DEUTERONOMIO 2 - Qullan Arunaka DC

Israelitanakan walja maranak wasaran sarnaqatapa

1“Ukatsti wasar tuqiruw sarapxtan, Mar Rojo qutar sarki uka thakhinjama, Tatitux nayar siskitu ukhamarjama, Seír qullunak thiyan jaya maranakaw sarnaqtan.

2Tatitusti nayar situwa:

3‘Wali jaya pachaw aka qullunak muyxapxtaxa, jichhasti amsta tuqir sarxapxam.

4Markarusti akham iwxarakim: Jumanakax Esaú chachan wawanakapan uraqip chiqaw sarakipapxäta, jupanakasti Seír chiqan jakapxi, jumanakan wila masinakamawa, jumanakarux axsarapxtamwa, ukampis wal amuyasipxam,

5janirak jumanakax jupanakar nuwantapxamti, nayax janiw mä jisk'a uraqsa uka markat jumanakar churapkämati, uka Seír sat qullunakasti Esaú chachan wawanakapankiwa. Nayaw jupanakar churxta.

6Qullqimpiw manq'añanak jupanakat alasipxäta, umt'apkäta uka umsa alasipxätawa’ sasa.

7Jumanakan Tatit Diosamax taqi luräwinakaman aski waxt'äwinak churapxtam; jupaw aka pusi tunka maranakas jumanakamp chikäski, aka jach'a wasaranjam sarnaqañansa jan kun pist'ayas imapxaraktam.

8“Ukatsti Arabá, Elat, Esión-guéber ukar sarañ thakhipanjam sarxapxtan, wila masinakasan uraqip chiqa sarakipasina, kawkhantix Esaú chachan wawanakapax jakapki uka Seír qullunak chiqa. Ukawjat muytapxaraktan Moab wasara thakhinjam sarañataki.

9Ukapachaw Tatitux sarakitu: ‘Moabita jaqinakar jan axsarayamti, janirak nuwasimsa, jupanakax Lot chachan wawanakapawa; nayasti janirakiw mä jisk'a uraqsa uka markat churkämati. Nayaw jupanakar Ar sat uraqinak churta’ sasa.

10(Uka uraqix nayratpach emita sat jaqinakan jakäwipänwa, jupanakasti jach'a tansa jaqinakänwa, waljanïpxarakïnwa, Anac sat jach'a tansa jaqin wawanakapjam jach'a tansarakïnwa.

11Chiqpachansa jaqinakax refaíta jaqinakat uñt'apxäna, moabitanakax emitanaka sasa sutichapkchïn ukasa.

12Uka Seír uraqinxa, nayrapachax horeo sat jaqinakaw jakapxatayna, ukampis Esaú chachan wawanakapaw jupanakarux tukjatayna, ukat uraqinakapan utjantasipxatayna, kunjämtix Israel markax lurkatayna kawkïr uraqtix Tatitux jupanakar churkatayna ukhama.)

13Tatitusti sänwa: ‘Jichhasti sarantapxam Zéred sat jisk'a jawir makhatapxam’ sasa. Ukatsti ukhamaw jiwasanakax uka jawir makhatapxtan.

14“Kunapachatix Cadés-barnea chiqat mistunipktan, ukat Zéred sat jisk'a jawir makhatapktan uka urkamaxa, kimsa tunka kimsaqallqun maraw mäkipxäna. Ukchañkamasti campamenton jikxatasipkän uka nuwasiñatak wakichat jaqinakax jiwarxapxänwa, Tatitux juramentomp arskatayna uka arsutarjama.

15Tatitun jach'a ch'amapaw jupanakxar purïna taqinir jiwarayasa.

16“Nuwasiñatak wakichat jaqinakax jan mayan jiwarxapxän ukapachasti,

17Tatitux nayarux sitänwa:

18‘Jichhürpachaw Moab uraqin qurpanakap makhatäta, ukatsti Ar sat uraqiruw sararakïta.

19Ukampisa, amonita jaqinakamp jikiskät ukapachaxa, janiw kuns jumax arxayätati, janirakiw nuwasiñ munätasa, jupanakax Lot chachan saraqirinakaparakiwa, janiw nayax uka uraqit kuns churkämati, uka uraq jupanakaruw churxta’ sasa.

