OSEAS 11 - Qullan Arunaka DC

Diosax jupatak sayt'asir markaparux munasiwa

1“Israel markax wawäkän ukkhax, nayax munasiyätwa;

juparusti wawaxätapat Egipto markatsa irpsunirakta.

2Kunapachatix nayax juk'ampi jupar jawskäyät ukkhaxa,

juk'ampikiw jupax nayat jayarst'awayi.

Markaxasti k'ari diosanakaruw wilañchanak luqtasïna,

yaqha diosanakarukiw incienso q'aphichäna.

3Ukampis nayaw Israel markarux irpnaqäyäta,

sarnaqañsa yaticharakïyäta;

ukampis jupanakax janiw amuyasipkänti nayan jupanakar uñjaskataxa.

4Suma quña chuymampi,

munasiñampiw naya jak'ar irpkatasta;

ñuñuyañ wawanakäkaspas ukham

ajanuxarux apkatt'asta;

jupanakar manq'ayañatakis wakicht'asiraktwa,

5ukampis jupanakax janiw nayan ukar kuttaniñ munapkiti.

Ukatpï jichhax wasitat Egipto markar kuttapxañapänixa,

Asiria markarakiw jupanakarux apnaqani.

6Markanakapasti espadan tukjatäniwa,

jupanakan pachpa amtatanakapatxa,

sayt'asiñ pirqanakapas tukjatarakïniwa.

7Ukhampachas markaxax nayat jayankañ munaskakiwa;

diosanakarus art'asisipkakiwa,

ukampis janiw khitis jupanakar yanapt'irix utjkiti.

8“Israel, ¿kunjämarak apanukt'asïmasti?

¿Kunjämarak jaytanukt'asïmasti?

¿Admá marka tukjkta ukhamti tukjirisma,

jan ukax, Seboím markarux kuntix lurkta ukhamarakcha luririsma?

¡Chuymaxaw ch'allxtitu,

jumatakisti khuyapayasiñan phuqt'atarakïtwa!

9Janiw phiñasiñaxampix atipayaskäti,

mä jaqit sipansa, nayax Diosätwa,

ukat Israelarux jan tukjkäti.

Nayax jumanak taypin utjasir Qullan Tatitütwa,

janirakiw jumar tukjir jutkti.”

10Jupanakasti Tatituruw arkapxani,

jupasti mä leonjamaw wararini.

Wararitapatsti, jupankirinakax

khathatt'asisaw inti jalanta tuqit jutxapxani.

11“Egiptotsti jamach'inakjamaw khathatt'asis jutxapxani;

Asiriatsti palomanakjamarakiw jutxapxani;

wasitat utanakapan utjasiyxä.

Uksti, naya Tatituw arsta.

Diosan markapan ñanqha luratapa

12 12 (1) “Israel markankirinakax taqi pachan k'arintapxitu;

sallqjapxarakitu.

Judá markankirinakasti Tatitut jithiqtxapxiwa,

jichhasti yaqha diosanakaruw taqi chuyma arkapxaraki.