ESDRAS 5 - Qullan Arunaka DC

Diosan utap wasitat lurañ qalltapxi

1Idó sat chachan yuqanakapa Hageo, Zacarías uka profetanakasti, kuntix Tatitut katuqapkäna uka yatiyäwinak Judá uraqinkiri, Jerusalén markankir judionakaruw yatiyapxäna.

2Uka yatiyäwinak ist'asasti, Zorobabel chachampi, Josué chachampix Tatitun utap wasitat lurañ qalltapxäna, profetanakasti jupanakarux yanapapxarakïnwa.

3-4Ukampis Éufrates jawirat inti jalant tuqinkir suyun Tatenai apnaqiripampi, Setar-boznai chachampi, mayni masinakapampix Jerusalenar purisax judionakar akham jiskt'apxäna: “¿Khitis sapxtam aka uta wasitat lurayañataki, pirqanak sayt'ayañatakisa? ¿Kuna sutinïpxis aka ut lurayirinakaxa?” sasa.

5Ukampis Tatituw lurañanak sarayir judionakarux imaskäna, ukhamasti lurasipkakïnwa, Darío reyir yatiyäwinak apayañkama, ukhamat jupan arup katuqañkama.

6Darío reyir qillqat apayapkäna ukat qillqaqatasti akawa, uksti apayapxänwa, Éufrates jawirat inti jalant tuqinkir suyu apnaqir Tatenai chachampi, Setar-boznai chachampi, masinakapampi, khitinakatix Éufrates jawirat inti jalant tuqinkapki uka marka apnaqirin yanapirinakapamp kuna,

7-8ukansti akham sänwa:

“Darío rey, suma askin jikxatasiñam munasaw aruntanipxsma. Yatiyapxaraksmawa: nanakax Judá uraqiruw sarapxta, ukansti jach'a Diosan utap wasitat lurasipkir uñjapxta, ch'iyat jach'a qalanakamp luratawa. Jichhasti lawanakampiw pirqanakap apakipasipki, ukhamarus jank'akiw lurapxi, luratasti mäkiw sarantaraki.

9Ukatsti, sarayapki uka judionakaruw nanakax jiskt'apxta, khitis jupanakar uka ut lurapxañapataki, pirqanaksa lawanakamp apakipañatak sapxpacha uk yatiñataki,

10jupanakar sarayki uka jaqinakan sutinakapsa jiskt'apxaraktwa, ukhamat sutinakap qillqasin juma reyir yatiyaniñataki.

11Jupanakasti sapxituwa: ‘Nanakax taqi ch'aman Tatituruw yupaychapxta, kawkïr uttix wasitat lurapkta ukax nayra maranakan Israelan mä jach'a reyipaw taqpach luräna’ sasa.

12Sapxarakiwa: ‘Nayra awkinakaxaw alaxpachankir Tatitur phiñasiyapxatayna, ukat jupax Babiloniankir Nabucodonosor reyin amparapar jupanakar katuyäna, uka reyirakiw Tatitun uka utap t'unjatayna, ukatsti jaqinakaparux Babiloniaruw jaqunukurakitayna.

13Uka qhipatsti Ciro reyix Babilonia marka nayrïr mara apnaqäwipan arsüna, Tatitun utapax wasitat luratäñapataki’ sasa.

14“Sapxarakituwa: ‘Ciro reyix Babiloniankir templot kuntix Nabucodonosor reyix Jerusalenan Tatitun utapat Babiloniar apkatayna uka qurita, qullqit lurat yänak apsu. Ukanaksti jupax Judá marka apnaqir Sesbasar chacharuw katuyarakitayna.

15Ciro reyisti Sesbasar chacharuw uka yänak Jerusalenan Tatitun utapar kutt'ayxañapataki sarakitayna, ukatsti pachpa chiqan Tatitun utapa wasitat lurañapataki.

16Sesbasar chachax Jerusalenar purisinxa, Tatitun utapatak nayrïr qalap jaquntäna; jichhax ukkhatpach wasitat lurasiskaraki, ukampis janïraw tukuyatäkiti’ sasa.

17“Jichhasti, juma reyitak askïchi ukax mayipxsmawa, Babiloniankir reyinakan qillqatanakapan thaqtayam, yatxatayarakim, Ciro reyix chiqpachapunit Jerusalenan Tatitun utap wasitat lurañatak arspachäna, jan ukax janicha uka, ukatsti uka tuqit juma reyix amtäwim yatiyanipxarakita” sasa.