20(Uka uraqix refaíta jaqinakan uraqipat uñt'atarakïnwa, nayrapachax refaíta sat jach'a tansa jaqinakaw uka chiqan jakapxarakitayna, jupanakarusti amonita jaqinakax zamzumita sasaw sutichapxäna.

21Uka zamzumita markasti walja jaqinakani jach'a markänwa, jaqinakapas jach'a tansanakänwa, Anac sat jach'a tansa jaqin wawanakapjamänwa, ukampis Tatituw jupanakarux amonita jaqinak tuqi t'unjäna, ukatsti amonitanakaw uka uraqinakanxa utjantasipxäna.

22Kunjämatix Seír uraqin jakir Esaú chachan wawanakapax uka uraqinakan utjantasiñatak horeo sat jaqinakar tukjkatayna ukhama.

23Uka pachparakiw heveo sat markampix lurasïna, jupanakasti jisk'a markanakan jakapxäna Gaza uraq jak'ana, ukatsti Creta uraqit jutir filisteo jaqinakaw jupanakarux tukjäna, uraqinakap katuntasinsti ukan jakapxarakïna.)

24Tatitusti sänwa: ‘¡Jichhasti sarantapxam, uka Arnón jawir makhatapxarakim! Nayaw uka amorreo Sihón sat Hesbón markan reyiparu, ukhamarak markaparusa jumanakar katuyapxäma. ¡Uraqip katuntasipxam, jupanakamp nuwasipxarakim!

25Jichhürut uksarusti taqi markanakaw jumanakatak axsarapxani. Jumanakat parlir ist'asinsti, jupanakax wal khathatipxani, llakisipxarakini’ sasa.

Israelitanakax Sihón reyiruw atipjapxi(Nm 21.21-30)

26“Cademot sat wasaratpach nayax jaqinak khithäyäta, Hesbón markan Sihón reyiparu sumat akham sañapataki:

27‘Uraqim chiqa sarakipt'apxä, nanakax thakhi chiqakiw sarapxä, uraqinakamat yaqha chiqanak jan takt'asaki.

28Qullqiruw manq'añ aljapxitäta, umapkä uka umsa alasipxämawa. Uraqimanjam sarakipt'añak munapxta,

29kunjämtix Seír chiqan jakir Esaú chachan wawanakapasa, Ar chiqan jakir moabita jaqinakas sarakipt'ayapkitu ukhama, Jordán jawir khurkatar makhatañkama, ukhamat kawkïri uraqtix nanakan Tatit Diosaxax churapkitani ukar puriñataki’ sasa.

30“Ukampis Sihón reyix janiw uraqip chiqa sarakipañas munkänti, jumanakan Tatit Diosamaw jan munañapatak uka reyin chuymap mayjt'ayäna, ukhamat jumanakan amparamar katuyañataki, kamisatix jichhürun jikxataski ukhama.

31“Ukat Tatitux nayar situ: ‘Jichhatpach nayax Sihón reyir katuysma, taqi uraqinakapsa katuyaraksma; uraqipar mantam, ukatsti jumatak katuntasim’ sasa.

32“Sihón reyisti taqi ejercitopampiw jiwasamp jikintasir mistunïna, Jahas chiqan nuwasiñataki,

33ukampis jiwasan Tatit Diosasaw amparanakasar katuyistu, ukatsti jupampiru, wawanakapampiru, taqi ejercitopampiruw atipjaraktan.

34Taqpach markanakap katuntasin t'unjaraktanxa; ukatsti chachanakampiru, warminakampiru, wawanakampiruw jiwaraytanxa, janiw maynirus jakayktanti.

35Jiwasanakatakisti uywanakampi, jila alan jilt'ir yänakampik uka atipjat markanakat katustanxa.

36Janiw kawkïri markas jiwasan amparanakasat jaltirjamäkänti; Tatit Diosasaw taqi aka markanak amparasar katuyistu, Arnón jawir thiyankir Aroer sat markat qalltasa, qhirwa chinqankir marka, Galaad uraqkama.

37Ukat sipansa kawkïr uraqinaktix jan katuntkäyätan ukanakax akanakänwa: Amonitanakan uraqipa, Jaboc jawir tuqinkir taqi uka uraqinaka, qullunakankir markanaka, ukhamarak taqi kawkïri uraqinaktix Tatitu Diosax ‘Janiw nuwantapxätati’ siskäna uka uraqinaka.