EFESIOS MARKANKIR IYAWSIRINAKAR QILLQATAPA - Qullan Arunaka DC
MARKANKIR IYAWSIRINAKAR QILLQATAPAQALLTA ARUNAKAAka qillqatan p'iqinchäwipax Diosan wiñay amtäwip uñacht'ayañawa, Criston munañanïñ kankañapar taqi jakirinakar mayachthapiñawa, kunapachatix chimput urux purinkan ukapacha. Diosax uka amtäwip jupankirinakaruw uñacht'ayi, ukampis mayninakatakix jamasar imantatäskiwa. Ukatpï Diosan markapax Cristompi mayaki jakañapaxa, jupa tuqikirakiw taqi jaqinakan mayar tukupxañapax utji.Qallta arunakapasti maynïr qillqatanakat sipansa juk'ampi juk'akiwa (1.1, 2). Aka qillqatax payar jaljatäspawa. Nayrïr jaljapansti (1.3—3.21), taqinis mayakïñat parli; ukatsti amuyt'ayarakiwa kunjämtix Diosax markapar ajlliski, juchanakapat pampachki, Jesucristo Yuqap tuqi qhispiykaraki ukanakata, kunja jach'äkitix Criston munasiñapax uk amuyt'ayaraki. Payïr jaljapansti (4.1—6.20), mayakïñax Qullan Ajay tuqi utjatap qhanañchi, machaq jakañasti Criston utjataparaki, ukatsti Diosan wawanakapax kunjäm jakañapäkitix ukanakat qhanañcharaki. Tukuyäwipansti (6.21-24), Tíquico sat yatiyiripan khithatäñapat yatiyaraki.Aka qillqatanxa Cristor iyawsirinakan mayakïñapat kimsa uñtasïwi tuqiw amuyt'ayata: Jaqin janchiparu, ukasti iglesiawa, p'iqipasti Tatit Cristowa; mä jach'a utaru, uka iglesian qalltir qalapasti Tatit Cristowa; ukatsti chacha warmi jaqichasïwiru, iglesiax Cristompi jaqichasirir uñtatawa. Aka qillqatansti kunapachatix Criston munasiñapat parlki ukkhaxa, Diosaruw taqi chuymampi jach'añcharaki (3.20, 21). Aruntäwinakampi janïr tukuykasasti, Cristor iyawsirinakarux ch'amampi sayt'asipxañapatakiw iwxt'i, ukhamarak ajay tuqinsa nuwasiñ yänakampjam isthapisipxañapatakiw iwxt'i, romano soldadonakan nuwasiñ yänakapar uñtasiyasa (6.10-20).
