2 CRÓNICAS 15 - Qullan Arunaka DC

Asá reyin Diosar arkañ mayjt'ayatapa(1 R 15.13-15)

1Azarías chachan Oded sat yuqaparux Diosan ajayupaw parläna,

2jupasti Asá reyir jikxatiriw saräna, juparusti sänwa: “¡Asá, ukhamarak Judá, Benjamín markankir jaqinaka, ist'apxita! Tatitux jumanakampïskiwa, jumanakatix jupampïpxäta ukaxa. Jumanakatix jupar thaqhapxäta ukaxa, jikxatapxätawa; ukampis jumanakatix jupar apanukupxäta ukasti, jupax jumanakar apanukupxarakïtamwa.

3Israel markax jaya maranakaw jan chiqpach Diosani sarnaqxäna, janiw jupanakar yatichiri sacerdotenakas utjkxänti, janirakiw Diosan kamachi arunakapas yatichatäkxänti.

4Ukampis jan walt'añanakapan uñjasisaxa, Israelan Tatitu Diosaparuw kutikipstapxäna, jupanakasti thaqhapxänwa, Tatitusti jikxatayasirakïnwa.

5Khä urunakansti janiw sumankañax khititakis utjkänti, jan ukasti, taqi markanakan jakirinakatakix jan walt'añakiw utjäna.

6Markanakas jupanak puraw maynit maynikam tukjasipxäna, Tatitun kunayman jan walt'añanakamp t'aqhisiyatap layku.

7Ukampis jumanakax ch'aman sayt'asipxam, janirak mayjt'asipxamsa, luratanakamatsti churäwi katuqapxäta” sasa.

8Asá reyisti profetan arunakap ist'asax, ch'amañchasïnwa, ukatsti Judá, Benjamín uraqinakatxa, axtkañ yaqha diosanakarux q'alpun tukjäna, ukhamaraki kawkïr markanaktix Efraín qullunakan katuntkäna uka markan utjir diosanakamppacha, ukatsti Tatitun utap nayräxankkän uka altarxa askicht'ayarakïnwa.

9Ukatsti Judá, Benjamín uraqinkir jaqinakaruw tantachäna, ukhamarak jupanak taypinkir Efraín, Manasés, Simeón uka yaqha markanakat jutir jaqinakampiru, israelitanakatsti waljaniw Asá reyir jaqkattxapxatayna, Tatit Diosapan jupampïtap uñjasa.

10Ukatsti Jerusalén markan tantachasipxäna, Asá reyix tunka phisqan mara marka apnaqaskäna ukapacha, kimsa phaxsi saraqataru,

11uka urusti Tatituruw wilañcha luqtapxäna, uñisirinakapat aparanipkatayna ukanakat paqallq pataka urqu vacanaka, paqallq waranqa ovejanaka.

12Ukatsti nayra awkinakapan Tatit Diosapar taqi chuyma thaqhañatakiw arsupxäna.

13Maynitix Israelan Tatitu Diosapar jan thaqkaspa, jisk'äpasa, jach'äpasa, chachäpasa warmïpasa ukax, jiwañapatak juchañchatäñapatakiw arsupxäna.

14Jupanakasti jach'at arsusaw Tatitutak juramento lurapxäna, kusisiñat jach'at arnaqasa, pututunak pututt'asa.

15Judá uraqinkir taqpach jaqinakaw kusisipxäna, taqi chuyma uka juramento lurapxatanakapata, jupanakax taqi chuymarakiw Tatitur thaqtapxatayna, ukham lurasaw jupar jikxatapxäna, ukatsti jak'ankir markanakampis suman jakayarakïna.

16Asá reyix Maacá sat awichapatxa tayka reina kankañap apaqäna, jupan Astarté diosar uñtasit mä dios lurayatap layku. Asá reyix uka lursutarux jisk'a jisk'a t'unjäna, ukatsti Cedrón jawiran phichhantäna.

17Israelan qullu patanakapan utjkäna uka yupaychañ utanakax janis tukjatäkchïn ukasa, Asá reyix taqi chuymaw Tatitur arkäna,

18ukatsti Diosan utaparuw kawkïr qurinaka, qullqinaktix jupasa awkipasa Tatitur luqtkatayna ukanak uchxäna.

19Nuwasiñax janiw utjkänti, Asá reyin kimsa tunka phisqani mara marka apnaqkäna ukakama.