SALMOS 41 - Qullan Arunaka DC

SALMO 41Usut jaqin mayisitapa 1 Davidan q'uchupa.

1 1 (2) Jan kunan jaqimpiru,

pisi ch'aman jaqimpir uñjir jaqix kusisiñaniwa;

Tatituw jan walt'añ urunakan juparux qhispiyani.

2 2 (3) Tatituw juparux imaskani,

jupaw akapachan jakayani, kusisiñ churarakini,

janiw uñisirinakapan munañapar katuykaniti.

3 3 (4) Tatituw usuntäwipan ch'am churani,

¡uka usupsti juyartayaniwa!

4 4 (5) Nayax jupar sistwa:

“Tatay, nayat khuyapt'ayasita,

juch lurkta ukasa, k'umaracht'asita” sasa.

5 5 (6) Uñisirinakaxax juk'ampi aynacht'añax muni:

“Jiwxpan, sutipasti chhaqtpan” sapxiwa.

6 6 (7) Nayar tumpir jutapki ukkhasti,

jan wali arunakak apanipxi;

sarxapxi ukkhasti

nayxat parlasakiw misttawayxapxi.

7 7 (8) Uñisirinakax tantachasisin

mayar tukt'asakiw nayatak achusipxi;

juchaxatsa t'aqhiskirista ukham amuyapxi,

8 8 (9) ukat sapxi:

“Jan qullkay ñanqha usuniwa,

jan mayampi sartañatakiw ikinti” sasa.

9 9 (10) Nayan munat masixamppacha,

khitirutix alkataskäyät ukamppacha,

khititix nayamp manq'kän ukamppachaw

nayarux ch'uxña luritu.

10 10 (11) Tatay, nayat khuyapt'ayasita;

usuxat k'umaraptayita,

ukat jupanakat phuqsusï.

11 11 (12) Uñisirixax jan atipjkitan ukapachaw yatï,

juman nayar munasiskatama.

12 12 (13) Nayarusti chiqap sarnaqataxatxa,

amparamampi waythapt'ita,

nayraqataman wiñay jakayarakita.

13 13 (14) ¡Israelan Tatit Diosapax jach'añchatäpan,

jichhasa, wiñayan wiñayapansa!

¡Ukhamäpan!