ESTER 3 - Qullan Arunaka DC

II. JUDIONAKATAKI JAN WALT'AÑANAK JUTATAPA(3—5)Mardoqueompi, Amán chachampi

1Ukat mä qawqha urunakatsti, Asuero reyix Hamedata chachan Amán yuqaparuw marka apnaqañapatak jilïrit utt'ayäna, jupax Agag chachat saraqirïnwa.

2Reyin utapan luqtirinakasti reyin arsutap phuqhañatakix Amán chachan nayraqatapan killt'asipxäna, p'iqinakapsa alt'apxarakïnwa, reyiw ukham lurapxañapatak arsüna; ukampis Mardoqueo chachax janiw uka arsutarux jaysañ munkänti.

3Ukham uñjasinsti reyin taqi luqtirinakapax Mardoqueoruw jiskt'apxäna: “¿Kunats reyin arsutaparux jan jaysañ munkta?” sasa.

4Sapürus ukak juparux jiskhisipkäna, Mardoqueosti janiw jupanakarux yäqkänti. Ukat Amán chacharu yatiyir sarapxäna, Mardoqueox judío jaqïtap arsuniti janicha uk yatiñataki, ukampis Mardoqueox niyaw judío jaqïtap jupanakarux yatiyxatayna.

5Amán chachasti Mardoqueon jupataki jan killt'asitapa, p'iqsa jan alt'atapa yatisax walpun phiñasïna.

6Mardoqueon judiötap yatisaxa, janiw juparuki mutuyañ amtkänti; jan ukasti, Asuero reyin jach'a markapan jakapkäna uka judío jaqinakar kunjämatsa q'ala tukjaspa uk lup'ïna.

Judío jaqinakar tukjañatak kamachi mistutapa

7Mara qallta Nisán sat phaxsina, kunapachatix Asuero reyix tunka payan mara markap apnaqkäna ukkhawa, Amán chachan nayraqatapan suerte jaqupxäna; kuna urusa, kuna phaxsis jupan amtäwipax phuqhasispa uk yatiñataki. Suerte jaqtatasti Adar sata tunka payïri phaxsina, tunka kimsan uru saraqatar phuqhasiñapaw jaqstäna.

8Ukatsti Amán chachax Asuero reyir akham säna:

—Jach'a munañan rey, apnaqäwiman utjir suyunakam taypinxa, yaqhaqtat mä markaw utji, kamachinakapas yaqha markanakat sipan mayjawa, juman arsutamarux janiw phuqhañ munapkiti. Jach'a munañan rey, markam taypin uka markan jakañapax janiw kunatakis askïkiti.

9Ukhamasti, juma reyitakitix walikïchispa ukaxa, uka markan tukjatäñapatak mä kamachi utjayam, nayasti, qullqixat kimsa patak kimsa tunkan waranqa kilo qullqi markan qullqip apnaqirinakarux churä —sasa.

10Ukatsti reyix amparapat surtijap apsusisin judionakar uñisir Amán chacharuw churäna,

11akham sasa:

—Qullqimax jumatakïskpan, uka markankirinakampisti, kunjämarutix lurañ munkta, ukham luraskakim —sasa.

12Mara qallta phaxsina tunka kimsani uru saraqatarusti reyix qillqirinakaparuw jawsayäna, Amán chachan arsutanakap qillqapxañapataki, ukatsti yanapirinakaparu, suyunak apnaqirinakaparu, taqi markan jilïrinakapar uk apayapxañapataki. Uka qillqatanakasti sapa suyunakan utjir markanakan arupatkam qillqatänwa, Asuero reyin sutipamp qillqxatata, surtijapamp limxatataraki,

13ukatsti, reyin taqpach suyunakaparuw apayapxäna. Uka qillqatansti yatiyänwa: judío waynanakaru, awkinakaru, wawanakaru, warminakaru mä urunaki taqpach jiwarayañataki, jiwarayasinsti yänakap katuntasiñataki. Uka urusti Adar sata tunka payan phaxsina, tunka kimsani urünwa.

14Uka kamachisti taqpach suyunakan utjir markanakan yatiyasïna, ukhamat markachirinakan ukürutak wakicht'atäpxañapataki.

15Qillqat apirinakasti jank'akiw reyir jaysasax apapxäna. Uka kamachix Susa markansa yatisirakïnwa, uk yatisasti, Susa markankirinakax mayjt'asipxänwa. Ukchañkamasti reyimpi Amán chachampix machañatakiw qunt'asipxäna.