JEREMÍAS 20 - Qullan Arunaka DC

Jeremiasan uñisiripa Pashur sacerdotetak profecía arunaka

1Imer chachan yuqapa Pashur jaqix sacerdotekäna, Tatitun utapansa jilïrïkarakïna, ukapachaw Jeremiasarux aka profecía arunak arsur ist'äna.

2Ukat jupax Jeremiasar nuwjapxañapatak khithäna, ukatsti katuntasin carcelaruw apantapxäna, ukasti Benjamín siski uka Jach'a Punku tuqin jikxatasïna, Tatitun utap jak'ana.

3Mä uru saraqatatsti, Pashur sacerdotex Jeremiasar carcelat apsunipxañapatakiw mayïna, ukapachaw Jeremiasax säna: “Tatituw sutim mayjt'ayani. Pashur sutitxa Magor-misabib satäxätawa.

4Tatitux siwa: ‘Jumarux mä axsarkañaruw juma pachpataki, taqi masinakamataki tukuyäma. Juman uñjkataw masinakamax uñisirinakan espadanakapampi jiwarayat uñjasipxani. Taqi Judá uraqin utjirinakarusti Babiloniankir reyin amparaparuw katuyarakï, juparakiw katuntat apani Babilonia uraqkama, jan ukax cuchillompi thiyat jiwarayarakchini.

5Aka markan qamir yänakapsa, wali jila alani yänakapsa, Judá uraqinkir reyinakan qamir yänakapsa, uñisirinakamaruw katuyarakï, Babiloniar apapxañapataki.

6Jumasti, Pashur, wila masimampi chikt'at Babiloniar apayataw uñjasïta. Ukan jumax jiwäta, ukan jumarux imapxarakïtam, kawkïr masinakamarutix k'ari arunak parlkäyätas ukanakamp chika.’ ”

Jeremiasax Tatitu nayraqatan arsusi

7Tatay,

nayarux suma arunakampiw jawsista,

nayasti jawsatamarux iyawstwa.

Jumax nayat sipansa juk'ampi ch'amanïtawa,

ukat nayarux iyawsayista.

Jichhax nayat kunapachas larusisipkakiwa;

taqiniw nayat phiskasipxitu.

8Sapa kuti parlataxasti,

nuwasiñampita t'unjatäñampit yatiyañatakikiwa;

nayarusti sapa kutiw jan wali arunakampi jisk'achapxitu,

arunakam yatiyataxatsti nayat larusipxarakiwa.

9Nayatix siristxa:

“Janiw juk'ampi Tatitut amtkxäti,

janirakiw jupan sutipatsa parlkxäti” sasa,

ukapachasti arunakamax

chuymaxan ninjamaw nakhantitu,

ch'akhanakaxamppach nakhantitu.

Janiw arunakam parlkxäti sistwa,

ukampis janiw amukt'añjamäkiti.

10Jaqinakan jisk'at parlasitanakapsa ist'araktwa:

“¡Taqi chiqansa axsarañakiw utjaski!” sasa.

“¡Jutapxam, juchañchapxañäni!” sapxiwa.

Pachpa masinakaxas

nayan pantjasiñax suyt'apxi.

“Inas sallqjayaschini;

ukat atipjañäni, jupatsa phuqsusirakiñäni” sapxarakiwa.

11Ukampis Tatay, jumax nayampïsktawa,

nuwasïwin jan atipjkay nuwasir jaqjama;

nayar arknaqirinakasti liwisipxaniwa,

janiw atipjañatak ch'amanïpkaniti,

aynacht'apxaniwa, mä p'inqaw uñjasipxani,

wiñayatak p'inqachjatäpxaniwa.

12Taqi ch'aman Tatitu,

jumax taqi kunsa chiqaparuw uñjtaxa,

jumax jaqin chuymapsa sum uñt'taxa,

kunjämtix uka jaqinakar mutuykäta uk jichhax uñjayita,

nayasti juman amparamaruw taqi kun katuysma.

13Tatitur q'uchupxam,

Tatitur yupaychapxam,

jupaw llakitarux

ñanqha jaqinakan amparapat qhispiyi.

14¡Ñanqhachatäpan kunürutix yurkta uka uruxa!

¡Kunürutix taykaxax wawachkitu uka urux ñanqhachatäpan!

15Ñanqhachatäpan khititix awkixar yatiykäna

mä yuqall wawan yuritapata.

16¡Uka jaqisti, kawkïr markanakarutix

Tatitux wiñayatak t'unjki ukhamäpan!

¡Qhantatinakax usutat arnaqasiñanak ist'pan,

chika urusti nuwasiñan arnaqasitanak ist'arakpan,

17Tatitux janiw taykaxan purakaparpach jiwaykituti!

Ukhamat taykaxax nayan sepulturaxäsapäna,

nayasti janiw yurkiriskäyätti.

18¿Kunatarak nayasti taykaxan purakapat mistpachätsti,

t'aqhisiñanaka, llakisiñanak uñjañataki,

jakañaxasa mä p'inqa tukuyatäñapatakisti?