OSEAS 2 - Qullan Arunaka DC

1 1 (3) Ukapachaw jumanakax jilanakamar sapxäta:

“Tatitun markapa” sasa,

kullakanakamarusti:

“Khuyapt'ayata” sasaraki.

Israel markan jan ist'asirïtapa

2 2 (4) Tatitux siwa:

“¡Taykamar juchañchapxam, juchañchapxapunim,

jichhax jupax janiw warmixäkxiti,

janirakiw nayas chachapäkxti!

¡Yaqha chachanakampi sarnaqañap apanukxpan!

¡Jan wali warminakjam sarnaqañsa apanukxpan!

3 3 (5) Janitix uka jan wali sarnaqañanakap apanukkanixa, q'alalsuyäwa:

kunjämtix taykapan purakapat yurkän ukhama,

ch'usa wasararuw tukuyarakï,

waña uraqiruw kipstayä,

ukatsti umat pharjayasin jiwayarakï.

4 4 (6) Wawanakapatsa janiw khuyapt'ayaskäti,

jan wal sarnaqäwin jikxatat wawanakätap layku.

5 5 (7) Taykapax yaqha chachanakampi sarnaqiriwa;

sum uñt'atäñsa q'al apt'asiraki akham sasa:

‘Munirinakaxar thaqhir sarä,

jupanakaw churapxitu,

manq'añsa, isinaksa,

suma q'apkir qullanaksa,

kusist'añanaksa’ sasa.

6 6 (8) “Ukat nayax ch'aphinakampi thakhip jist'antä,

thakhinakap jan jikxatañapatakisti,

uyumpiw muyuntayä.

7 7 (9) Munirinakaparux arkaskaniwa,

ukampis janiw jikxatkaniti;

thaqhaskaniwa, janiw jikxatkaniti.

Ukapachaw sani:

‘Nayra chachaxampik kuttasxä,

walik jupampix sarnaqaskäyäta’ sasa.

8 8 (10) “Ukampis jupax janiw amuyaskänti

nayan juparu trigo, vino, aceite,

ukanak churataxsa,

nayarakiw qullqsa, qursa yapt'äyäta,

ukanakampisti yaqha diosanak lurasi.

9 9 (11) Ukat jichhax taqi kunanaktix nayax churkta

ukanak q'al aparasxä.

10 10 (12) Munirinakapan uñjkañ q'alalsuyä.

¡Janiw khitis amparaxat qhispiykaniti!

11 11 (13) Kusisiñanakapas tukusiniwa,

phunchhäwinakapsa,

machaq phaxsi uruyañanakapsa,

samarañ urunakapsa, q'al tukjarakï.

12 12 (14) Uva yapunakapsa,

higo yapunakapsa q'al tukjarakï,

uka yapunakatsti, akham sänwa:

‘Munirinakaxaw aka yapunak kunatix wakt'kitu ukat churapxitu’ sasa.

Nayasti uka yapunakap qurampiw qurantayä,

pampankir animalanakaw ukanak manq'antapxani.

13 13 (15) Juparusti,

yaqha diosanakar incienso luqtatapat mutuyä,

nayar armanukusaxa,

munirinakapar arkañatak surtijanakampi,

wallqanakampi k'achachaskäna,

taqi ukanakat mutuyarakï.

Naya Tatituw uk arsta.

Diosan Israel markapar munasitapa

14 14 (16) “Ukham luratapatsa,

wasitat nayar munañapatakiw

wasarar irpasin chuymapar parlxayä.

15 15 (17) Ukatsti uva yapunakap kuttayxäwa,

jan walt'añanakapsti

sumaruw tukuyarakï.

Nayarux tawaqükäna

uka urunakapanjam parlxayxitani,

Egiptot mistunkän uka urunjama.

16 16 (18) Ukapachaw nayarux sitani:

‘Nayan chachaxay’ sasa,

‘Baal diosaxay’ siskamayxa.

Naya Tatituw uk arsta.

17 17 (19) Lakapatsti

Baal diosanakan sutinakap apaqä,

janipuniw mayampsa ukanakax aytatäkxaniti.

18 18 (20) “Khä urunsti, Israel markatakix,

pampankir laq'unakampi,

jamach'inakampi, katarinakampix

mä suma arust'äwiruw mantä,

aka markatsti, nuwasiñ yänakap aparasin q'al t'unthapï,

ukhamat markaxax samart'at sarnaqasxani.

19 19 (21) Israel marka, taqi chuymaxampi jumar munatax laykusti,

wiñayatakiw warmixar tukuyäma,

kamachirjamax chiqpach warmixa.

20 20 (22) Warmixaruw tukuyasïma, jumarukiw munasïma,

ukapachaw jumax Tatiturjam uñt'asitäta.

21 21 (23) Naya, Tatituw ak arsta:

Nayaw khä urunakan alaxpachat aka uraqirux jallu puriyanï;

22 22 (24) uraqinsti trigox achuntaniwa,

vinosa, aceitesa, jilarkirïniwa,

ukhamat Jezreel qhirwax sumar tukuni.

23 23 (25) Markaxarusti nayatakikipuniw uraqir uskusï,

Lo-ruhamatsti khuyapt'ayasïwa,

Lo-amirusti ‘Markaxätawa’ sarakïwa,

jupasti: ‘¡Diosaxätawa!’ sarakitaniwa.”