DEUTERONOMIO 33 - Qullan Arunaka DC

Moisesan Israel ayllunkirinakatak aski arunak arsutapa

1Moisesax Diosar luqtir mä jach'a profetänwa. Janïra jiwkasin jupax israelitanakar aski arunak arsüna,

2akham sasa:

“Tatit Diosasax Sinaí qullut juti;

qhanapax Edom chiqatpach qhant'anistu.

Jupan k'ajatapax Parán qullunakatpach jutanti,

Meribá chiqakamaw puri, Cadés uraqina.

Kupi amparapar aqkir kamachinak apt'asita.

3Tatitux markapar munasiwa,

Diosax jupankirinakarux imarakiwa;

jupanakan jaysasirïpxatapata,

arunakapsa kusisiñamp phuqhirïpxatapata.

4Naya Moisesax Diosan kamachip churapxsma,

ukasti jumanakatakix juk'amp munatawa.

5Jumanakampi,

markan jilïrinakamampixa,

Diosarux reyimat uñt'asipxtaxa” sasa.

6Ukatsti, Moisesax Rubén aylluruw sarakïna:

“Jumanakax juk'anikïpxtawa,

ukampis wiñayaw jakapxäta!” sasa.

7Judá ayllurusti sarakïnwa:

“Tatay, Judá ayllunkirinakan mayisitanakap ist'am;

markapamp tantachasiyxam.

Ch'amamp arxatam,

uñisirinakapar atipt'añ yanapt'arakim” sasa.

8-9Leví ayllurusti sarakïnwa:

“Diosax israelitanakampiw tuqisïna

Masá chiqan jupanakar yant'arakïna,

Meribá sat uma jalsu thiyana.

Ukampis jupax iyawsañampiw uñjapxtam

jupar jaysapxatamata,

arust'äwip phuqhas sarnaqapxatamata,

awkinakamaru, jilanakamaru,

wawanakamar ist'añat sipana.

Ukat Tatitux jumanakar

Urim, Tumim katuyapxtam,

jupan sacerdotenakap utt'ayapxaraktam.

10Jumanakaw markamarux

kamachi arunakap phuqhañ yatichapxtaxa;

Diosan altarapxansti,

kunayman waxt'anak luqtapxtaxa.

11Dios Tatituy jumanakar aski waxt'äwinak churpan,

kusisiñampirak ch'ama luratanakamsa katuqpan.

Uñisirinakamar taqinir tukjpan,

jan mayampitak sartañapataki” sasa.

12Benjamín ayllurux sarakïnwa:

“Diosax munastamwa, imaraktamwa;

Diosax wiñayaw qullunakam taypin jakani!” sasa.

13José ayllurusti sänwa:

“Diosax aski waxt'äwinak uraqimar churpan,

alaxpacha suma sullampi,

uraqi manqhit jalsur umanakampi;

14maran achur suma achunakapampi

phaxsinakan achur suma achunakapampi;

15jach'a qullunakan suma achunakapampi,

jisk'a qullunakan suma achunakapampi,

16uraqir phuqhantir suma achunakapampi

ch'aphi taypin uñstir Diosan khuyapayasiñapampi.

Taqi uka waxt'anakax jumatakïpan

jilanakam taypit ajllitätamata.

17Efraín, Manasés wawanakaman jaqinakapaxa,

jach'a ch'amanïpxiwa,

urqu vacanakar uñtata,

bufalonakar uñtata.

Lanzanakapampiw t'unjapxani

uraq tukusinkir uñisirinakaparusa” sasa.

18Zabulón aylluru, Isacar ayllurusti sarakïnwa:

“Zabulón, taqi chiqar alakip lurir saratamat kusisim,

jumasti Isacar, chhujllanakaman kusisirakim.

19Jach'a qutampita, quta lakapampita

suma qamir yänak apsupxäta.

Jak'ankir markanakaruw jawsthapipxäta,

qullumaruw makhatanipxani,

ukansti waxt'anak Tatitur luqtapxani” sasa.

20-21Gad ayllurusti sarakïnwa:

“¡Diosax jach'añchatäpan,

jach'a uraqinak jumar churatapata!

¡Leonar uñtataw katuntañatak suyxattaxa!

Jumax suma uraqinak kattaxa,

Tatitur taqi kunan jaysatamata,

chiqa kankañamp Israel markan uñjatamata” sasa.

22Dan ayllurusti sarakïnwa:

“Jumax leonan qallupar uñtatätawa,

Basán uraqitpach thuqtaniri” sasa.

23Neftalí ayllurux sarakïnwa:

“Taqi kuna luratamax Tatiturux kusisiyiwa.

Ukat Tatitux askinakapamp phuqt'ätam

mä jach'a uraqi churarakïtam,

Galilea qutat aynach thiyakama” sasa.

24Aser ayllurux sarakïnwa:

“Diosax aski waxt'äwinakap jumar churpan

maynïr ayllunakat sipana.

Taqpach israelita jaqinakax

munasiñap jumar uñacht'ayapxpan.

Oliva quqat apsut aceitemas jilarkir utjpan;

25jakañamkamasti,

ch'aman markäyätawa,

markanakaman punkunakapas

hierrota, broncet luratäniwa” sasa.

26Tukuyañatakisti Moisesax sänwa:

“Israelitanaka,

janiw yaqha Diosax utjkiti, jumanakan Diosamjamaxa

Diosax alaxpachan reyipawa,

jumar yanapirix jutapuniniwa.

27Diosax wiñay jakir Diosawa,

jumarux imaskapunïtamwa;

jupaw juma nayräxat uñisirimarus jaltayani,

juman jupanakar t'unjañamataki.

28Israel, jan axsarasaw jakxäta,

samarañan jakxarakïta.

Janipuniw manq'añamax pist'kätamti,

Tatituw yapunakam qarpaskani.

29Israel marka, kusisim;

Tatit Diosam kipkaw qhispiytam,

jupaw imasktam, yanapaskaraktam.

¡Jupaw atipt'ayir arxatirimaxa!

Jumaw uñisirinakamarux jisk'achjäta,

kayumampiw takxatarakïta” sasa.