SALMOS 49 - Qullan Arunaka DC

SALMO 49Qullqix janiw kunatakïkisa 1 Coré chachan wawanakapan qillqat q'uchu.

1 1 (2) Taqpach markanaka,

aka arunak ist'apxam,

akapachan jakirinaka,

sum ist'apxam,

2 2 (3) qamir jaqinaka, jan kunan jaqinaka,

aytat jaqinaka, jan yäqat jaqinaka.

3 3 (4) Lakaxax yatiñ kankañampiw arsuni,

arsutaxax wali amuyt'kayäniwa;

4 4 (5) säwi arunak arsü;

arpa toct'asin

kuntix sañ munki uk qhanañchä.

5 5 (6) ¿Kunatarak axsaraskästi

jan wali urunak jutipansti?

¿Kunatarak axsaraskästi

timanakaxan muyuntat jikxatasisasti?

6 6 (7) Jupanakax yänakaparuw chuymap uchapxi,

qamir kankañapat jach'a jach'a tukupxi,

7 7 (8) ukampis janiw khitis jupa pachpax qhispiyaskaspati,

janirakiw qhispiyasiñatakix Diosar qullqi churapkaspati.

8 8 (9) ¡Jaqin jakañapax

janiw qullqimpi alatäkaspati,

9 9 (10) wiñay jakañapataki,

jiwañat qhispiñapataki!

10 10 (11) Uñjatakiwa, taqiniw jiwarapxi,

yatiñaninakasa, pisi chuymaninakas pachpak jiwarapxi,

yänakapasti yaqhanakatakiw qhiparxi.

11 11 (12) Uraqinakapas sutipankaskpan,

amay imäwiw wiñay utjäwipänixa,

¡ukan wiñayatak utjapxani!

12 12 (13) Jaqix janiw wiñay jakirïkiti;

qamirïskpasa, uywanakjam jiwirikiwa.

13 13 (14) Ukhamaw ch'amapar alkatirinakax tukusipxi;

ukhamaw jupa pachpa jach'añchasirinakan tukuyapaxa.

14 14 (15) Uka jaqinakatakix jiwaw awatiripaxa,

ovejanakarjamaw amay imäwirux anakiski.

Willjtankan ukapachasti,

aski jaqinakaw jupanakarux atipjani;

ch'amapax aynacht'aniwa,

utapasti manqhapacharakïniwa.

15 15 (16) Nayarusti Diosaw qhispiyitani,

jiwañan amparapat antutnukuyitani,

jupampi chikaw irpasxarakitani.

16 16 (17) Maynitix qamiriptchi ukaxa, jan mayjt'asimti,

yänakapas jilxatchi ukas janirak llakisimti,

17 17 (18) jiwxan ukapachax janiw kuns apaskaniti,

yänakapax janiw jupampi chiq imantatäkaniti.

18 18 (19) Jakkasax kusisitas sarnaqaskpan,

qamirïtapat jach'ar aptatas uñjasiskpan,

19 19 (20) mä uruw jiwañapax purinini,

janiw mayampsa qhana uñjkaniti.

20 20 (21) Jaqix qamirïskpasa, janiw wiñayatakïkiti,

uywanakjam jiwirikiwa.