2 CRÓNICAS 34 - Qullan Arunaka DC

Josías reyin Judá marka apnaqatapa(2 R 22.1-2)

1Josías reyix kimsaqallqu maranïkän ukkhaw Judá marka apnaqañ qalltäna, jupasti Jerusalenan kimsa tunka mayan maraw marka apnaqäna.

2Josías reyin luratanakapax Tatitun nayraqatapan chiqapänwa, jupax David nayra awkipan sarnaqäwiparuw arkäna, jan kawksarus saranukusa.

Josías reyin q'umachayatapa

3Kimsaqallq mara marka apnaqkän ukkhasti, waynäkasawa Josías reyix David nayra awkipan Diosaparu thaqtañ qalltäna. Tunka payan mara marka apnaqkän ukkhasti, jupax Judá, Jerusalén markanakaruw q'umachäna, qullu amstan utjir yaqha diosanakar yupaychañ utanakap apaqayasa, ukhamarak Astarté diosan uñtasitanakapa, idolonakapa, ninamp umatatayas lurat diosanakap apaqayasa,

4jupan uñjkataw Baal diosan kunayman uñtasitanakapar lurat altaranakap tukjapxäna. Ukxarusti Josías reyix uka patxan utjiri, incienso nakhayañ altaranak t'unjayäna. Ukhamarak Astarté diosan uñtasitanakapsa, yaqha diosanaksa, ninamp umatatayas lurat diosanaksa jisk'a jisk'a tukjayäna; taqi ukanak laq'aruw tukuyäna, ukatsti khitinakatix wilañchanak luqtapkatayna ukanakan amay imäwipxaruw willxatapxäna.

5Sacerdotenakan ch'akhanakapsti uka altaranak patxaruw nakhantayäna, ukham lurasaw Judá uraqimpiru, Jerusalén markampirux q'umachäna.

6Uka pachparak Manasés, Efraín, Simeón, Neftalí uka markanakan plazanakapansa luräna.

7Altaranaksa, Astarté diosan uñtasitanakapsa, yaqha diosanaksa laq'aruw tukuyäna, Israel uraqpachan incienso nakhayañatak lurat taqi altaranak tukjäna. Ukatsti Jerusalenaruw kutt'anxäna.Diosan kamachi qillqat jikxatapxatapa(2 R 22.3—23.3)

8Tunka kimsaqallqun mara marka apnaqkän ukkhaxa, markampi, Tatitun utapampi q'umachasinxa, Josías reyix Asalías chachan Safán yuqaparu, markan jilïripa Amasías sat chacharu, Joacaz chachan yuqapa Joah qillqiriruw Tatit Diosapan utap askichapxañapatak wayt'äna.

9Jupanakasti Hilquías jilïr sacerdoten ukaruw sarapxäna, ukatsti Tatitun utapan utjkäna uka qullqi jupar katuyxapxäna, ukasti kawkïr qullqinaktix punku uñjir levitanakax Manasés, Efraín, Benjamín ayllunkirinakata, ukhamaraki Judá, Jerusalén markanakan utjir jaqinak taypita, ukat ukxar utjir israelita uraqinakat apthapipkatayna uka qullqïnwa.

10Ukatsti uka qullqix Tatitun utap askichayañan sarayirinakäpki ukanakaruw katuyapxäna, jupanakan khitinakatix Tatitun utap askichapki ukanakar luratapat churapxañapataki.

11Uka qullqsti lawat yänak luririnakaru, utachirinakaruw churapxäna, jupanakan ch'iyat qalanaka, jaqthapiñ lawanaka, q'iru lawanak alanipxañapataki. Tatitun utapax t'unjatänwa, Judá markankir reyinakax janiw yäqapkataynati uka layku.

12-13Uka chachanakasti lurañanakap sum phuqhapxäna, jupanakar sarayirinakasti Jáhat, Abdías levitanakänwa, Merarí chachat saraqirinaka, ukatsti Zacarías, Mesulam, jupanakasti Quehat chachat saraqirinakänwa. Jupanakax q'ipnaqirinakaru uñjañatak uchatäpxänwa, ukatsti taqpach irnaqirinakaruw sarayapxäna. Taqi levita jaqinakasti musiconakäpxänwa, mayninakax qillqirinaka, arsutanak phuqhayirinaka, jan ukax punku uñjirinaka.

14Kunapachatix Tatitun utaparu uchat qullqinak apsupkän ukkhasti, Hilquías jilïr sacerdotex Tatitun kamachipani, Moisés tuqi churatäkän uka qillqat jikxatäna.

15Ukat ukspachaw Safán sat qillqirirux yatiyäna, kamachin qillqata Tatitun utapan jikxatatapata; ukatsti Safán chacharuw uka qillqata katuyxäna,

16jupasti reyin ukaruw apäna, ukatsti uka tuqit yatiyarakïna, akham sasa:

—Juma reyin luqtirinakamax kuntix lurapxañapataki churatäki ukanakxa lurasipkiwa.

