JOB 20 - Qullan Arunaka DC

Ukxarusti Zofar chachaw akham arsurakïna:Zofar

1-2Arunakamampix chuymaxsa mayjt'ayistawa,

ukat jichhax jumar sañ munsma.

3Tuqisitanakamampix jisk'achistawa,

ukampis jumar kunjäm arusxatañsa nayax yatiraktwa.

4Jumax ukhampunïtap yattawa,

jaqix aka uraqin utjki ukkhatpacha:

5ñanqha lurir jaqin kusisiñapax juk'atakikiwa;

kusist'añapasti jank'a tukusirikirakiwa.

6Uka kusisiñapax alaxpachjam jach'äskpasa,

p'iqipas qinayanakkam puriskpan,

7wanur uñtatakiw tukusxani

masinakapasti janiw kawkhankatapsa yatipkaniti.

8Samkjamakiw chhaqtawayxani,

arum uñjäwir uñtatakiw jaltxani,

janipuniw khitis jikxatirjamäkaniti.

9Khitinakatix jupampi jakapkäna,

jupar uñjapkarakïna, jupanakasti

janiw mayampis uñjkxapxaniti.

10Kuntix jupax jan kunani jaqinakar lunthatkatayna ukxa,

wawanakapaw kuttayxani.

11Ch'aman waynpachakiw

amay imäwi manqharu mantani.

12Ñanqha lurañax jupatak wali sumjamakiwa,

muxsjam mallt'araki;

13suma muxsapsti lakaparuw mallxäsi,

k'achat k'achat mallirt'araki.

14Purakankxi ukapachasti,

katarin mich'iparuw tukxaraki.

15Kuna qamir yänaktix manq'antkatayn ukanak kutsuyanxi;

Tatituw ukanak purakapat apsuyanxi.

16Katarin mich'ip ch'amuskäna,

uka mich'iw jiwayarakini.

17Umjam jalaskir lechempita, misk'impit

janiw kusist'kaniti.

18Taqi kuntix jikxatkatayna ukanaksti kuttayxaniwa;

janiw uka qamir yänakapat kusist'kaniti.

19Jan kunani jaqinakan ch'amapamp qamiriptasin,

jupanakar apanukuwayxatap layku,

jupan jan utachat utanak katuntasitap layku.

20Janipuniw kunampis inampst'añ chuymapax sisthapkänti,

janirakiw kunas kusist'aykänti;

21juk'ampsa munaskakïnwa,

ukatpï kusisiñapax juk'atakikïnixa.

22Utjir yänakapas jilxataskaniwa,

juk'amp llakitaw sarnaqani;

ch'amampiw chijinakax jupatak utjarapini.

23Purakap phuqt'asiñ munaskani ukapachaw,

Tatitux q'apisiñap jupxar puriyanini.

24Hierrot lurat jiwayañ yänakatsa jaltaskaniwa,

broncet lurat mich'inakaruw jalt'ani.

25Antutt'at mich'iw janchip maysat maysa chhuqsuni,

ukan k'achipasti k'iwchap chiqaw misturakini.

Axsarañampi phuqhantataw uñjasini;

26axsarkañ ch'amakaw juparux muyuntani.

Jan khitin naktayat ninaw jupampir utapampir nakhantani.

27Alaxpachax jupan juchap qhanaruw uñstayani,

uraqisti juchañchañatakiw sartasirakini.

28Tatitun q'apisiñapax jupxar purinkan ukapachaxa,

qamir yänakapax taqpachaw chhaqtawayxani.

29Tatitux ukanak ñanqha lurir jaqitak wakichi;

ukanakaw ñanqha lurir jaqirux suyt'askaraki.