JEREMÍAS 3 - Qullan Arunaka DC

Israel markax, Tatitutak janiw taqi chuymäkänti

1Tatitux Judá markarux siwa:

“Sañäni, mä jaqitix warmipampi jaljtchi, ukatsti warmix uka chachampi jaljtasax yaqha chachampi jaqichasxchi ukaxa, amuyatamatxa, ¿uka chachax nayra warmipampi wasitat jaqichasispati? ¡Janiwa! Ukhamäspa ukaxa, markatakix mä p'inqäspawa.

Ukampisa, jumax Israel, walja chachanakampiw sarnaqtaxa, ¡jichhasti nayan ukaruw kuttanxañ munaraktaxa!

Naya, Tatituw, uk arsta.

2“Q'ara qullunak uñtam,

¿kawkhansa janix juchxa lurktaxa?

Wasarankir árabe jaqir uñtataw quntaxa,

thakhi thiyanakan waynanakamarux suyäyätaxa.

Yaqhanakampi sarnaqatamampisa,

ñanqha luratanakamampis markxa q'añuchtawa.

3Ukat jallus jan purkiti

awti pachansa, jallu pachansa.

Yaqha chachanakampi sarnaqir warmir uñtat jan p'inqanïtawa;

¡ukham sarnaqatamat p'inqasiñamänwa!

4Jichhakiw saskistaxa:

‘Awkixay, tawaqu kankañaxan nayan suma irpirixa,

5¿jichhasti phiñasitakïskätati?

¿q'apisiñamasti wiñayatakipunïniti?’ sasa.

Ukham sasasti,

qawqhtix munkta ukkharak ñanqhanak lurtaxa.”

Tatitux Israelampiru, Judá markampir jupan ukar kuttanxapxañapatakiw wayt'i

6Josías reyin urunakapansti, Tatitux sarakituwa: “¿Kuntix nayataki sayt'asir Israelax lurki uk uñjtati? Nayar apanukusin qullu patanakana, jach'a quqanak k'uchun yaqha diosanakaruw yupaychi.

7Nayasti sarakïyätwa: Ukham lurasax inas nayan ukarux wasitat kuttanxchini sasa, ukampis janiw kuttankiti. Judá kullakapas ukham yaqha diosanakar yupaychir sum uñjaraki,

8nayan Israel markar nayatak sayt'asitapat apanukutaxsa uñjiwa, yaqha diosanakar yupaychatapat apanukutaxsa uñjarakiwa. Ukampis Judá markax janiw kunsa axsarkiti, jan ukasti jupax yaqha diosanakar yupaychirix sararakikiwa.

9Jan axsartasaw yaqha diosanakar yupaychi, ukham sarnaqatapampisti aka uraqirux ñanqhachiwa. Nayar apanukusinsti qalanakaru, quqanakaruw killisiraki.

10Taqi ukanakïpansa, ukham jan wal lurir Judá markax janiw nayan ukarux taqi chuymapampi kuttankiti, jan ukasti nayarux sallqjituwa. Naya, Tatituw uk arsta.”

11Tatitusti sarakituwa: “Nayar saykatir Israelax, ukham jan wal lurir Judá markat sipan juk'a juchanikiwa.

12Jichhax saram, ukatsti aka arunak yatiyanim amsta tuqinkir markaru:

“ ‘Tatitux siwa:

¡Nayatak sayt'asir Israel, nayan ukar kuttanxam!

Janiw nayax jumarux phiñasit chuymampi katuqkämati,

janirakiw wiñayatakis q'apisitäkäti,

nayax khuyapayasir Tatitütwa.

Naya, Tatituw uk arsta.

13Jucha luratamaki uñt'asim,

Dios Tatitur saykatatam uñt'asirakim;

yaqha diosanakan qhipap jalatama,

jach'a quqanak k'uchunakan,

uka diosanakarux yupaycharaktaxa,

arunakaxarus janirakiw ist'ktati.

Naya, Tatituw uk arsta.’ ”

14Tatitux siwa: “Nayatak sayt'asir wawanaka, nayan ukar kuttanxapxam, jumanakan uywirimax nayätwa. Sapa markat jumanakat mayni apsurakï, sapa wila masinakatsti panin apsurakï, ukatsti Jerusalén markaruw kuttayanxapxäma.

15Kawkïr marka apnaqirinakatix nayatakjamäkani ukanak churarakï, ukanakasti ch'ikhi kankañampiw apnaqapxätam, suma amuyt'a chuymampiraki.

16Jumanakax aka markan mirantxapxäta, wawanakamas waljanïxani ukapachasti, janiw khitis wasitat Tatitumpi mä amtäwir mantatäkis uka arcat parlkxaniti, janiw khitis ukat lup'kxaniti, janiw khitis amtaskxaniti; janirakiw juk'ampi uka arcax munaskxaniti, yaqhas wasitat luraskxarakiniti. Naya, Tatituw uk arsta.

17Ukapachasti Jerusalén markax Tatitun qunuñapa satäniwa; taqi markanakaw ukan tantacht'asipxani, ukatsti nayaruw jach'añchapxitani, janirakiw chuymanakapan jan wali amtatanakapar arkxapxaniti.

18“Uka uru purinkani ukapachasti, Judá markax Israel markaruw jaqkattxani, ukatsti mayakiw amsta tuqinkir markat kutt'anxapxani, kawkïr uraqtix nayax mä tutïkaspa ukhama nayra pacha awkinakapar churkta uka uraqiru” sasa.

Israelan yaqha diosanakar yupaychatapa

19“Israel marka,

nayax jumar wawaxat katuqañatakiw amtasta,

mä suma munkañ uraqi jumar churañ amtarakta,

taqi aka uraqinakat sipan juk'ampi suma uraqi.

Nayasti sarakïyätwa: ‘Jichhax awki sisxchitaniya’ sasa,

ukatsti janiy nayat jayar sarkxchiniti sarakïyätwa.

20Ukampis kunjämatix yaqha chachampi sarnaqir warmix chachaparu sallqjixa,

ukhamarakiw jumax nayar sallqjista.

Naya, Tatituw uk arsta.

21“Arunakaw wasar qullu tuqinakan ist'asi:

¡ukanakasti israelitanakan jachatanakapawa,

khuyapayasiñ mayitanakapawa!

Jupanakax chiqa thakhit saranukuwayapxi,

naya, Tatitu Diosapatsti armasipxituwa.

22¡Nayatak sayt'asir wawanaka, nayan ukar kuttanxapxam!

¡Nayaw ist'asir wawanakar tukuyxapxäma!” sasa.

Israelitanakan Tatitur arsupxatapa

“Tatay, akankapxtwa, jumaruw makhatxapxsma,

jumätaw nanakan Tatitu Diosaxaxa.

23Qullunak pataru sarapxataxax inamayawa,

uka qullunak patan arnaqasitanakaxas inamayakiwa,

juma Tatit Dios sapanak qhispiyasiñ jikxatapxä.

24Yaqha diosanakar mä p'inqa yupaychatanakaxax,

kuntix awkinakaxax wawäpkäyäta ukapacha jikxatapkatayna,

ovejanaka, uywanaka, yuqall wawanaka, imill wawanaka,

taqi ukanak apt'asiyapxitu.

25Jichhax p'inqasiñatsa amuki alt'asipxañäni,

wawatpacha jichhakamaxa,

jiwasanakasa, awkinakasasa,

Tatitu Dios nayraqatan juchanak lurapxtanxa,

janirakiw juparux jaysapktanti.”