ÉXODO 22 - Qullan Arunaka DC

Jan wali luratanak askichañatak kamachinaka

1 1 (37) “Khititix mä vacsa, jan ukax mä ovejsa lunthatasini, ukatsti kharsuni, jan ukax aljanisa, vacanirux mä vacatxa phisqa vaca churxani, mä ovejatsti pusi oveja churxarakini.

2 2 (1) “Mä lunthatarutix lunthataskir katjasin nuwjas jiwayapxan ukaxa, jiwayirix janiw juchañchatäkaniti.

3 3 (2) Ukampis inti jalsutattix lunthatar jiwayani ukaxa, jiwayirix juchañchatäniwa.

“Lunthatirix kunanaktix lunthatki ukanakat alapxa kutt'ayxañapawa, jan qullqinïkchi ukasti, lunthatatapat kutt'ayxañatakix jupa pachpa aljataw uñjasini.

4 4 (3) “Lunthatat uywatix jakkirpach lunthatan amparapan jikxatatäni ukaxa, jupax mä ukkhampi churañapawa, vacatsa, asnotsa, ovejatsa.

5 5 (4) “Khititix uywanakap ananukusin pampana, jan ukax mä uva yapun manq'ayaspa, ukatsti uywanakapax yaqha jaqin yapupar mantasin manq'suraqaspa ukaxa, uywanix manq'suyatapat yapupankirit suma juyranak churañapa.

6 6 (5) “Khititix nina phichhasin maynin uraqipankir pastonaka, trigo kallchanaka, jan ukax trigo apthapitanakar phichhantaspa ukaxa, uka nina naqtayir jaqix kunanaktix ninax nakhantki ukanakat qullqi kutt'ayxañapawa.

7 7 (6) “Khititix mayni masiparu qullqipsa, jila alani yänakapsa imarapiñapatak katuyasispa, ukatsti uka masipatix pachpa utapat uka yänak lunthatsuyasispa ukaxa, lunthatar katjapkani ukapachasti mä ukkhamp kutt'ayxañapawa;

8 8 (7) ukampis jan katjapkani ukaxa, utanix Tatitun nayraqatapar irpatäniwa, ukan jupax qhan arsuñapa kuna yänaktix masipax katuyaskän ukar jan llamkt'atapata.

9 9 (8) “Khititix mä urqu vaca katuntasini, jan ukax mä asno, mä ovejsa, kuna isinaksa, jan ukax kuna chhaqhat yänaksa; ukatsti maynitix nayankituw akax sani ukaxa, uka pani jaqix Tatitun utaparuw sarapxañapa, Diosan taripatäñataki, khititix juchanïki ukaxa, mä ukkhamp maynir churxañapa.

10 10 (9) “Maynitix jaqi masipar katuyani mä asno, mä vaca, mä oveja, jan ukax yaqha uywa; ukatsti uka uywatix jiwaspa, jan ukax usuchjatäspa, jan ukax jan khitin uñjkat lunthatatäspa ukaxa,

11 11 (10) uywanak katt'ayatäki uka jaqix uywanitakiw Tatitun sutipxar juramento lurarapini, masipax katuyaski uka uywanak jan imantatapa, jan uñjatapa. Uywanix arunakapar iyawsañaparakiwa, uywa katur jaqix janiw kuna qullqsa churañapäkiti.

12 12 (11) Ukampisa, jupan uñjkatatix uka uywa lunthatapxaspa ukaxa, uywanirux qullqi churxañapawa.

13 13 (12) Uka uywarutix ch'uminkir qhuru animalax katusin jisk'a jisk'a tukjaspa ukaxa, uka jiwat animal jilt'xa uñxatañatakiw apaniñapa, ukhamat qullqi jan churañataki.

14 14 (13) “Khititix kuna uywa mayt'asispa, ukat uka uywatix usuchjasispa, jan ukax uywanin ch'usäñapkam jiwat uñjasispa ukaxa, mayt'asirix uywanir qullqi churxañapawa;

15 15 (14) ukampis uywanitix ukankaskaspa ukaxa, uywa mayt'asirix janiw kuna qullqsa churañapäkiti. Uka uywatix qullqxar mayt'atächi ukaxa, uka qullqik churxañapawa.

Jaqinakan sum sarnaqañapatak kamachinaka

16 16 (15) “Khititix chacha jan uñt'ir tawaqur jan parlatäkipan sallqjani, ukatsti jupar warmisirakini ukaxa, uka tawaqumpiw jaqichasiñapa, tawaqun awkiparusti qullqi churañapa, qawqhatix churañäki ukkha.

17 17 (16) Ukampis tawaqun awkipatix uka waynamp jaqichasiñap jan munkanixa, uka waynax qawqhatix chacha jan uñt'ir tawaqut qullqi churañäki ukhamarjamaw churañapa.

18 18 (17) “Layqasiñanakan sarnaqirinakax, jiwañapatak juchañchatäniwa.

19 19 (18) “Mä uywamp q'añusir jaqix jiwañapatak juchañchatäniwa.

20 20 (19) “Yaqha diosanakar wilañchanak luqtir jaqix, jiwañapatak juchañchatäniwa.

21 21 (20) “Janiw yaqha markat jutir jaqirux t'aqhisiyätati, janirakiw llakisiyätasa, jumanakax Egipto markan yaqha markankir jaqinakäpxarakïyätawa.

22 22 (21) “Janiw ijma warminakarusa, wajchanakarus t'aqhisiyätati,

23 23 (22) jumanakatix t'aqhisiyapxätaxa, jupanakax nayaruw art'asinipxitani, nayasti jupanakan art'asitanakap ist'äwa,

24 24 (23) ukatsti nayax wali q'apisitaw jumanakarux espadampkam jiwarayapxäma. Warminakamasti ijmaw qhiparani, wawanakamas wajchaw qhipararakini.

25 25 (24) “Jumatix markaxankiri, jumamp jakir jan kunan jaqir qullqi mayt'äta ukaxa, janiw jumax qullqi mayt'irjam tukütati, janirakiw qullqin jalaqtapsa mayïtati.

26 26 (25) Qullqi mayt'asir jaqitix isipxar mayt'asïtam ukaxa, uka isipxa inti jalantaruw kutt'ayanxäta,

27 27 (26) thayat jarkt'asiñatakix uka isipakiw jupan utji. Jan kutt'ayankasma ukaxa, ¿kuna isimpirak janxatasispasti? Jupax nayaruw art'asinitaspa, nayasti khuyapayasirïtax laykux ist'äwa.

28 28 (27) “Janipuniw Diosar ñanqhachätati, janirakiw markam apnaqir jilïrirus ñanqhachätati.

29 29 (28) “Yapu apthapitanakamata, taqpach vinomat waxt'anaksa nayatak apanipxapunïtawa.

“Jilïr wawam nayaruw katuyxitäta,

30 30 (29) uka kipkarak vacanakamana, ovejanakaman nayrïr qallupsa. Uka uywanakaman qallunakapasti wawachatatxa paqallqu uruw taykapampïni, kimsaqallqür urusti nayaruw churxitäta.

31 31 (30) “Jumanakax nayatak yaqhachat markäpxañamawa.

“Pampa animalanakan jisk'a jisk'a tukjat uywan aychapxa janiw manq'apxätati; uka aychxa anunakaruw liwxaruyapxäta.