17Tatitun utapan utjkatayna uka qullqinak ninampiw umatatayapxi, ukatsti jupanakax lurañanak sarayapki, ukhamaraki lurañanak katuyatäpki ukanakaruw ukanak katuyapxi —sasa.

18Safán chachasti reyirux kawkïr qillqattix Hilquías sacerdotex jupar churkatayna ukxat yatiyarakïna; ukatsti jupax reyitakiw uka qillqatat ullart'arapïna.

19Reyisti kamachinakan qillqat arunak ist'asax, isip ch'iyanuqasïna,

20ukat ukspachaw Hilquías jilïr sacerdoteru, Safán chachan Ahicam yuqaparu, Micaías chachan Abdón yuqaparu, Safán sat qillqiriru, reyin Asaías jilïr yanapiriparux akham säna:

21—Sarapxam, Tatitur nayatak jiskt'arapipxita, ukhamarak Israel markana, Judá uraqina jilt'iri jaqinakataki, jikxataski uka qillqatan kamsañtix munki uk yatiñataki; Tatitux jiwasanakataki wali q'apisitäpachawa, nayra awkinakasax janiw Tatitun arunakaparux ist'apkänti, janirakiw aka qillqatan arunakaparjamas sarnaqapkänti.

22Hilquías jilïr sacerdotempi, jupamp chika ajllita chachanakampix Huldá sat profetisa warmin ukaruw sarapxäna, jupax Ticvá chachan Salum yuqapan warmipänwa, Tatitun utapan isinak uñjir Harhás chachan allchhiparakïnwa. Huldá warmix Jerusalenan jakäna, payïr tama utanak taypina, kunapachatix jupar parlxayapkän ukkhaxa,

23jupax akham säna:

—Israelan Tatit Diosapax akham siwa: ‘Khititix jiskt'iri khithanipktam ukarux akham sapxam,

24naya Tatituw sista: Nayax aka chiqampiru, jaqinakapampirux mä jan walt'añ apayanï, kunjämtix Judá markankir reyin nayraqatapan ullart'apkta uka qillqatan ñanqhachäwinakax qillqatäki ukhamarjama.

25Nayat armasipxituwa, yaqha diosanakaruw inciensonak nakt'ayapxi, uka luratanakapampi nayar q'apisiyasa; ukat q'apisiñaxax aka chiqatak nakti, ukasti janiw jiwt'kaniti.

26Ukhamasti Judá markankir reyirux sapxam, Tatitur jiskt'ir khithanipktam ukaru, Israelan Tatit Diosapax sarakiwa: Kuntix ist'kta uka arunakar yäqatamata,

27aka chiqataki, ukhamarak jaqinakap tuqi arsutaxa ist'asin chuymam ch'allxtayasitamata, nayatak jisk'ar tukutamata, isinakam ch'iyanuqasitamata, nayan nayraqataxan jachatamatxa, nayax jumar ist'smawa. Naya, Tatituw sisma.

28Nayax nayra awkinakamampi jikisxañamataki suman jiwxañam wakichä, kuna jan walt'añanaktix aka chiqaru, jaqinakapxarus apayankä ukanak janiw uñjkätati’ —sasa.

Reyin khithatanakapasti aka arunak jupar yatiyxañatakiw kutt'xapxäna.

29Ukatsti reyix Judá uraqinkiri, Jerusalenankir taqi jilïrinakar jawsayiriw khithäna, jupanakan tantacht'asipxañapataki.

30Ukatsti reyisa, Judá uraqinkir jaqinakasa, Jerusalenankirinakasa, sacerdotenakasa, levitanakasa markpachaw jisk'at jach'akam Tatitun utaparux sarapxäna. Ukan reyix wali jach'at ullart'äna kawkïr arust'äwi qillqatatix Tatitun utapan jikxatasitayna, ukat taqi kunanaktix uka qillqatan siski ukanaka.

31Ukatsti reyix pilärap jak'aruw sayt'asïna, ukat Tatit nayraqatan jupar jaysañatak arsüna, kamachi arunakaparjama, arsutanakaparjam taqi chuymampi sarnaqañataki, qillqatäki uka suma arust'äwi arunakar phuqhañataki.

32Ukatsti reyix Jerusalenankiri taqi jaqinakaparu, Benjamín uraqinkirinakaru, khitinakatix ukan jikxatasipkän ukanakarux, nayra awkinakapan Diosapampi arust'äwi lurata arunakar phuqhapxañapatakiw arsuyäna, Jerusalenankir jaqinakasti phuqhapxänwa.

33Josías reyix israelitanakan taqpach uraqinakapat kuna axtkañ luräwinakatix utjkäna ukanak q'al chhaqtayäna, Israelan utjiri jaqinakaparusti Tatit Diosaparuw yupaychayarakïna. Jupan jakañapkamax janiw nayra awkinakapan Tatit Diosapat saraqapkänti.