2 REYES 19 - Qullan Arunaka DC

Judá markax Senaquerib reyin amparapat qhispiyat uñjasi(2 Cr 32.20-23; Is 37.1-38)

1Ezequías reyix ukanak ist'asinxa, llakisiñat isinakap ch'iyanuqasïna, chhankha isimpi uchasisinsti Tatitun utaparuw saräna.

2Ukatsti jupax reyi uta apnaqir Eliaquim jilïrimpiru, Sebná qillqirimpiru, sacerdotenakat jilïr awkinakampiruw khithäna, Amós chachan yuqapa Isaías profetan ukaru, chhankha isinakamp isthapita llakisiñap uñacht'ayañataki,

3profetar akham sapxañapataki: Ezequías reyix siwa: “Jichhürux wali llakisiñankapxtwa, mutuyata, jisk'achataraki, kamisatix mä warmix wawachaski ukkhax jan ch'amanjam jikxataski ukhama.

4Inasa Tatit Diosamax ist'chi kuna arunaktix Asiriankir reyin khithanit yanapiripax jakkir Diosar ñanqhachasa siski uka, inachay Tatit Diosamax uka arunak ist'asin jupar mutuyaspa. Jichhasti Tatitut mayim jilt'ir israelitanakat khuyapayasiñapataki” sasa.

5Ezequiasan yanapirinakapasti Isaiasan ukaruw sarapxäna,

6Isaías profetasti reyir yatiyapxañapatakiw iwxarakïna, akham sasa: “Tatitux siwa: ‘Kuna ñanqha arunaktix Asiriankir reyin uywatapax nayatak arski ukanakatxa jan jumax axsaramti.

7Ist'am, nayaw Senaquerib reyir mä jan wali yatiyäwi ist'ayä, ukat markapar kutt'xañapataki, ukansti jaqin jiwayatäñapatakiw wakichä’ ” sasa.

8Asiriankir oficialasti Senaquerib reyipan Laquis markat sarxatap yatïna. Ukat jupax Jerusalén markat sarxäna, ukatsti Senaquerib reyirux Libná markar katuntaskir jikxatäna.

9Ukan Asiriankir reyix ist'äna, Etiopiankir Tirhaca sat reyin jupampi nuwasir jutantatapa. Ukhamasti mä kutimpiw Asiriankir reyix Judá markankir Ezequías reyin ukar yatiyirinak khithäna,

10akham sapxañapataki: “Ezequías, Judá markan reyipa: Jumax Diosamaruw alkatastaxa, ukampis jan jupan akham satapampi sallqjayasimti: ‘Jerusalén markax janiw Asiriankir reyin amparapar katuyatäkaniti’ sasa.

11Jumax ist'tawa kunjämtix Asiriankir reyinakax lurapki kawkïri markanakarutix tukjañ munapki ukxa. ¿Ukatti jumasti qhispïtasti?

12¿Nayra awkinakaxax tukjapki uka markanakan diosanakapasti: Gozán, Harán, Résef uka markanakar qhispiyänti, Bet-edén uraqinkir Telasar markan jakir jaqinakarus qhispiyarakïnti?

13¿Kawkinkapxaraki Hamat, Arpad, Sefarvaim, Ivá, Hená markanakan reyinakapasti?” sasa.

14Ezequías reyisti khithat jaqinakax churapkatayna uka qillqat ullaräna. Ukatsti Tatitun utaparuw saräna, Tatit nayraqatan qillqat janatatasinsti,

15Tatitut mayisïna akham sasa: “Israelan Tatit Diosapay, juman reyi qunuñamax querubines sat chhiqhaninakxankiwa: juma sapakïtaw aka uraqin utjir marka apnaqäwinakan Diosapaxa; jumarakiw alaxpachsa, akapachsa lurtaxa.

16Jichhasti, Tatay, nayrama uñatatasin uñtanimaya. Kuna arunaktix Senaquerib reyix juma jakkir Diosaru ñanqhachañataki apayankitu ukanak ist'amaya.

17Tatay, ukax chiqawa, Asiria markan reyinakapax markanaka, uraqinakapa tukjaskapuniwa,

18diosanakapsa ninarkamaw jaquntapxaraki, chiqpachansa ukanakax janiw diosanakäpkänti, lawata, qalata, jaqin lurat yänakakïnwa, ukat tukjatäsipkixa.

19Jichhasti, nanakan Tatit Diosaxay, Senaquerib reyin ch'amapat qhispiyapxitaya, ukhamat aka uraqinkir markanakan juma Tatitu Diosaki utjatap yatipxañapataki” sasa.

