ISAÍAS 62 - Qullan Arunaka DC

1Jerusalén markankirinaka,

jumanakar munatax laykux

janiw amukt'käti,

jumanakar munatax laykusti

janiw samarkäti,

atipjañaman qhantati qhanar uñtat k'ajañapkama,

qhispiyasiñaman mä nina wiyar uñtat qhanañapkama.

2Markanakax qhispiyasiñam uñjapxani,

reyinakasti k'ajkir kankañam uñjapxani.

Ukapachaw jumatakix mä machaq sutix utjani,

pachpa Tatituw uka suti churätam.

3Tatitu Diosaman amparapansti,

reyin mä suma pillupjamäyätawa.

4Janirakiw mayampsa: “Apanukut marka” sasax siskxapxätamti,

jan ukasti sutimaxa: “Nayan ajllisita” satäniwa,

uraqimarus janirakiwa: “Tukjat uraqi” sasax siskxapxaniti,

jan ukasti: “Tatitun munat warmipa” satäxaniwa.

5Kunjämatix mä waynax mä tawaqumpi jaqichasixa,

ukhamarakiw Tatitux jumarux warmimat katuqasxätam,

wasitat sayt'ayxätam; jumampisti k'uchikiw jakasini,

kunjämatix mä chachax warmipampi kusiski ukhama.

6Jerusalén, pirqanakamarusti uñjirinak uchta,

jupanakasti uruy arumaw sapxi:

“Tatitur yupaychirinakax jan amukt'apxamti,

7Jerusalenar wasitat sayt'ayañapkama,

mä jach'a marka tukuyañapkamax

Tatiturux jan samarayapxamti.”

8Tatitusti ch'amani kupi amparap aytasaw juramento luri:

“Janipuniw mayampsa

uñisirinakamampix juman trigom manq'aykäti,

kuna ch'amamampitix jikxataskta uka vinomsa

janirakiw jaya markat jutir jaqinakampix umaykäti;

9jan ukasti jumanakpachaw yapu apthapisisipkäta,

manq'asisax nayaruw yupaychapxitäta;

uvanaksti jumanakaw apthapisisipkäta,

vinsa, qullan utaxan anqäxanakapan umasisipkäta.”

10Mistupxam, punkunak chiq mistupxam,

markaxatakisti thakhi wakichapxam.

Uka thaksti wali amuyumpi lurapxam,

qalanaksa q'al willsupxam;

markanakar jawsañatakisti

mä wiphal sayt'ayapxam.

11Tatituw aka arunak yatiyaski

taqi aka uraqin jakirinakaru:

“Jerusalén markarusti, sapxam,

‘Qhispiyirimax purinxiwa’,

Tatituw markapar qhispiyxi” sasa.

12Israelitanakarusti: “Qullan marka”,

“Tatitun qhispiyatanakapa” sasa,

Jerusalenarusti: “Munat marka”,

“Jan apanukut marka” sasaw sutichapxani.