ÉXODO 23 - Qullan Arunaka DC

Chiqapar uñjañatak kamachinaka

1“Janiw k'ari arunak parlätati, janirak k'ari arunak parlir jaqirus arxatasin yanapt'amti.

2“Janiw jaqinakar waljanïtap layku, ñanqha luratanakapar arkätati.

“Mä taripäwin arsuñam utjchi ukaxa, janiw mayninakan waljanïtap layku jupanakjam parlätati, chiqapäkis uk arsüta;

3ukampis janirak mä jan utjirin jaqir yanapañatak k'arisimti, jupan jan utjirin jaqïtap layku.

4“Jumar uñisir jaqin chhaqhat vacapsa, jan ukax asnopsa jikxatasma ukaxa, irparapxätawa.

5Uñisirimar yanapt'añ janiw armasïtati; asnoparutix jathi khumumpi tinkuyat uñjäta ukaxa, janiw jumax ukhamak uñchukïtati; khumup apaqt'añ yanapt'ätawa.

6“Jan utjirin jaqin ch'axwapan chiqapat arsusitap janiw maysar q'iwïtati.

7“K'ari irkatañanakat jithiqtätawa, jan juchan aski jaqir k'arimp jiwayatäñatak janirak juchañchamti; nayax janiw juchan jaqirux janis juchanïkaspa ukham uñjkäti.

8“Qullqi chilltatax janipuniw katuqasïtati, uka qullqix amuyt'asir jaqinakaruw juykhuptayi; ukatsti jan juchaninakax juchañchataw uñjasipxi.

9“Yaqha markankir jaqir janiw t'aqhisiyätati, jumanakasti Egipton yaqha markankir jaqinakäpxäyätawa, kunjämäkitix yaqha markan jakañax uk jumanakax yatxapxtawa.Samarañxat kamachinaka

10“Suxta maraw yapunakam yapuchäta, juyranakamsa apthapirakïta.

11Ukampis paqallqüri maranxa janiw yapuchkätati, uraq samarayätawa, ukhamat markamankir jan utjirin jaqinakasa, pampa animalanakas yapun jilt'ki ukanak manq'asiñapataki. Uka pachparak luräta uva yapunakamampi, olivo quqanakampi.

12“Suxta uruw taqi lurañanakam luräta, paqallqüri urusti samarätawa, ukhamata vacamasa, asnomasa samarañapataki; ukatsti uywatamasa, yaqha markankir jaqis ch'ama katxatañapataki.

13“Taqi aka kamachinak phuqhapxam, ukatsti janipun yaqha diosanakar yanap mayipxamti; sutipsa aytasipxamti.

Kimsa jach'a urunaka(Ex 34.18-26; Dt 16.1-17)

14“Nayar jach'añchañatakisti maran kimsa kutiw uruyañ uru luräta.

15Jan levaduran t'ant'a manq'añ uru uruyäta, arsutaxarjamasti paqallq uruw jan levaduran t'ant'a manq'äta. Abib sat phaxsin luräta, uka phaxsin Egiptot mistunitam layku. Ukampis uka uruyäwirux janiw khitis ukhamak jan kun apanis nayar uñstir jutañapäkiti.

16“Yapu apthapiñ uru uruyäta, yapunakamat nayrïr achunak apthapkät ukapacha. Ukxarusti mara tukusiruw uruyarakïta, jumax yapunakam taqpach apthapiñ tukuykät ukapacha.

17“Taqpach chachanakaw Tatitun nayraqatapan maran kimsa kuti uñstapxani.

18“Uywa wilañcha luqtkitäta ukapachasti, janiw wilapxa levaduran t'ant'amp chik luqtitätati, janirakiw lik'ipsa qhipärmanthitak imätati.

19“Yapuman nayrïr suma achunakapsti Tatit Diosaman utaparuw apäta.

“Janiw cabrito aychxa taykapan lechepar qhathiyapxätati.”

Diosan angelapa

20Tatitux jupanakar sarakïnwa:

“Nayaw angelaxar nayraqatam sarañapatak khithanïma, jupaw thakhin imätam, kawkha uraqtix wakicharapksma ukkhar irparakïtam.

21Janiw jupat saraqätati, juparuw jaysäta, janiw jupatak sayt'asïtati, janiw jumanakan juchanakam pampachkaniti, jupax nayan sutixaruw taqi kuns luri.

22Jumatix chiqpachapun jupar jaysäta, ukatsti nayan arsutaxarjam taqi kuns lurarakïta ukaxa, nayax uñisirinakaman uñisiripäyäwa, jumar jan munirinakarux janiw munkarakïti.

23Nayan angelaxaw jumat nayra sarani, ukatsti jupaw irpätam amorreonakana, hititanakana, ferezeonakana, cananeonakana, heveonakana, jebuseonakan uraqinakaparu, nayasti jupanakarux tukjäwa.

24Janiw uka markanakan jan wali luratanakap jumax lurarakïtati. Janiw diosanakap nayraqatan killt'asïtati, janirakiw yupaychätasa; jan ukasti, uka diosanakapsa, qullan qalanakapsa q'alpun tukjäta.

25Tatit Diosamaruw yupaychäta, jupasti t'ant'amaru, umamaruw aski waxt'äwimp phuqt'ani.

“Nayaw taqi usunak jumat apaqäma.

26Janiw wawa usuchjasir warmix markaman utjkaniti, janirakiw jan wawachir warmisa utjkaniti. Nayaw jaya maranak jakañ churäma.

27“Kawkha markanakarutix takt'käta ukansti, juman uñisirinakamarux axsarañampi, jach'a llakisiñamp apayanï, axsarañatsa juma nayraqatat jaltxapxaniwa.

28Juman nayraqatamsti avispa mich'isir chhichhillankhanak khithä, ukaw heveonakaru, cananeonakaru, heteonakar alisnukuni.

29Ukampisa, janiw uka jaqinakar mä maranak alisnukkäti, jan ch'usa wasar uraqir tukuskañapataki, janirak pampa animalanakas jumar jan wal lurañatak mirantaskañapataki.

30Jan ukasti juk'at juk'at jupanakarux alisnukü, juman walja wawanïñamkama, ukat uraqi katuntasiñataki.

31Uraqiman qurpanakapax akhamäniwa: Mar Rojo qutata, Mar Mediterráneo jach'a qutkama, ukatsti wasarata Éufrates sat jawirkama. Nayaw uka uraqinakan jakir jaqinakarux amparamar katuyäma, jumasti nayraqatamat jupanakar alisnuküta.

32“Janiw jumax jupanakampisa, diosanakapampis kuna arust'äwirus mantätati,

33janirakiw jupanakarux markam taypin jakayätati, jupanakax nayar jan walt'ayañatak jucha lurayapxiristam. Jumasti diosanakapar yupaychiriw tukusma, ukasti chhaqhañaruw puriyiristam.”