Davidampiru, jaqinakapampir jutaskir uñjäna, ukatsti jupanakar katuqiriw saräna.
21Davidasti amuyupan sänwa: “Inamayaw wasaran Nabal jaqin yänakap jan chhaqhañapatakix arxatta. Jichhasti ukham lurataxat jan walimpiw kutt'ayitu” sasa.
22Ukhamasti Davidax mä juramento luräna: “Tatitux nayarux mutuyitpan janitix qharürkam jupan wila masinakapat taqi chachanakar jiwaraykä ukkhaxa” sasa.
23Abigail warmisti Davidar uñjasax asnopat saraqasin axsart'añ chuymampiw uraqkam alt'äna.
24Ukatsti kayupxar qunt'asisin säna:
—¡Tata, kuna juchatix utjki ukax nayxankpan! Nayax jumar parlxayt'añataki, ukhamarak lup'itax ist'añamatakiw achikt'assma.
25Jumax Nabal qhuru jaqirux jan yäqamti, pachpa sutipaw mä luqhi chuyman jaqïtap uñacht'ayaski. Ukham luqhi chuymampipuniw kunsa luri. Aka luqtirimax janiw juman khithanit uywatanakamar purinir uñjkiti.
26Chiqpachansa Tatituw jan munkiti juman jan juchan jaqinakar jiwarayir jutañamxa, ukhamata chiqa kankañ pachpa amparamampi uñacht'ayañamataki. ¡Tatitux munpan taqi uñisirinakamasa, ukhamarak ñanqha lurañ amtapktam ukanakasa, Nabalan puriñaparu puripxañapa!
27Jichhasti achikt'assmawa, nayax kawkïr waxt'äwinaktix apanirapksma ukanak jumamp chika jutapki uka uywatanakamaru lakinuqaspan,
28ukatsti jumaw aka luqtirimarux pampacht'arakïta. Chiqpachansa Tatituw jumarusa, wawanakamarus marka apnaqäwi kankañ wiñayatak churapxätam, Tatitutak juman ch'ama tukutam layku, taqi jakäwimansa janirakiw kuna jan walt'añas jumxarux jutkaniti.
29Khititix jumar arkanaqkätam, jiwayañsa munkätam ukapachaxa, jakäwimax Tatitu Diosan suma arxatatäniwa. Tatitux juman uñisirinakamarux q'urawampjamaw jayar q'urawnukuni.
30Ukhamasti, kunapachatix Tatitux jumataki aski luräwinak arsuwayki ukanak phuqkani, Israelan jilïripat utt'aykarakïtam,
31ukapachax janiw jumax jaqi jiwayatamatsa, pachpa amparamampi chiqa kankaña luratamatsa amtkätati, janirakiw chuymamas mayjt'kaniti. Kunapachatix jumaru Tatitux jilarkiri yänak churkätam ukapachax naya luqtirimat amtt'asipunitätawa —sasa.
32Davidasti sarakïnwa:
—Israelan Tatitu Diosapax qullanäpan, jupaw jumaru nayampi jikisiñatak khithantam,
33suma amuyt'an warmïtamatsti, jumax qullanarakïma. Chiqpachansa jumaw nayarux jaqi jiwayañat jark'ista, pachpa amparaxampi chiqa kankaña lurañatsa.
34Nayarusti Israelan Tatitu Diosapaw jumar jan wali lurañat jark'itu. Janitix jumax jank'ak nayamp jikisir jutkasamäna ukkhaxa, qharürux Nabalan wila masipatxa janiw mä chachas jakkasapänti —sasa.
35Ukatsti Davidax kuntix uka warmix apkatayna ukanak katuqäna, ukat sarakïna:
—Jichhax jan kuna llakinik utamar sarxam. Nayax arunakam ist'smawa, mayitamarus jaysaraksmawa —sasa.
36Abigail warmisti utapar kuttanxän ukkhaxa, Nabal chachaparux reyitakjam mä jach'a manq'äwi luraskir jikxatäna. Jupasti wali k'uchikïnwa, wali machantataraki. Ukat jupax qhipüru willjtakamax janiw kunsa chachaparux siskänti.
37Qhipür willjtasti, kunapachatix Nabal jaqin machatapax apaqtxän ukkhaxa, Abigail warmipax kunatix luraskatayna uk yatiyäna. Nabal jaqix uk ist'asax jiwatjam jan unxtkiriw tuküna.
38Tunka uru qhipatsti, Tatitux Nabal jaqirux wasitat mutuyäna, ukat Nabal jaqix jiwxäna.
39Davidax Nabal jaqin jiwxatapa yatisinsti sänwa:
—¡Tatitux qullanäpan. Nabal jaqin nayar jan wali luratapat jupaw phuqsusirapitu! ¡Jan wali lurañat qhispiyitu, Nabal jaqin juchapsti jupa pachparuw kutxatayi! —sasa.
Ukatsti Davidax Abigail warmin ukaruw khithäna jupampi jaqichasiñatak parlanipxañapataki.
40Davidan uywatanakapasti, Carmel chiqar purisax Abigail warmirux sapxänwa:
—Davidaw jumampi parlañatak khithanipxitu, jupasti jumampi jaqichasiñ muni —sasa.
41Abigail warmisti wali axsart'añ chuymampiw uraqkam alt'äna, ukatsti sänwa:
—Nayax Davidan mä luqtiripakïtwa, ukhamarus uywatanakapan kayunakap jariqañatakis jank'akirakïtwa —sasa.
42Ukanak sasinsti jank'akiw wakicht'asïna, phisqa uywatanakap irpxarusisin mä asnoruw qunxatawayäna, Davidan khithatanakapan qhipap saräna, ukatsti Davidampiw jaqichasïna.
43Davidasti Jezreelankir Ahinóam warmimpix jaqichasirakïnwa, ukatsti panpachaniw warmipäpxäna.
44Saúl reyisti, Davidan Mical warmipxa, Lais jaqin Paltí yuqapampi jaqichasiñapatakiw churxatayna, jupasti Galim tuqinkirïnwa.
Who We AreWhat We EelieveWhat We Do
2025 by iamachristian.org,Inc All rights reserved.
