EZEQUIEL 13 - Qullan Arunaka DC

Tatitux k'ari profetanakaruw juchañchi

1Tatitux nayar sarakituwa:

2“Israel markankir profetanakatak nayan sutixar parlam, uka profetanakax jupanakan amtatanakaparjamakiw parlapxi, jupanakar sarakim: ‘Tatitun arunakap ist'apxam:

3¡Ay kunakïkan uka pisi chuyma luqhi profetanakatakixa, jupanakax pachpa amtatanakaparukiw arkapxi, janiw chiqpach unañchäwi uñjapkiti!

4Israel marka, profetanakamax allinukut pirqa taypinakan utjir tiwulanakjamawa.

5Israel markar arxatañatakisti janiw kunsa lurapkiti, Tatitun urupax purinkani uka urun nuwasïwina sayt'asipxañapataki.

6Unañchäwi uñjatanakapasa, profecía arunak arsupxatapas k'arikamakiwa. Jupanakax nayan sutixat parlapxi, ukampis janiw nayax jupanakarux khithankti. ¡Arsutanakapan phuqhasiñanakap suyapxarakiwa!

7¡Jumanakan unañchäwi uñjatanakamax janiw chiqäkiti! ¡Profecía arunak parlatanakamas k'arikamakiwa! Nayan sutix aytasisaw parlapxtaxa, ukampis janiw nayax kunsa siskti.

8Ukatpï naya, Tatitux sistxa: Jumanakax k'ari arunak parlapxtaxa, unañchäwi uñjatanakamas k'arikamakirakiwa, ukat nayax jumanakatak sayt'asï. Naya, Tatituw uk arsta.

9K'ari unañchäwinak uñjiri profetanakaru, k'ari profecía arunak parliri profetanakarus mutuyäwa. Israel markaxan tantachasïwinakapansti janiw kuna parlañanakapas utjkaniti; sutinakapasti janiw israelitanak taypin qillqatäkaniti, janirakiw israelitanakan uraqinakaparus mantapkaniti. Ukapachaw jumanakax nayan Tatitütax yatipxäta.’

10“Jïsa, jupanakax markaxaruw sallqjapxäna, taqi kunas walikïskiwa sasa, ukampis uka parlatanakapax janiw chiqäkänti. Uka k'arisitanakapax jan suma sayt'ayata, q'athawimpi lluch'ikipata pirqjamawa.

11Ukhamasti uka pirqanak luririnakarux sarakim, pirqa luratanakapax mäkiw tinkuni. Jallunakax walpun purintani, chhijchhis qalanakjamaw purintani, mä jach'a thayaw thayt'anini,

12uka pirqasti tinkuniwa. Ukapachaw jumanakarux jiskt'apxätam: ‘¿Kunarak lurasxi q'athawimpi lluch'ikipata pirqasti?’ sasa.

13Ukatpï naya, Tatitux sistxa: Q'apisiñaxan nayax mä jach'a thaya thayt'ayanï, jach'a phiñasiñaxansti, walpun jallu purintayä, chhijchhisa qalanakjamaw purintani, phiñasiñaxampix taqi kunpin t'unthapï.

14Kuna pirqtix jumanakax suma pirqarjam tukuyapkta uksti, pamparuw liwinukü, qalltanakapsa qhanaruw apsurakï. Jïsa, uka pirqax liwisiniwa, jumanakasti uka pirqampi liwxattataw jiwarapxäta. Ukapachaw jumanakax yatipxäta, nayan Tatitütaxa.

15Uka pirqarusa, uka pirqa luririnakarus phiñasiñax warxatanï, ukat jaqinakax sapxani: ‘Janiw kunas uka pirqat jilt'kxiti, janirakiw pirqa luririnakat maynis qhiparkxiti,

16Israel markankir uka k'ari unañchäwi uñjir profetanakasa, khitinakatix Jerusalén markarux: ‘Taqi kunas walikïskiwa’ sasa yatiyapkäna ukanakas janiw qhiparkxapxaniti.’ Naya, Tatituw uk arsta.

Tatitux profetisa warminakaruw juchañchi

17“Jichhasti, jaqin yuqapa, kawkïr warminakatix markaman nayan sutix aytasis parlapki ukanakar saykatam,

18ukatsti sarakim: ‘Tatitux akham siwa: ¡Ay kunakïkan jumanakatxa, jaqinakar sallqjañatakix kunayman layqasiñ ch'uqañanak ch'ukupxtaxa, ukanakampi amparanakapar ch'uqt'asipxañapataki, velonak lurapxtaxa, ukanakampi p'iqinakap ch'uqt'asipxañapataki! ¿Jumanakasti markaxan jakañanakapax jumanakankkaspas ukhamti amuyapxta?

19Jumanakax mä jach'i cebada layku, mä jisk'a t'ant'a laykukiw nayarux markax nayraqatan jisk'achapxista; jan juchan jaqinakaruw jiwarayapxtaxa, khitinakatix jiwapxañapäkän ukanakarusti janiw jiwayapktati. Jumanakax ukham nayan markaxarux sallqjapxtaxa, jumanakan k'ari arunakamar jaysapxatap layku.

20Ukatpï naya, Tatitux sistxa: Nayax jumanakan lurata layqasiñ ch'uqañanakarux uñisipuntwa, ukanakampisti jaqinakarux jamach'inakäkaspas ukham katurapxtaxa. Nayaw uka jaqinakarux layqasiñanakamat qhispiyä, ukatsti jamach'inakjamaw thuqtawayxapxani;

21kawkïr layqasiñ ch'uqañanaktix uskuntapkta ukanakat nayaw qhispiyä, janirakiw mayampsa jupanakarux katurkxapxätati. Ukapachaw jumanakax yatipxäta, nayan Tatitütaxa.

22Jumanakasti k'arisiñanakamampix aski jaqinakarux llajlla tukuyapxtaxa, uk lurañsti janiw nayax munkäyätti, ñanqha lurir jaqinakarux juk'ampi jan wal lurapxañapatakiw ch'amachapxtaxa, ukhamat nayan mutuyäwixat jan qhispipxañapataki.

23Ukatpï jichhax jumanakax janiw mayampsa uka k'ari unañchäwinakam uñjkxapxätati, janirakiw k'ari profecía arunakamsa juk'ampi parlkxapxätati. Nayaw markaxarux jumanakan amparanakamat qhispiyä, ukat yatipxäta, nayan Tatitütaxa.’ ”