JOB 30 - Qullan Arunaka DC

1Jichhasti sullka waynanakakiw

nayat larusipxitu,

uka waynanakan awkinakaparux

janiw ovejanakax uñjir anunakamp chikas nayax jaytkirïskäyatti.

2¿Kunatakis nayax ch'amap muniriskäyätxa?

Jupanakax janiw kuna ch'amanïpkänsa

3manq'atjam aynacht'atäpxatap layku, pist'añan jikxatasipxatap layku.

Ch'usa wasaran arumanakax,

waña saphinakak t'urusipkäna;

4alinak taypit k'allk'u quranakak jik'iqasipxäna,

retaman saphinakapamppach manq'apxäna.

5Taqi jaqinakansa jupanakax uñisitaw sarnaqapxäna,

lunthatanakarjam jach'at arnaqañampi arknaqataw uñjasipxäna;

6qarqa putunakana, q'awanakana,

qarqanak taypin jakapxañapäna;

7alinak taypin wararisa,

ch'umi taypin qutuchasisa.

8Jan kunatak aski jaqinakäpxänwa,

pachpa uraqipat jaqunukut jaqinakänwa.

9Ukampisa jichhax jupanakaw nayat sawkasipxi,

nayxat kunayman sawkasisaw larusipxaraki.

10Axtasisaw nayat jithiqtawayapxi,

ajanuxatsa thuskatasipkakituwa.

11Jan yäqata, jisk'achjataw uñjasta,

jan axsartañampiw uñjapxitu.

12Jak'axaruw tantacht'asipxi,

liwisiyapxituwa, nuwantapxituwa,

jiwayañ munapxarakitu.

13Thakhixsa nayar t'unjañatakiw jark'antapxi,

janiw khitis jupanakaru jark'irix utjkiti.

14P'iyantat pirqa chiqas jutantapkaspa ukhamaw

jach'at warart'asis nayar chhukxatanipxitu.

15Axsarañaw nayar khathatiyitu;

nayan jaqi kankañaxax mä thayjamakiw sarawayxi,

qamir kankañaxas qinayjamakiw chhaqtawayxi.

16Janiw jakañatak ch'amaxax utjkxituti;

llakisiñakiw nayarux katuntxitu.

17Usuñax ch'akhakamaw puritu;

arumanakas wal t'aqhisiyarakitu.

18Diosax nayar kunkat katuntitu;

ch'amampiw isixa ch'iyanuqaraki.

19Ñiq'iruw liwintitu,

laq'äkiristsa, qhilläkiristsa ukhama.

20Dios Tatay, jumaruw art'asinsma,

jumasti janiw ist'kistati;

nayraqatamaruw uñstanta,

jumasti janiw sumsa uñkatkistati.

21Nayatakisti wali qhuruw tukxtaxa,

jan khuyapt'ayasisaw arknaqarakistaxa.

22Thayampiw apayista,

jach'a thayampiw thalsuyarakista,

23juman nayar jiwañar apañ munatam yatistwa,

taqi jaqin puriñapäki ukaru.

24¿Janit nayasti pisin jakasir jaqir yanapkatätsti

janit aynacht'at uñjasitapat yanapt'katätsti?

25¿Janit t'aqhisir jaqit jachkatätsti?

¿Janit pist'ayasir jaqit khuyapt'ayaskatätsti?

26Nayax kusisiñ suyt'askäyäta,

ukampis t'aqhisiñakiw jutxi;

qhanan puriniñap suyt'askäyäta,

ukampis ch'amakakiw purinxi.

27Chuymaxax walpun usutu;

jan samart'asaw putuqitu,

llakisiñ urunakakiw nayarux suyt'askitu.

28Sarnaqäwixax llakisiñakiwa,

urpuntat urur uñtatawa;

taqinin nayraqatapan yanap mayista.

29Qamaqinakan jilapäkiristsa ukhamätwa,

suri jamach'inakan masipäkiristsa ukhamätwa.

30Janchixas ch'iyäraw tukuwayxi,

ninjamaw nakharakitu.

31Arpanakana, pinkillunakan phust'asitapasti,

nayatakix jachañaru, t'aqhisiñarukiw tukuwayxi.