ISAÍAS 43 - Qullan Arunaka DC

Tatitu sapakiw qhispiyirixa

1Jichhasti Israel,

Jacobun markapa,

jumar uywiri Tatitux sistamwa:

“Jan axsaramti, nayaw qhispiysma,

nayaw sutimat jawssma, jumax nayanktawa.

2Taqi jan walt'añanakamanxa,

nayaw jumampiskä;

jawiranaksa makhatawayaskätawa,

janiw umampi axskatas jiwkätati;

ninanjam sarakipañamächixa,

janiw nakhantat uñjaskätati,

3Nayätwa juman Tatitumaxa, qhispiyirimasa,

Israelan Qullan Diosapätwa.

Nayaw jumarux alasinsma.

Egipto, Etiopía, Sabá uka markanakata.

4Israel, nayax jumarux wal munssma,

jumax nayatakix wali jila alanïtawa.

Jumar qhispiyañataki,

nayan markaxäñamatakixa,

jaqinakampi, markanakamp katuyta.

5Jan axsaramti, nayaw jumampïskta.

Inti jalsu tuqitsa, inti jalanta tuqitsa,

nayaw jaqinakam anthapinxä.

6Amstankir markanakaru,

aynachankir markanakarus sarakïwa:

‘Markax kutt'ayxapxita,

jupanakampix jan qhiparapxamti.

Wawanakaxarux kuttayanirapxita

jayatpacha, aka uraqi tukuyatpacha.

7Nayaw jupanakarux lurt'asta,

nayar jach'añchañapatakiw irnuqt'asta,

nayar yupaychañapatakiw lurt'asta’ sasa.

8“Markaxarux jutayxapxam,

nayranïkchisa, juykhuw tuku,

jinchunïkchisa, janiw ist'kiti.

9Taqi jisk'a jach'a markanaka

tantacht'asipxam, ukat sapxarakita.

¿Khitirak jumanak taypinsti,

kunatix lurasiwayki ukanak yatiyänsti?

Jichhax qhanañchirinakam irpasinipxam,

arsupxatanakam chiqätap uñacht'ayapxam.”

10Tatitusti siwa:

“Nayan qhanañchirinakaxax jumanakäpxtawa,

nayan luqtirinakaxas jumanakäpxaraktawa,

nayar uñt'apxañamataki, alkatapxañamataki,

khitïktix nayax uk amuyt'apxañamatakiw ajllisipxsma.

Nayat nayrax janiw khiti diosas utjkänti,

akat qhiparus janiw utjkarakiniti.

11Naya sapakïtwa Tatituxa,

naya sapakiw qhispiyapxirisma.”

12Tatitusti siwa:

“Nayaw ukham yatiyapxsma,

ukat nayaw qhispiyapxaraksma;

janiw mä jan uñt'at diosati qhispiyapktamxa,

jumanakasti uka tuqit qhanañchirixäpxtawa.

13Nayratpachax nayakipunïtwa Diosaxa.

Janiw khitis ch'amaxat qhispkaspati.

Kuntix nayax lurkta uksa janiw khitis t'unjkaspati.”

14Tatitu, Israelan Qullan Diosapa,

khititix jumanakar qhispiyapktam ukax siwa:

“Jumanakar qhispiyañatakixa,

mä ejercitoruw Babiloniar ñanqt'ayañapataki khitta,

jupanakaw uka markan punkunakap t'unjapxani,

ukatsti caldeo jaqinakan kusisiñapax

t'aqhisiñaruw tukuni.

15Nayätwa Israelan Qullan Diosapaxa,

nayaw jupan luriripätxa, reyiparakïtxa.”

16Tatitusti jach'a qutanjam mä thakhi jist'ari,

walja umanak taypin mä jisk'a thakhi jist'ari;

uka thakhinjam Israel markapax sarakipawayi.

17Egipton jach'a ejercitopaw

caballonakampi, carronakampi,

israelitanakarux arktanipxi,

ukampis uka qutaruw liwiranttapxi,

jan mayampi sayt'añatakiw ukar liwiranttapxi,

uka qutanarak q'al jiwarapxi.

18Jichhasti Tatitux markapar siwa:

“Kunatix lurasiwayki uk jan amtkxamti.

19Nayaw jichhax taqi kunsa machaqaptayä,

uksti jichpacharakiw uñjäta.

Wasaran thakhinak jist'arä,

jan achuri uraqinsti jawiranak jist'ararakï.

20Qamaqinakasa, suri jamach'inakasa,

montenkir taqi animalanakasa,

wasaran uma jalsuyataxat jach'añchapxitani,

jan achuri uraqinakan jawiranak jist'arataxat jach'añchapxitani,

ajllit markaxar uma churañataki,

21kawkïr marktix nayax uywasta

uka markax nayar yupaychañapataki.

22“Ukampis jumax, Israel, Jacobun markapa,

janiw yupaychkistati, jan ukasti nayat qarjastawa.

23Janiw ovejanakatsa wilañchanak luqtankistati,

janirakiw kuna waxt'äwinaksa luqtankistati.

Janiw nayax qarjayksmati waxt'äwinak mayitaxampixa,

janirakiw incienso churit sasas p'iq usuyksmati.

24Nayatak waxt'äwi apaniñamatakixa,

janirakiw suma q'apkir qullanaksa alktati,

janiw waxt'äwi luqtat uywanakan

lik'inakapampis kusisiykistati.

Jan ukasti jucha luratanakamampiw qarjayista,

ñanqha luratanakamampiw p'iq usuyista.

25“Ukampis naya, Diosamätax laykuxa,

juchanakam pampachsmawa,

janirakiw mayampsa ukanak amtaskxäti.

26Inas naya tuqi kuna arsusiñamas utjchi,

ukanaksti purapat uñjañäni.

Kun arsusiñcha munta, arsusiskakim,

inampis q'uma mistsuskasma.

27Nayra awkimax juch luräna,

yatichirinakamasti nayatakiw sayt'asipxarakïna,

28apnaqirinakamasti nayan utaxsa takisipxänwa,

ukatpï naya sapa Diosaxa, Israel markan t'unjatäñapataki,

jisk'achjatäñapatakix apanuktxa.