2 SAMUEL 22 - Qullan Arunaka DC

Davidan atipjäwi q'uchupa(Salmo 18)

1Davidax aka q'uchu Tatitur q'uchüna, kunapachatix Tatitux jupar Saúl reyin amparapata, uñisirinakapan amparapatsa qhispiykän ukapacha.

2Sarakïnwa:

“Tatay, jumaw ch'amañchirixätaxa,

jumaw imantasiñaxätaxa;

qhispiyirixätasa.

3Jumaw Diosaxätaxa,

jumaw nayar imantir qarqaxätasa,

imir jark'aqasiñaxätasa,

qhispiyir ch'amaxätasa,

wali amstankir imantasiñaxätasa

¡Nuwasiñanakat nayar qhispiyista!

4Tatay, jumaw jach'añchatäñatak askïtaxa:

art'asinsma ukkhasti, uñisirinakaxat qhispiyistawa.

5“Jiwax sipitanakapampiw simpantitu,

axsarkay t'unjirinakaw axsarayitu.

6Jiwax chinuñanakapampiw muyuntayitu,

¡jiwañ sipitanakan jikxatasta!

7Llakisiñaxan Tatitur art'asta,

Diosaxat yanap mayista:

jupasti utapatpach ist'anitu,

¡arnaqasitaxasti jinchupkamaw puri!

8“Uraqix ch'amampiw khathatïna,

qullunakax saphitpach unxtäna,

¡Tatitun q'apisitap laykuw khathatïna!

9Nasapat jiwq'iw mistüna,

lakapatsti nakhantir ninaw lawrsüna,

¡lakapat k'illim sank'anak thusanïna!

10Alaxpach jist'arasin saraqanïna.

¡Kayunakap takt'añapan,

ch'iyär qinayanakaw utjäna!

11Mä chhiqhanin chhiqhapxaruw qunxatäna,

thayan chhiqhanakap patanjam jaltäna.

12Ch'amak manqhin imantasïna;

uman phuqhantat qinayanak taypina,

qinayanakasti q'al jupar muyuntäna.

13¡Nayraqatapatsti llijtir qhixu qhixuw mistüna,

nakhaskir sank'anakaw jallüna!

14“Alaxpachankir Tatitux

alaxpachatpach jach'a arup ist'asiyäna,

15lliju llijunak jaquqanïna

mich'inak antutankaspas ukhama;

¡uñisirinakaparux tutukiyänwa,

luqhinakjamaw jaltayäna!

16Lamar quta manqhax uñstxänwa,

aka uraqin saphipas uñstxarakïnwa,

Tatitun axsarkañ arup ist'asitap layku,

q'apisiñat samanap ch'amamp phust'atap layku.

17“Tatitux alaxpachatpach amparap luqtanitu,

amparapampiw jach'a lamar quta manqhat waysutu.

18Jach'a ch'aman uñisirinakaxat qhispiyitu,

nayat juk'amp ch'aman timanakat antutnukuyitu.

19Chijinkkipan nayarux chhukxatapxitu,

Tatitusti yanapt'apampiw arxatitu,

20qhispiñ thakhiruw irpsutu,

¡nayar munatap laykuw qhispiyitu!

21Tatitux q'uma sarnaqataxatjam

churäwip waxt'itu.

22Nayax Tatitun thakhipanjam sarnaqta,

¡janipuniw Diosaxat saraqaskti!

23Taqpach arsutanakapax chuymaxankaskiwa;

¡janipuniw kamachinakapat jithiqtaskti!

24Jan kamskayaw nayraqatapan sum sarnaqta,

ñanqha lurañat jithiqtasta.

25Tatitusti nayraqatapan q'uma chuymani

sarnaqatax laykuw, churäwip waxt'itu.

26“Tatay, aski jaqitakix askirakïtawa,

jan kamskaya suma jaqitakix

jan kamskayarakïtawa.

27Qhana chuyman jaqitakix qhana chuymanirakïtawa,

sallqa chuyman jaqitakisti

ch'ikhi chuymanïtawa.

28Jumaw t'aqhisiyat jaqinakarux qhispiytaxa,

jach'a jach'a tukurinakarusti jisk'achtawa.

29Tatay, jumaw nayan qhanaxätaxa,

Diosaxay, jumaw arum ch'amakaxar qhantaytaxa.

30Juman yanapamampiw timanakaxar jalxatä,

yanapamampirakiw markanakap katuntä.

31“Tatitun thakhipax chiqapawa,

Tatitun arsutanakapax taqi chuymampi iyawskayawa,

¡Tatitux jupar taqi chuymampi alkatirinakarux

imaskapuniwa!

32¿Khitirak Tatitut sipan yaqha diosasti utjisti?

¿Khiti diosarak jiwasanakar arxatiristi utjisti?

33Diosaw nayarux ch'am churitu,

juparakiw sarnaqäwixar q'um tukuyi,

34tarujan kayunakapjam jaltir kayunak churitu,

alax chiqawjanakan kayunakaxar sum thuruñchitu,

35jupaw nuwasiñatak amparanakax sujaptayitu,

broncet lurat mich'inak antutt'añ jiyintañatakiw ch'am churitu.

36“Jumaw arxatista, qhispiyarakista,

khuyapayasiñamaw aytat jaqir tukuyitu.

37Jumaw thakhixar q'umachtaxa,

kayunakaxasti janiw llust'kiti.

38“Timanakaxarux arktasin jikxatta,

jupanakar tukjanisaw kuttanxta.

39¡Jupanakar jisk'a jisk'a tukjanta,

kayunakaxamp takxatataw uñjasipxi,

jan mayamp sartkir lurjanta!

40Jumaw nuwasïwin ch'am churista,

qallasirinakarusti nayraqataxaruw alt'aytaxa,

41nayraqataxat timanakaxar chhukhutataytaxa,

ukhamat nayar uñisirinakarux tukusiytaxa.

42Jupanakax yanap mayisipxäna,

janiw khitis jupanakar yanapkänti;

Tatituruw art'asipxäna

jupasti janiw ist'känti.

43¡Thayan apat laq'arjamaw jupanakarux tukusiyta!

¡Thakhinkir ñiq'irjamaw taksurakta!

44Qallkatasir markat qhispiyista,

markanakan jilïripat utt'ayista,

jan uñt'at jaqinakampiw luqtayista.

45Arux ist'asax mäkiw jaysapxitu;

yaqha markankir jaqinakax q'ayachapxituwa,

46yaqha markankirinakax llajllasipxiwa,

khathatisaw imantasïwinakapat mistunipxi.

47“¡Tatitux jallallatäpan!

¡Arxatirixax qullanäpan!

¡Qhispiyir Diosaxax jach'añchatäpan!

48Jupaw naya lanti phuqsur Diosaxa,

jupaw amparaxar markanak katuyitu.

49Jupaw timanakaxan q'apisiñapat qhispiyitu,

nayar qallkatir jaqinakat antutayitu.

¡Tatay, jumaw qhuru jaqinakat qhispiyistaxa!

50Ukatpï Tatay, markanak taypin jach'añchsmaxa,

sutimar waqaychasaw q'uchunak q'uchurakta.

51Jumaw ajllit reyimar nuwasïwinakan atipjaytaxa;

Davidampiru, wawanakapampirusti

munasiñampipuniw uñjtaxa.”