1Efraín qullunak taypin Ramá sat chiqan mä chachaw jakäna, sutipasti Elcaná satänwa. Achachilanakapax Jeroham, Elihú, Tohu, Suf satäpxänwa. Jupanakasti Efraín wila masit jutirïpxänwa.
2Elcaná chachax pä warminïnwa. Maynix Ana sutini, maynisti Peniná sutini. Peninax wawanakanïnwa, Anasti janiw wawanïkänti.
3Elcaná chachasti sapa maraw wila masinakapamp chika Siló chiqar sarirïna, taqi ch'aman Tatitur yupaychiri, ukhamarak wilañchanak luqtiri. Uka markansti, Elí sat sacerdoten Hofní, Finees, uka pani yuqapaw ukankapxäna, jupanakasti Tatitun sacerdotenakaparakïnwa.
4Kunapachatix Elcaná chachax wilañcha luqtirïkän ukkhaxa, Peninarux kunatix wakt'ki uk churirïna, ukhamarak wawanakaparusa,
5ukampis Anarux kunatix sumäki ukpun churirïna, juparu sinti munasitap layku, Tatitux janis wawanak apaykchïn ukasa.
6Ukat Peninax, Anar wal jisk'achäna, ukampiw t'aqhisiyäna, jan wawachasir warmir Tatitun tukuyatap layku.
7Sapa marapuniwa, kunapachatix Tatitun utapar sarapxirïkän ukkhaw Peninax Anar ukham jisk'achjirïna; ukat Anax wal jachirïna janirakiw manq'sa munirikänti.
8Elcaná chachapasti akham sasaw jiskt'irïna: “Ana, ¿kunatarak jachtasti? ¿Kunatarak llakista, janirak manq'añ munktasti? ¿Janit nayasti jumataki tunka wawanakat sipan askïktsti?” sasa.
9Mä kutiwa, Siló chiqankkasina, Anax manq'añ tukutat Tatitun utapar mayisir saräna. Tatitun utapar mantañ punku jak'ansti, Elí sacerdotex mä qunuñan qunt'atäskänwa.
10Anasti jacht'asisa, chuymapansa wali llakt'ataw Tatitut mayisiskäna,
11akham sasa: “Taqi ch'aman Tatay, jumatix aka luqtiriman t'aqhisitap uñtanïtaxa, ukat nayat amtasisin mä wawsa apayarakitätaxa, nayax uka wawan jakäwip jumar luqtiritakiw katuyäma, uka arsüwi phuqhañatakisti janiw ñik'utapas khuchhuratäkaniti” sasa.
12Anax wali jayaw Tatitut mayisiskäna, Elí sacerdotex jupar lakap unuqiskirik uñji;
13ukampis Anax amukiw mayisiskäna, janiw arsutapax ist'askänti, lakapakiw unuqiskäna, ukat Elí sacerdotex machantat warmïtap amuyäna,
14ukat jupar sarakïna:
—¿Kunapachkamas machatäskäta? ¡Uka machañ vino apanukum! —sasa.
15Anasti ukkharux sänwa:
—Tatay, janiw machatäkti, janiw nayax kuna vinsa umkti, janirakiw yaqha machjayir umañanaksa umkti, jan ukasti wali llakt'atätwa, t'aqhisitax Tatitur yatiyasiskta.
16Jan jumax nayan jan wali warmïtax amuyamti, nayax chuymaxan wali llakt'at jikxatasisin Tatitut mayisiskta —sasa.
17Ukatsti Elí sacerdotex sarakïnwa:
—Jichhax jan llakisxamti, sumakiy sarxam, Israelan Diosapay jumarux kuntix maykta uk churarakpan —sasa.
18Anasti sänwa:
—Walikiw tatay, yuspagarsmawa —sasa.
Ukham sasinsti, Anax kawkhattix jutkän ukkharuw kuttawayxäna, manq'asiriw sarxäna, janirakiw llakitäkxänti.
19Qhipürusti, Elcaná chachampi, wila masinakapampix willjtat sartasipxäna, Tatitur yupaychasinsti, Ramá sat chiqankki uka utaparuw kuttanxapxäna. Uka qhipatsti Elcaná chachax Ana warmipampiw mayachasïna, Tatitusti Ana warmin mayisitaparux ist'änwa.
20Ukhamat Ana warmix usur jaqiptxäna, ukatsti mä yuqall wawa wawachasïna, uka wawarusti Samuel suti uchäna, Tatitux jupan mayisitapar ist'atap layku.
21Qhipa marasti, Elcaná chachax taqpach wila masinakapampiw Siló sat chiqar saräna, arsutap phuqhiri ukhamarak wilañcha luqtiri,
22ukampis Anax janiw jupanakamp sarañ munkänti, ukat chachaparux säna:
—Janiw nayax sarkäti, wawaru ñuñu t'aqañaxkama, ukatsti naya pachpaw Tatitun ukar irpä, ukat ukan qhiparañapataki.
23Elcaná chachapasti sänwa:
—Kunjämatix jumatak wakiski ukhamay luram, wawan ñuñu t'aqañapkam qhiparam, Tatitusti arsutaparux phuqharakpan —sasa.
Ukhamaw Anax qhiparäna, wawa uywasa, ñuñut t'aqañapkama.
24Kunapachatix ñuñut t'aqanukxän ukkhaxa, wawan jisk'äskatap laykux jupamp chikaw Tatitun utapar irpäna Siló sat chiqaru. Ukhamarakiw kimsa maran vaca qallumpi, mä lip'ich wayaqa vinompi, pä tunka payan kilo trigompi apäna.
25Ukatsti mä vaca qallu wilañcha luqtasinxa, wawarux Elí sacerdoteruw katuyxapxarakïna.
26Anasti sänwa:
—Tatay, chiqpachansa jumax jakasktawa, kawkïri warmitix juma jak'an Tatitut mayiskäna ukätwa.
27Nayax Tatituruw aka wawa mayïyäta, jupasti mayisitaxarux ist'ituwa.
28Nayax Tatituruw aka yuqall wawa katuyta, jakañapkamasti jupar luqtat wawäñapataki —sasa.
Ukatsti Elí sacerdotex Tatit nayraqatan uraqkamaw p'iqip alt'asïna.
Who We AreWhat We EelieveWhat We Do
2025 by iamachristian.org,Inc All rights reserved.