20Ukat Isaías profetax khithanïna, Ezequías reyir akham sapxañapataki: “Israelan Tatit Diosapax akham siwa: ‘Nayax ist'smawa, Asiria markankir Senaquerib reyipat yatiykista uka mayisitamaruxa’ ” sasa.

21Tatitux Asiriankir reyitakix aka arunak säna:

“Sión markax mä tawaqjamaw

juma Senaquerib reyit larustam.

Jerusalenax jumar jaltir uñjasax,

sawkasisaw p'iqip khiwi.

22¿Khitirurak ñanqhachta, jisk'acharaktasti?

¿Khititakirak jach'at arsta,

jach'achasiñampi uñkataraktasti?

¡Israelan Qullan Diosapatakiw parltaxa!

23Khithat jaqinakam tuqiw Tatitur jisk'achtaxa.

“Jumax sistawa:

“ ‘Nuwasïwir sarañ walja carronakaxampiw

qullunak patar makhatta,

jan makhatkañ Líbano qulluruw makhatta.

Wali jach'a cedro quqanakap khuchhunukta,

wali suma pino quqanakap khuchhunukta.

Wali amsta qullu patanakaparuw purta,

panqar yapur uñtat ch'uminakaparuw purta.

24Jan uñt'at uraqinakan phujunak p'iysta

uka umat umt'arakta,

kayuxan takt'atapampiw Egipton jawiranakap wañsuyta’ sasa.

25Ukampis Senaquerib,

¿janit yatkäyäta naya Tatitun

taqi ukanak wakt'ayataxsti?

Nayratpach nayax uk amtta,

jichhasti uk nayax luraskta;

ukat jumax uyuchrantat markanak t'unjtaxa,

t'una qutunakaruw tukuyaraktaxa.

26Uka markan jan ch'amani jaqinakapasti,

axsarañampi, p'inqasiñampi phuqhantata,

pampankir ch'uxñanakar uñtatäpxänwa,

ch'uxña quranakar uñtata,

uta patanakan jilir quranakar uñtata,

inti jalsu tuqit jutir thayamp nakhantatäxaraki.

27Nayaw qunt'asitamsa,

mistutamsa, mantatamsa sum yatta;

nayatak q'apisitam yatiraktwa.

28Nayax q'apisirïtama, jach'achasirïtam uñt'smawa,

ukat nasamarux mä argolla uchäma,

lakamarusti mä jakima uchäma,

kawkïr thakhinjamtix jutkta ukanjam kutt'ayarakïma” sasa.

29Isaiasasti Ezequiasarux sänwa:

“Jutir urunakan utjkani ukanakxat

akäniw mä unañchäwixa:

Aka marasa, jutir marasa jumanakax

jupa pachpa achuri trigot manq'apxäta,

kimsïr maransti

yapuchxapxätawa, apthapipxarakïtawa,

uva alinak ayrupxäta,

achunakapat manq'apxarakïta.

30Judá markat jilt'ir jaqinakasti

ayrunakar uñtatäniwa:

saphintapxaniwa, achunïpxarakiniwa.

31Jerusalén markanxa, janiw taqpachan manq'atjam jiwarkaniti;

Sión qullunxa jilt'irinakaw utjaskani.

Uksti taqi ch'aman Tatitun aqkir munasiñapaw lurani” sasa.

32“Tatitux Asiriankir reyipat akham siwa:

‘Senaquerib reyix janiw Jerusalenar mantkaniti,

janiw mä sapa mich'ipsa uka markar antutt'kaniti,

janiw jark'aqasiñamp jutkaniti

janirakiw pirqa muytarus makhatañ lurkaniti.

33Kawkïr thakhinjamtix jutki,

uka thakhinjam kuttawayxani;

janiw aka markar mantankaniti.

Naya, Tatituw uk arsta.

34Nayaw aka markar imaskä, qhispiyarakï,

David luqtirixar munasitax layku,

naya pachpa munasitax laykuraki’ ” sasa.

35Ukatsti uka arumpachaw Tatitun angelapax sarasin asirio ejerciton soldadonakapar jiwarayäna, pataka kimsaqallq tunka phisqan waranqa jaqinaka, qhipärmanthi willjtasti taqiniw jiwarat qhantatipxäna.

36Ukat Asiriankir Senaquerib reyix, markapar kutt'awayxäna, ukatsti, Nínive markan qhiparxäna.

37Ukampis mä uruxa, kunapachatix Senaquerib reyix Nisroc sat diosapan templopan yupaychaskän ukkhawa, Adramélec, Sarézer sat yuqanakapax sarasin jupar jiwayapxäna, jiwayasinsti Ararat sat chiqaruw jaltxapxäna. Uka qhipatsti Esarhadón sat yuqapaw jupa lantix marka apnaqxäna.