1Ukatsti Moisesampi, israelitanakampix Tatitur jach'añchasaw aka q'uchu q'uchupxäna:
“Tatitur jach'añchasaw nayax q'uchü,
atipjäwipax muspharkañawa:
¡carronaksa, caballonaksa qutaruw chhaqtayi!
2Q'uchuxax Tatitutakiwa,
jupaw ch'amañchirixaxa, qhispiyirixasa.
Jupaw Diosaxaxa, juparuw yupaycharakï;
jupaw awkixan Diosapaxa, juparuw jach'añcharakï.
3Tatitux ch'aman nuwasiriwa.
Sutipax Tatituwa.
4Tatitux qutaruw jaqunti;
faraonan carronakaparu, ejercitoparu;
¡Mar Rojo qutan,
suma ajllit jilïrinakapas axskatapxi!
5Jupanakax qalanakjamaw quta manqhir jaqurantti,
jach'a quta manqhiw jupanakarux chhaqtayi.
6Tatay, kupi amparaman ch'amapampiw
uñisirinakarux t'unjtaxa.
7Jach'a ch'amamampiw
jumatak sayt'asirinakarux jaqunuktaxa;
q'apisiñamax ninjamaw aqti,
jupanakasti jichhunakjamaw nakhanti.
8Wali q'apisitaw phust'taxa,
umasti mayawjaruw qutuchasi;
uma mathapinakasti pä pirqar uñtataw sayt'i;
¡quta manqha uraqisti jan unxtkiriw tukuraki!
9Uñisirinakaxax amuyataynawa:
‘¡Jikxatañkam jupanakar arktañäni!
¡Jupanakar tukjañäniwa!
¡Jupanakat aparkañäni ukanaksti,
kusisitaw lakinuqasiñäni!
Espada apsusï,
amparaxaw jupanakar tukjani’ sasa.
10Ukampis jumax may phust'asakiw
qutampi chhaqtaytaxa;
jupanakax plomo metaljamaw
uma mathapi manqhir chhaqhantawayapxi.
11Tatay,
¡janiw khiti diosas jumjam utjkiti!
¡Janiw khitis jumjam qullanasa, jach'a ch'amanis utjkiti!
¡Jumax kunayman muspharkañanaka,
axsarkañanak utjaytaxa!
¡Askïtaw yupaychatäñataki!
12¡Jumasti ch'amamampix
uraqimpiw egipcionakar manq'antaytaxa!
13Munasiñamampiw
juman qhispiyat markar irpasktaxa;
ch'amamampiw qullan utjäwimar irpasktaxa.
14Markanakax ukanak yatisin khathatiniwa;
filisteonakasti axsarayasipxaniwa.
15Edom markankir jilïrix mayjt'asiniwa;
Moab markankir jilïrinakax axsarañat khathatini,
Canaán markankir jaqinakasti taqiniw ch'amap thayjtayasini.
16Tatay,
¡jupanakax mulljasipxpan!, ¡axsarayasipxpan!
¡Ch'amam uñjasin qalanakjam tukupxpan,
qhispiyat markaman makhatañapkama!
17Tatay,
qullan qullumar jakir irpapxita,
jakañatak jumax ajlliskta uka chiqaru,
amparamamp sayt'ayat utamaru.
18¡Tatitux wiñayapuniw markar apnaqani!”
Marian q'uchupa19Faraonan carronakapampi, caballeriapampix qutar mantapkän ukapachaxa, Tatituw jupanakar umamp chhaqtayäna; ukampis israelitanakax waña uraqinjam quta makhatapxäna.
20Ukat Aaronan kullakapa, María profetisa warmix pandereta aptasin q'uchüna, ukatsti mayni warminakax panderetanakamp thuqt'asisarakiw jupar arkapxäna.
21Mariasti akham sasaw q'uchüna:
“Tatitusar jach'añchas q'uchupxam,
atipjäwipax muspharkayawa,
¡caballonakarusa, jaqinakarus qutaruw jaqunti!” sasa.
II. ISRAELITANAKAN SINAÍ TUQIR SARAPXATAPA(15.22—18.27)Mará chiqankir k'allk'u uma22Moisesax israelitanakar Mar Rojo qutat Sur sat wasararuw irpxäna, jupanakasti kimsa uruw wasaranjam sarapxäna, janiw uma jikxatapkänti.
23Mará sat chiqar purisasti, ukan utjir umax janiw umt'añjamäkänti wali k'allk'ütap layku. Ukat uka chiqarux “Mará” sas sutichapxäna, ukasti “k'allk'u” sañ muni.
24Jaqinakasti Moisesatakix jan walinak parlapxäna, jiskt'apxarakïnwa: “¿Kunarak jichhasti umañänisti?” sasa.
25Ukat Moisesax Tatitur yanap mayïna, Tatitusti juparux mä ali uñacht'ayäna. Moisesasti umaruw uka ali jaquntäna, umasti muxsaw tukxäna.
Ukhamaw Tatitux israelitanakan iyawsañanakap uka chiqan yant'äna, mä kamachi churarakïna, jupanakan sum sarnaqapxañapataki.
26Sarakïnwa: “Jumanakatix naya, Tatit Diosaman arunakapar sum ist'apxäta, munañaxsa lurapxäta, ukatsti kamachi arunakaxarusa, kamachinakaxarus phuqhapxarakïta ukapachaxa, janiw kawkïr mutuyäwinaktix egipcionakar apaykta ukanak apayanipkämati. Nayätwa jumanakar k'umarachir Tatitumaxa” sasa.
27Uka qhipatsti, israelitanakax Elim sat chiqaruw puripxäna, uka chiqansti tunka payan uma jalsunaka, paqallq tunka palmera quqanakaw utjatayna, ukawjan jupanakax uma jak'an utjnuqtapxäna.
Who We AreWhat We EelieveWhat We Do
2025 by iamachristian.org,Inc All rights reserved.
