EZEQUIEL 39 - Qullan Arunaka DC

Diosax Gog sat jilïriruw atipji

1“Jumasti Ezequiel, nayan sutixaru Gog sat jilïritak parlam, ukatsti sarakim: ‘Tatitux akham siwa: Gog, jumax Mésec, Tubal siski ukanakan jach'a jilïripätawa, nayasti jichhax juman uñisirimaw sayt'arakta.

2Jichhax jumarux juk'at juk'at jutayäma, kawki jayanktatix uka amsta tuqita, ukatsti Israel qullunak tuqiruw irpanïma.

3Ukatsti kawkïr mich'inak antutt'añtï ch'iqa amparamar apxarkta uksti p'akjäwa, kupi amparaman apt'atäkta uka mich'inaksa q'añu t'unanak taypiruw willtarakï.

4Jumasti, ejercitomampi, jumampi chika sarnaqir jaqinakamampix Israel qullunakan jiwarapxäta, jumanakan jiwarat janchinakamsti siwiq'aranakaru, monte animalanakaruw liwxaruyä manq'antatäpxañamataki.

5Uka ch'usa pampanakan liwirtapxäta. Naya, Tatituw uk arsta. Arsutaxsti phuqhapunïwa.

6Magog markxarusti nina apayanï, khitinakatix jach'a quta tuqinakan k'uchik jakasisipki ukanakxarus apayanirakïwa. Ukapachaw jupanakax nayan Tatitütax yatipxani.

7Nayaw Israel markaxa taypin qullan sutixa uñacht'ayä, janirakiw qullan sutixar juk'ampi takisiykxäti. Ukat yaqha markanakax yatipxani, nayan qullan kankañaxa Israel markan uñacht'ayataxa.

8Taqi ukanakasti niyaw lurasini, yatiyata urusti jak'achasisinkiwa. Naya, Tatituw uk arsta.’

9“Israelan markanakapan utjirinakasti mistunisin nuwasiñ yänakap ninaruw phichhantxapxani, taqi escudonakapa, mich'inak antutt'añanakapa, mich'inakapa, jabalinanakapa, lanzanakapa; ukatsti taqi ukanakan waljätapatxa, paqallqu maratakiw lawanakax phayasiñatak utjani.

10Janirakiw wakiskxaniti jupanakan pamparu lawa apthapir sarapxañapaxa, ch'uminakar lawa ch'iyir sarapxañapas munaskxaniti, taqi uka nuwasiñ yänakax jupanakan phayasiñapataki askïtap layku. Ukhamat markaxax jupanakan yänakap lunthatjapki ukanakan yänakap lunthatjapxani, jupanakat yänakap apaqirinakan yänakap apaqapxarakini. Naya, Tatituw uk arsta.

Gog sata jilïrin imäwipa

11“Uka urunsti Gog jilïrin Israel uraqir imt'atäxañapatakiw mayirakï, Saririnakan Qhirwapa sata chiqana, quta uñkatasina. Janirakiw khitis uka chiqanjam sarakipkxaniti, ukan Gog jilïriru, taqpach ejercitoparu imantxapxani, ukatsti uka qhirwarux Gog chachan ejercitopan Qhirwapa sasaw sutichapxani.

12Israelitanakasti taqi uka jiwaratanakarux paqallqu phaxsiw imani, ukhamat uka markan q'umäxañapataki.

13Israelitanakatakix mä jach'añchäwïniwa uka jiwarat soldadonakar imañaxa. Uka uruw nayax jach'a k'ajkir kankañax uñacht'ayä. Naya, Tatituw uk arsta.

14Uka paqallqu phaxsinak qhipatsti, mä qawqha jaqinakaw taqi uraqpach uñatatiri sarapxani, uka uraqin jiwat liwisisipkani ukanakaruw imantanxapxani, ukhamat uka uraqin q'umäxañapataki.

15Uka khithat jaqinakat maynitix jaqi ch'akhanak jikxatanixa, jak'aparuw mä chimpu uskt'ani, ukhamat amay imirinakax Gog sat jilïrin ejercitopan Qhirwapar imxapxañapataki.

16Ukhamat uka uraqix q'uma tukutäxani. (Ukansti Ejército sata markaw utjaraki.)”

17Tatitusti sarakituwa: “Jumasti alaxpach jamach'inakaru, montenkir taqpach animalanakar jawsthapim, taqi tuqit jutapxpan, nayasti Israel qullun mä jach'a manq'äwi jupanakatak wakicharapï. Ukan jupanakax aycha manq'apxani, wilsa umapxarakini.

18Soldadonakan aychanakap manq'apxani, marka apnaqirinakan wilap umapxani, oveja aychäkaspas ukhama, jan ukax Basán sata uksa tuqinkir lik'i cabritonakana, urqu vacanakan aychapäkaspas ukhama.

19Jupanakatak wakichat manq'äwinsti, usurañkamaw lik'i aycha manq'apxani, machjasiñkamaw wilsa umapxani.

20Caballonakana, uka caballonakar kachxatat saririnakan aychapampi, soldadonakan aychapampi, nuwasir sarapki ukanakan aychapampix mä jach'a manq'äwi wakicharapï, ukhamat jupanakan sist'asiñkam manq'apxañapataki. Naya, Tatituw uk arsta.Israel markax wasitat sayt'ayatawa

21“Ukham nayax jach'a k'ajkir kankañaxa yaqha markanakar uñacht'ayä. Taqi markanakaw uñjapxani, chiqapar uñjataxa, juchapat mutuyataxa.

22Uka urut qhiparusti, israelitanakax yatipxaniwa, nayan Tatitu Diosapätaxa.

23Yaqha markanakasti yatipxarakiniwa, israelitanakan jucha luratanakapat yaqha markar apanukuyata uñjasipxatapa, janiw nayarux taqi chuymampi arkapkitänti; ukat nayax jupanakataki maysa uñtxta, uñisirinakapas nuwasïwin atipjasin jupanakar jiwarayapxañapataki.

24Nayasti jupanakarux q'añu lurapxatapata, nayatak sayt'asipxatapatsa, wakisitaparjamaw apanukta, ukatsti maysa uñtxarakta.

25“Ukatpï jichhax naya, Tatitux sistxa: Jichhax taqi Israel markpachat khuyapt'ayasï, Jacobun taqi wawanakapata. Israelan sarnaqäwipax sumar tukutäxaniwa, ukhamat nayan qullan sutixax suman uñjatäñapatak wayt'arakï.

26-27Nayaw jupanakarux wasitat yaqha markanak taypita, uñisirinakan markanakap taypitsa tantachthapxä; ukapachaw pachpa uraqinakapan k'uchiki jakasxapxani, janirakiw khitis jupanakarux mulljkaniti. Ukhamat nayax q'uma kankañaxa uñacht'ayä, walja markanakaw uk uñjapxarakini. Israelitanakasti nayar jan taqi chuyma arkapxatapat jisk'achjat uñjasiña t'aqhisipxani.

28Nayaw jupanakarux yaqha markanak taypir katuntat apaytxa, jichhax naya pachpaw wasitat jupanakarux pachpa uraqipar tantacht'xarakï. Janiw maynis jichhax yaqha markar apanukut uñjaskxaniti. Ukapachaw jupanakax yatipxani, nayan Tatitu Diosapätaxa.

29Janipuniw jupanakatakix mayampsa maysaru uñtkxäti, Israel markxaru ajayuxa warxatanitax layku. Naya, Tatituw uk arsta.”

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help