ISAÍAS 8 - Qullan Arunaka DC

Isaías profetan wawapan sutipax may sañ muni

1-2Tatitusti sarakituwa: “Isaías, wakisiw Urías profetampiru, ukhamaraki Zacarías khititix Jeberequiasan yuqapäki ukampir jawsaniñamaxa, jupanakasti kuntix lurkäta ukanak uñjapxani. Jupanak nayraqatan ñiq'it lurat mä jach'a pallallxar jach'a qillqampi akïr suti suma qhan qillqantäta: ‘Maher-salal-hasbaz’ sasa, ukasti sañ muni: ‘T'unjatäñax niyaw jutaski, lunthatanakas niyaw akankxi.’ ”

3Ukat qhiparusti warmixampi nayampix mä yuqall wawanïxapxtwa. Tatitusti sarakituwa: “Uka wawarux Maher-salal-hasbaz sas suticham.

4Janïra uka wawax: ‘Tata, mama’ sañ yatkani ukapachaw Asiriankir reyix Damasco, Samaria markanakarux q'al tukjani, jupasti uka markanakan qamir yänakapampiw qhiparxani.”

5Tatitusti wasitat saskakituwa:

6“Niyakixay aka jaqinakax Resín reyiru,

Pécah reyir axsarasax Siloé chiqan suma jalir umarux jisk'achapxchixa.

7Ukat jichhax Asiria markankir ejercitoruxa,

Judá markar jan walt'ayañapatakiw khithanï.

Kunjämtix Éufrates sat jawiran umanakapaxa

may jilarasax q'al uka thakhinakap jist'antixa,

ukhamaw asirionakax Judá markar nuwantasax q'al tukjapxani.

8Uka uñisir asirionakax Judá uraqkamaw puripxani,

uka umax q'al chhaqtayani,

mä pakar uñtataw thuqxatani,

chhiqhanakap ayatatasaw uka uraqir jalxatani,

Emanuel sat suma uraqirux q'al chhaqtayani.”

9Markanaka, tantacht'asipxam,

mulljatäñamp phuqhantasipxam;

taqi jayankir markanaka, aka arunak ist'apxam:

Nuwasiñatakis wali wakicht'atäsipkäta ukasa,

tukjatakipunïsipkätawa;

jïsa, nuwasiñatakis wali wakicht'atäsipkäta ukasa,

t'unjatakipunïsipkätawa.

10Tatitux jiwasampïskatapatxa,

inamayäniw uka amtäwinakapaxa,

Tatitux janiw munkaniti uk phuqhapxañanakamxa,

inamayaw nuwantañatakis amtasipkäta,

janiw khitis nuwantañar uskuskaniti.

Tatiturukiw axsarañaxa

11Tatitusti taqi ch'amampiw katuntitu, ukatsti aka jaqinakan sarnaqäwinakapan jan sarnaqañaxatakiw iwxt'itu, ukatsti jupanakatakiw mä yatiyäwi churarakitu akham sasa:

12“Jan jumanakax sayt'asiña amtäwinakaw sapxamti, kunjämtix aka markax taqi kunarus sayt'asiña amtäwiwa sapki ukanakaruxa. Jaqinakax wal mulljasipxi kunapachatix reyinakax nuwasiñatak amtapki ukapachaxa. Jumanakasti jan mulljasipxamti, janirak axsarapxamsa.

13Taqi ch'amani Tatit saparukiw Qullan Diosarjam uñjañasaxa, jupa saparukiw jach'achañasaxa, jupan nayraqatapan axsarañasaxa.

14Jan ukhamäkanisti, jupaw jumanakatakix mä sipitar uñtat ch'anqtasiñ qaljamänixa, uka qalasti paypach Israelan markanakaparuw tinkuyani, Jerusalén markan utjirinakarus mä sipitjamarakiw liwisiyani.

15Waljaniw liwisipxani, tinkupxani, jiwarapxarakini, waljaniw uka sipitarux jalt'apxani, uka sipitan katuntataw uñjasipxani.”Isaías profetax yatiqirinakaparuw iwxt'i

16Aka arunaksti sum imapxam;

aka yatichäwinakaxa, iwxanakaxsa,

jan khitinsa uñjkañar imasipxam.

17Tatitux Jacobun markapatak phiñasitäkchi ukasa,

nayax khuyapayasiñaparux iyawsaskakipuntwa,

jupakiw nayan suyt'añaxasa.

18Nayampi, Tatitux churkitu uka wawanakaxampix,

Israel markatak mä muspharkañ chimpüpxtwa,

taqi ch'amani Tatitun uskt'atäpxtwa,

Sión qullun jakir Tatituna.

19Jaqinakasti sapxarakïtamwa:

“Jiwatanakan ajayunakapar jiskt'asipxam,

jisk'at chhiphisisipkir layqa jaqinakar jiskt'asipxam.

¿Janit mä markasti diosanakapar jiskt'askisti,

janirakit jiwatanakarusa, jakirinakxat suma amuyt'äwi arunak mayiskisti,

20ukhamat mä kuna yatiyäwsa katuqañatakisti?” sasa.

Ukhampun arsupxanixa,

uka arsutanakapax

mä luqhi jaqin arsutanakapjamawa.

21Jaqisti uksa aksa sararakini,

t'aqhisiyata, manq'atsa awtjataraki,

manq'atjamasti wali phiñasitäpxaniwa.

Reyiparusa, diosanakaparus

wal ñanqhachapxani.

Taqi tuqi uñtapxani,

22ukampis aynacht'añampi,

t'aqhisiñampik uñjapxani.

Laxa ch'amak taypin jakapxani.