2 TESALONICENSES QALLTA ARUNAKA - Qullan Arunaka DC
QALLTA ARUNAKAAmuyatatxa, Pablon nayrïr qillqat apayatapaxa, Tesalónica markankir Cristonkirinakarux mulljasiñanak utjayäna, Tatit Criston payïr jutäwipan sinti jak'äxatapjam iyawsapxatap layku. Kunatix 3.6-13 ukan iwxatäkän ukatsa armasipxänwa, yaqhip jilatanakax irnaqäwinakapsa apanukuwayxapxänwa, ukkañkamax Tatitun jutañap suyapxäna, jupanakax mayninakan manq'ayatakiw jakxapxäna. Pablox aka payïr qillqatap jupanakan mayjt'asiñanakap sum qhanañchañataki, chiqachañatakiw qillqäna.Pablox kusisit chuymap uñacht'ayasina, Diosar yuspagarasina, Tesalónica markan Cristor iyawsirinakax iyawsäwinsa, munasiñansa jiltapxatapatxa (1.1-12), akham amuyt'ayaraki, Tatitun taripäwipasa, payïr jutäwipas janïr purinkipana, ñanqha lurañax juk'ampiw akapachan phuqhantani, mä “Ñanqha jaqin sarayata”, uka jaqisti Diosaru, Cristor qallasir jaqinak utjayani. Ukatsti Pablox jupanakarux jan khitis uka ñanqha jaqimpi sallqjayasipxañapatakiw iwxt'i, akham arunakampi: “Tatitun urupax purinxiwa” sasa (2.2).Ukxarusti Pablox aka qillqatan tukuyäwipan kunjämtix Cristor iyawsirinakax jakapxañapäki ukxat iwxt'araki (cap. 3), ukampis nayraqatax jupanakaruw achikt'asïna, jupataki, yanapirinakapatak Diosat mayipxañapataki; chiqa kankañampi irnaqasin jakapxañapatakiw iwxt'arakïna, kunjämtix jupax irnaqirïkän ukhamaru. Pablon uka jach'a iwxapax akhamänwa: “Khititix jan irnaqañ munki ukax janirak manq'kpati” (3.10), sasa.
