JUECES 19 - Qullan Arunaka DC

2. Guibeá markan mä warmir jiwayapxatapa, Benjamín ayllur nuwantapxatapa(19—21)Levitampi, uñt'atapampi

1Israel markan reyix janïr utjkän uka urunakansti, Efraín qullunakan mä levitaw jakäna, jupasti Judá uraqin Belén markankir mä warmimpiw chikäna.

2Uka uñt'atapasti jupampi tuqisiwayasinxa, Belenankir awkipan ukaruw jakir sarxäna. Pusi phaxsi ukankxasinsti,

3levitax jupar thaqhiriw saräna, wasitat jupampïxañapataki. Jupax mä uywatampi, pä asnompi irpäna, uñt'atapasti awkipan utapan sumak katuqt'äna.

4Awkipax kusisiñampiw katuqt'äna, ukatsti jupanakampi qamarañapatakiw achikt'äna. Levitampi, uywatapampix kimsa uruw uñt'atapan awkipan utapan qamarapxäna; ukanwa manq'apxäna, umapxänsa, ikipxarakïnsa,

5ukat pusi urüxipansti wali willjtat sarxañatakix sartasipxäna. Ukampis niya sarxarusipkäna ukkhaw tawaqun awkipax tullqaparux säna:

—Janïra sarkasin mä jisk'a t'ant'say manq'asiwayam, uka ch'amaniw sarxäta —sasa.

6Ukatsti panpachaniw qunt'asis manq'apxäna, umapxäna, ukatsti tawaqun awkipax mä arumampi k'uchik qhiparañapatakiw achikt'äna.

7Levitax sarxarkchïn ukasa, awkch'ipax achikt'asïnwa, ukat jupax qhiparäna.

8Phisqa uru qhipatsti, levitax sarxañatakiw willjtat sartasïna, ukampis tawaqun awkipax wasitat achikt'äna, janïr sarkasin manq'asiwayañapataki uka ch'amani sarxañapataki; ukhamaw panpachani manq'asipxäna, ukchañkamasti jayp'untxänwa.

9Kunapachatix levitax uñt'atapampi, uywatapampi sarxañatak sartxän ukkhaxa, awkch'ipax sarakikïnwa: “Niy jayp'üxiwa, jichha arumampi qhiparapxakim, qharüruw willjtat sarxapxäta” sasa.

10Ukampis levitax janiw uka arumampi qhiparañ munkxänti, jan ukasti uñt'atapampi, uywatapampiw sarawayxäna, ukhamaraki pä karunt'at asnopampi. Kunapachatix Jebús sat Jerusalén markar jak'achasipkän ukkhasti,

11uywatapax levitaruw säna:

—¡Jichha arumax jebuseonakan markapan ikt'awaysna, ukax walïspati! —sasa.

12Ukatsti levitax sänwa:

—Janiwa, janitix israelitanakan markapäkchi ukax janiw ukar sarksnati, Guibeá markar puriñkam saraskakiñani,

13Guibeá chiqana, jan ukax Ramá sat markan ikt'awayañäni —sasa.

14Ukhamaw jank'aki sarapxäna, ukampis intix jalantxäna ukkhaxa, Guibeá chiqaruw puripxäna, ukasti Benjamín ayllun markapänwa.

15Ukhamasti thakhit mistusin Guibeá markan ikt'iriw mantapxäna, levitasti marka plazar sarasin qunt'asïna, janiw khiti qurpacht'iris utjkänti.

16Uka arumax mä awkiw yapu luräwit kutt'anisin uka chiqa saraskäna. Uka awkisti Efraín qullunakankirïnwa, ukawjansti jupax jayankir jaqjamaw jakäna, Guibeá markan jakirinakax Benjamín ayllunkirïpxänwa.

17Uka awkix uka sarir jaqir plazan qunt'atäskir uñjasinxa, sänwa:

—¿Kawkitsa jutta, ukat kawkirus saräta? —sasa.

18Levitasti sänwa:

—Nanakax Judá uraqinkir Belén markat jutasipkta, jichhasti Efraín qullunakat juk'amp jayaruw sarasipkta, ukawjan nayax jakasta. Nayax Belenankaskäyätwa, jichhasti utaruw kutt'askta, akan janiw khitsa nayaru qurpacht'iri jikxatkti.

19Nanakansti, wichhusa, chhuxllanakas asnonakaxatakix utjasipkituwa, t'ant'asa, vinosa warmixataki, uywataxataki, nayatakis utjaskiwa. Janiw kunas pist'apkituti —sasa.

20Awkisti sarakïnwa:

—Walik jutapxtaxa. Nayaw kuntix munapkta ukanak churapxäma. Nayax janiw jumanakan aka arumax aka plazan qhantatipxañam munkti —sasa.

21Uka awkisti utaparuw irpäna, ukansti saririnakax kayunakap jariqt'asiñapkama, manqt'asiñapkama, umt'asiñapkamax, jupax asnonakaruw manq'añ churäna.

22Ukhama kusisitäpkan ukkhawa, markankir jan wali jaqinakax utar muyuntasin punkut liq'intapxäna, ukatsti utani awkirux sapxänwa:

—¡Utamar sart'ir jaqir irpsunim! ¡Nanakax jupamp ikintasiñ munapxta! —sasa.

23Ukampis utanix jupanakaruw achikt'äna:

—¡Jilat masinaka, jan kuna jan walinaksa lurapxamti, aka jaqisti utaxan qurpacht'asiski!

24Nayan mä phuchhaxaw utjitu, jupasti janïraw chacha uñt'kiti. Aka jaqin uñt'atapas akankaskarakiwa, jupanak nayax irpsunï, ukatsti jumanakax kunjämtix munapkta ukham jupanakar lurasipkakim. Ukampis aka jaqirux jan kuna jan walsa lurapxamti —sasa.

25Ukampis uka jaqinakax janiw awkir ist'apkänti, ukat levitax uñt'atap irpsunisin anqaruw khithanuküna, uka jaqinakasti warmirux uka arum paqaraw willjtakam jan wali lurapxäna, ukat khithanukxapxäna.

26Niy willjtanxipansti warmix uka awkin utaparuw kutt'anxäna, kawkhankäntix chachapax ukkharu, uta punku nayraqatar purisinsti, ukkharuw liwnuqtasa jiwxäna.

27Ukampis chachapax willjtat sartasin sarxañatakiw punku jist'aqäna, ukatsti uñt'ataparux punkun liwnuqtat uñjäna, amparanakapas uta punku tuqir luqtanita.

28Ukat jupar säna:

—Sartam sarxañäni —sasa.

Ukampis uñt'atapax janiw arskänti. Ukhamasti jupax jiwat janchip asnopar khumxatasin utaparuw sarxäna.

29Utapar purisasti, uñt'atapan janchip cuchillompiw jisk'a jisk'a tunka payanir kharinuqäna, ukatsti Israel uraqpacharuw apayäna.

30Taqi ukanak uñjirinakasti sapxänwa:

—Israelitanakax Egiptot mistunktan uka urut jichhakamax janipuniw akham uñjirïktanti. Jichhasti akham lurat uñjasax amuyt'añasawa, ukat kuna lurañas wakisispa uka —sasa.