PROVERBIOS 10 - Qullan Arunaka DC

III. PAYÏR CHHIJLLATA: “SALOMONAN SÄWI ARUNAKAPA”(Caps. 10.1—22.16)Salomonan säwi arunakapa

1Salomonan säwi arunakapa:

Amuyt'asir wawax, awkipar taykaparuw kusisiyi,

jan amuyt'asir wawasti jupanakarux llakisiyiwa.

2Jan wali tuqit jikxatat qamir yänakax janiw askïkiti,

chiqapat jikxatat yänakasti jiwañat qhispiyi.

3Tatitux suma jaqirux janiw manq'at t'aqhisiykiti,

ñanqha lurir jaqirusti manq'at awtjayasiñap janiw apaqkiti.

4Juk'a irnaqir jaqix jan kunaniw jaki,

wali irnaqir jaqisti qamiriptiwa.

5Wakisitapar yapu apthapirix amuyt'asir jaqiwa,

yapu apthapi urunakan ikir jaqisti, p'inqachatäniwa.

6Aski jaqirux Tatituw aski waxt'äwinakapamp phuqt'i,

ñanqha jaqirusti, jan wali luräwinakapaw aynacht'ayi.

7Aski jaqix suma amtatäniwa;

ñanqha jaqirusti mäkiw armatäxi.

8Yatiñan jaqix arsüwinakar jaysiwa;

jan amuyt'asis parlir jaqisti aynacht'añaruw puri.

9Jan kuna manunïki uka jaqixa, janiw kunarus axsarkiti;

jan wal sarnaqir jaqisti, jan waliw tukusiraki.

10Jan wali amtampi nayra ch'irmt'ir jaqixa,

jach'a jan walt'añanak utjayi;

jan wali parlir jaqisti, aynacht'añaruw puri.

11Aski jaqin arunakapax jakañ churir arunakawa,

ñanqha lurir jaqirusti jan wali luräwinakaw aynacht'ayi.

12Uñisisiñax ch'axwanak utjayi,

munasiñasti taqi juchanak pampachi.

13Yatiñan jaqin lakapanxa, yatiñ kankañaw utji;

lawamp jawq'añasti jan amuyt'asir jaqin jikhanipatakiwa.

14Yatiñan jaqinakax wali amuyt'ampiw parli,

jan amuyt'asir jaqinakan parlatapasti, jan walt'añanak utjayi.

15Qamir jaqirux qamir yänakapaw arxati;

jan utjirin jaqirusti, janiw kuna arxatiripas utjkiti.

16Aski jaqin katuqäwipax jakañawa;

ñanqha jaqin katuqäwipasti jucha lurañakiwa.

17Chiqachäwi arunak jaysir jaqix, jakañ thakhinjam saraski;

jan jaysasiristi, chhaqhañ thakhiruw saraski.

18K'arisir jaqinakax janiw uñisisiñ chuymap uñacht'ayapkiti;

pisi chuyman jaqinakasti, taqi kun parlapxi.

19Sinti parlir jaqixa,

sinti parlatap laykuw pantjasi;

amukt'añ yatiñasti, yatiñ kankañankiwa.

20Aski jaqin arunakapax q'umachat qullqir uñtatawa,

ñanqha jaqin amuyupasti jan kunatakiwa.

21Aski jaqin arunakapax waljaninakaruw yatichi,

jan yatiñan jaqisti jan amuyt'asirïtap laykuw jiwi.

22Tatitun aski churäwipax qamir kankañawa;

janiw kuna llakisiñas ukamp chik jutkiti.

23Jan amuyt'asir jaqix jan walinak lurasax kusisiwa;

yatiñan jaqisti, yatiñ kankañat kusisi.

24Ñanqha lurir jaqitakix axsarki ukaw utjarapi,

aski jaqitakisti amtatanakapax phuqhasirapiwa.

25Jach'a tutukax mäkiw sarakipi, ñanqha jaqisti mäkiw chhaqtawayxi,

aski jaqikiw wiñayatak jakaski.

26Jayra jaqix khithasiripatakix

laka ch'akhar jan walt'ayir vinagrer uñtatawa,

jan ukax nayrar ch'isiyir jiwq'ir uñtatawa.

27Tatitur axsartas jakañax, jaya maranak jakañ utjayi,

ñanqha lurir jaqinakan jakañaparusti juk'aptayiwa.

28Aski jaqinakarux kusisiñaw suyt'aski,

ñanqha jaqinakarusti, aynacht'añaw suyt'askaraki.

29Aski luririnakarux Tatitux imiwa,

jan wal luririnakarusti tukjiwa.

30Aski jaqix janipuniw aynacht'añar purkaniti,

ñanqha jaqisti janiw uraqin jaya pacha jakkaniti.

31Aski jaqin lakapat yatiñ kankañax mistsu,

ñanqha lurir jaqirusti laxrap khariqapxani.

32Aski jaqix suma arunak arsu;

qhuru jaqisti jan wali arunakak parli.