JOEL 3 - Qullan Arunaka DC

V. MARKANAKAR TARIPÄWI(3.1-16[4.1-16])

1 1 (1) Tatitusti siwa:

“Kunapachatix uka urux purinkani ukkhaxa,

Judá markampiru, Jerusalén markampirux kuttayanxäwa.

2 2 (2) Markanakaxar katuntir markanakaruw tantacht'ä,

Josafat qhirwa aynacharuw irpä,

ukan jupanakarux uñt'asiyä

kuntix Israel markaxampix lurapki ukanaka.

Jupanakaw israelitanakarux taqi tuqir ananukupxäna,

markaxan uraqipsti jalanuqasipxänwa.”

3 3 (3) Suertet jaqtasin nayan markax jaljasipxäna,

imill wawanaksa, yuqall wawanaksa aljantapxänwa,

uka qullqsti machañanakampi,

jan wali warminakampi sarnaqañanakan tukjapxäna.

Tatitun markanakar juchañchatapa

4 4 (4) “Tiro, Sidón, Filistea markanaka, ¿kunsa nayampix lurañ munapxta? ¿Phuqsusiñti munapxista? ¿Kunanak mayisxañcha munapxtaxa? ¡Kunatix wakiski uk jank'akiw churapxäma!

5 5 (5) Jumanakax qullqixsa, qurixsa, lunthatawayapxistawa, suma imasit yänakaxsti yaqha diosanakar yupaychañ utanakamaruw apasxapxtaxa.

6 6 (6) Jumanakax Judá markankiri, Jerusalén markankir jaqinakarux jayaruw apapxtaxa, jupanakarusti t'aqhisiyañ luqtiritwa griego jaqinakar aljantapxtaxa.

7 7 (7) Ukampis nayaw jupanakarux kawkirutix aljantatäpki ukkhatxa kuttayanï, ukatsti jumanakarux uka pachparak t'aqhisiyapxäma.

8 8 (8) Yuqall wawanakamsa, imill wawanakamsa judionakaruw aljarakï, jupanakasti sabeo sat jaqinakaruw aljapxani, uka jaqinakasti wali jayankirinakawa. Naya, Dios Tatituw arsta.”

9 9 (9) Markanakarusti akanak yatiyapxam:

¡Ch'axwañatak wakicht'asipxam!

¡Wali ch'aman jaqinakar jawsapxam!

¡Ch'axwanakan nuwasir jaqinakasti jutapxpan,

jupanakaw nuwasir sarapxani!

10 10 (10) Azadonanakapatsti espadanak lurasipxpan,

jusinakapatsti lanzanak lurasipxpan,

pisi ch'aman jaqisti sispan: “¡Nayax ch'amanïtwa!” sasa.

11 11 (11) Taqi jak'ankir markanaka,

¡jank'ak jutapxam, tantacht'asipxam!

¡Jan nuwasir jaqisa jichhax nuwasir tukpan!

12 12 (12) Taqi markanaka, wakichasipxam,

Josafat qhirwarkam sarapxam,

ukan Tatitux uka markanakar taripani.

13 13 (13) Jupanakasti wali qhurunakäpxiwa,

q'illurat trigor uñtat yawthapipxam,

yapu apthapiñ pachax purinxiwa;

uvax vino lurañatak puqt'atäxiwa,

uka uvarjam ch'irwsupxam.

14 14 (14) Tatitun urupan jak'ankxatapatxa,

walja jaqinakaw Taripäwi sat qhirwan tantacht'atäpxi.

15 15 (15) Tatitux purinkani uka uruxa,

intisa, phaxsis ch'amakt'aniwa,

warawaranakas janiw k'ajtkxaniti.

16 16 (16) Uka urun Tatitux Sión qulluta,

Jerusalenatpach art'atap ist'asiyani,

ukkhasti, alaxpachas, akapachas khathatiniwa.

Ukampis israelitanakarux Tatitun markapätapatxa,

arxataniwa.

VI. JUDÁ MARKAN JUTIR SUMA URUNAKAPA(3.17-21[4.17-21])Judá markan jutir suma urunakapa

17 17 (17) “Jumanakax yatipxätawa,

naya, Tatitu Diosamaxa Sión qullana qulluxan jakasktxa.

Jerusalén markasti qullan markäxaniwa;

janipuniw jayat jutir jaqinakax marka apnaqirix mantankxapxaniti.

18 18 (18) Uka urusti, jach'a qullunakana,

jisk'a qullunakansa vinompi, lechempix

umjamaw jalani,

Judá jawiranakansti walipuniw umax jalani.

Qullan utaxatsti mä jalsur umaw mistuni,

uka umasti Sitim qhirwa qarparakini.

19 19 (19) Judá markankir jaqinakar nuwapxatapata,

markapan jan juchan jaqinakar jiwayapxatapatxa,

Egipto markax ch'usa laqayanakar tukuyatäniwa,

Edom uraqisti ch'usa wasarar tukuyatarakïniwa.

20-21 20-21 (20-21) Nayaw jaqinakar jiwayatanakapat phuqsusiskä,

juchanirux janiw pampachkäti.

Ukampis Judá uraqimpi, Jerusalén markampin jaqix utjaskapuniniwa,

naya Tatitusti Sión qullun jakasirakï.”