JEREMÍAS 37 - Qullan Arunaka DC

Sedequías reyin Jeremías profetar mayitapa

1Babiloniankir Nabucodonosor reyisti, Josiasan Sedequías yuqaparuw Judá uraqin reyïñapatak utt'ayäna, Joacín jaqin Joaquín yuqap lanti.

2Ukampis janirakiw Sedequías reyisa, jilïrinakapasa, markankirinakasa kuntix Tatitux Jeremías profeta tuqi parlxaykäna uka arunakarux ist'apkänti.

3Sedequías reyisti, Selemiasan Jucal sat yuqapampiru, Maasías jaqin Sofonías sacerdote yuqapampiruw Jeremiasan ukar khithäna, akham siri: “Taqi nanakatak Tatitut mayirapipxita” sasa.

4Jeremiasarusti janïraw katuntapkataynati, ukhamasti jupax jan khitin kamsataw taqi jaqinak taypin uka markan sarnaqaskäna.

5Ukchañkamasti, faraonan ejercitopax Egiptot Judá markar yanapt'iriw jutantäna. Uka urunakan Babilonionakax Jerusalén markaruw nuwantasipkäna, jupanakax faraonan ejercitop jutir yatisinxa, sarawayxapxänwa.

6Ukhamasti Tatitux Jeremías profetaruw parlxayarakïna,

7jupan sutipxar uka khithanit jaqinakar sañapataki: “Judá uraqinkir reyiru, kawkïritix nayar jiskt'añataki khithanipktam ukarux akham sapxam: ‘Faraonan ejercitopax jumanakar yanapt'iriw jutantaskäna, jichhasti Egipto markaparuw kuttawayxi.

8Babilonionakasti jichhax Jerusalén markar wasitat nuwantañatakiw kuttanipxani, katuntasinsti ninampiw phichhantapxani.

9Jichhasti naya, Tatituw sapxsma: Jan chuymanakaman kusisipxamti, janirak sapxamsa: “Babilonionakax sarxaniwa” sasa, ukasti janiw ukhamäkaniti.

10Jumanakax jumanakar nuwantir babilonionakarux q'alsa atipjasipkasma, uka nuwasïwi chiqansti mä qawqha usuchjat babilonionakakis qhiparxapxaspa ukasa, ukanakax sartanisin Jerusalén markarux ninampiw phichkatapxani.’ ”

Jeremías profetar carcelar jist'antapxatapa

11Babilonian ejercitopax, faraonan ejercitopan jutatap ist'asinsti, Jerusalén markat sarxapxänwa,

12Jeremiasasti Jerusalén markat mistuwayasinxa, Benjamín uraqiruw sarxäna, ukan mä tuti katuqañataki.

13Ukampis Benjamín chiqar sarki uka punkur purkäna ukkhasti, Selemiasan Irías sat yuqapa, khititix Hananías sat jaqin allchhipäki, uñjirinakan jilïripäkaraki, uka Irías jaqiw Jeremiasarux katuntäna akham sasa:

—¡Jumax babilonionakar jaqkattañ munatätaxa! —sasa.

14Jeremiasasti sänwa:

—Janiw ukhamäkiti, janiw nayax babilonionakar jaqkattkäti —sasa.

Ukampis Irías jaqix janiw kunsa ist'añ munkänti, jan ukasti katuntasin jilïrinakan nayraqataparuw irpäna.

15Uka jilïrinakasti Jeremiasar uñjasax walpun phiñasipxäna, Jeremiasar nuwjayasinsti, Jonatán, khititix reyin qillqiripäkän ukan utaparuw carcelt'ayapxäna, uka utsti carcelaruw tukuyapxarakitayna.

16Jeremiasarusti uraqi manqhankki uka mutuñ utaruw uskuntapxäna, ukansti walja urunakaw ukankarakïna.

17Sedequías reyisti Jeremiasarux utapar irpanipxañapatakiw mayïna; Jeremiasax reyin nayraqatapar irpatäkän ukkhasti, reyix juparux jamasatak jiskt'äna:

—¿Janit Tatitun yatiyäwinakapax nayatak utjki? —sasa.

Jeremiasasti sänwa:

—Jïsa, utjiwa; akaw uka yatiyäwixa: Juma jach'a reyix, Babiloniankir reyin amparapar katuyataw uñjasïta —sasa.

18Ukxarusti Jeremiasax Sedequías reyiruw jiskt'asirakïna:

—¿Kuna jucharak nayasti juma reyi tuqi lurta, jilïrinakam tuqisa, jan ukax jaqinak tuqisa, nayar carcelar apantapxañamatakisti?

19¿Kawkinkarak uka profetanakasti, khitinakatix parlapkäna Babiloniankir reyix janiw jumanakarusa, aka markarusa nuwantir jutkaniti sapkäna ukanakasti?

20Jichhasti, jach'a rey, kuntix achikt'askäma uka mayisitaxar ist'ita: Juma reyix jan munamti wasitat nayar Jonatán qillqirin utapar irpatäñaxa, inampis ukan nayax jiwxirista —sasa.

21Ukhamasti Sedequías reyix Jeremiasan, uñjirinakan uta anqaparuki katuntat qhiparañapatakiw arsüna, ukatsti sapüruraki t'ant'a Luririnakan thakhipa satäki ukan aljapki ukat t'ant'a aparapipxañapa. Ukhamaw phuqhasïna markan t'ant'ax utjkän uka urunakkama. Ukhamat Jeremías profetax uñjirinakan uta anqapan katuntat qhipararakïna.