ISAÍAS 52 - Qullan Arunaka DC

Jerusalén markar qhispiyañxat yatiyäwi

1¡Jerusalén marka, sartasim!

¡Wali ch'amampi sayt'asim!

Jerusalén, qullan marka,

suma isinakamampi isthapisim,

Diosar jan uñt'ir ñanqha jaqinakaxa,

janiw mayampsa jumar tukjirix jutkxapxaniti.

2¡Jerusalén, sartasim!

¡Uka laq'anak thalarasim!

¡Kunkamat uka chinuñanak jararasxam,

ukatsti qunuñamar qunt'asxam!

3Tatitusti siwa:

“Janiw nayax mä kuna qullqsa katuqkti

kunapachatix jumanakarux katuntat apapkayätam ukkhaxa;

jichhax janirakiw kuna qullqsa

jumanakar qhispiyxañatakix churkäti.

4Qalltanxa markaxax Egiptoruw saräna,

ukan jayat jutir jaqjama jakarakïna;

ukatsti Asiria markarakiw ina ch'usat t'aqhisiyäna.

5Jichhasti ¿kunarak uñjtsti?

Markaxarux ina ch'usat Babiloniarux apasxapxi.

Atipjirinakasti wali jach'a jach'ar tukt'asaw arnaqasipxi,

nayarusti sapa kutiw chuyma ust'ayapxitu.

6Ukampis mä urux purininiwa,

kunapachatix markaxax yatkani,

khititix parlkta ukax Tatitütaxa.”

7¡Kunja kusiskañas qullu patanakanjam jutaskir uñjañaxa,

khititix mä suma yatiyäwi apanki ukaru,

khititix sumankañ yatiyäwinak apanki ukaru,

khititix qhispiyasiñ yatiyäwinaksa apanki ukaru,

Jerusalén markarux sarakiwa: “Diosamax reyiwa”! sasa.

8Ist'am, marka uñjirinakamax art'asipxiwa,

atipt'añ art'asiñanak art'asipxi,

Jerusalén markar Tatitun kuttanitapxa,

pachpa nayranakapampiw uñjapxi.

9¡Jerusalén markan t'unjatanaka,

kusisiñat wali ch'amampi q'uchusipxam,

Tatitux markaparuw khuyapt'ayasi,

Jerusalén markaruw qhispiyaraki!

10Tatitux taqi markanakan uñjkataw

jach'a ch'amap uñacht'ayi.

Jiwasan Diosasax qhispiykistu ukxa,

taqi aka uraqpacharakiw yatini.

11¡Babilonia markat mistunxapxam,

kuna q'añurus jan llamkt'apxamti,

Babiloniat mistunxapxam!

¡Khitinakatix Tatitun yänakapa apanipkta ukanakax

jan kunampis q'añuchasipxamti!

12Ukampis janiw mäki mistunipxañamäkiti,

janirakiw laqas jalsunipxañamäkiti,

Israelan Tatit Diosapax

jumanakarux imasipkätamwa.

Tatitun luqtiripan t'aqhisiñapampi, atipjäwipampi

13Luqtirixax taqi kunan atipjani,

wali jach'ar aptatäniwa.

14Ajanupas q'ala mayjt'at uñjasaxa,

jan jaqir uñtasita tukjat uñjasasa,

waljaniw jupat muspharapxäna,

15ukhamarakiw walja markanakax muspharapxani;

reyinakas jupar uñjasax jan aruniw qhiparapxani,

kuntix jupanakax uñjapkatayna,

amuyt'apkarakitayna ukanakxa,

janipuniw kunapachas ist'apxirïkataynati.