NÚMEROS 20 - Qullan Arunaka DC

Qarqat uman jalsutapa(Ex 17.1-7)

1Israelitanakax marat nayrïr phaxsi saraqataruw Sin sat wasarar puripxäna; ukatsti Cadés chiqan mä qawqha pacha qamarapxäna. Ukan Mariax jiwxäna, ukanarak p'amp'atäxäna.

2Uka chiqansti janiw jaqinakatak umax utjkänti, ukat taqpachan tantachasisin, Moisesampitaki, Aaronampitak arusiñatakiw sartasipxäna,

3ukatsti Moisesaruw sapxäna:

—¡Tatitux mayni israelitanakar jiwarayki ukanakamp chik jiwarapxiriskäyäta!

4¿Kunatakirak aka wasarar Tatitun markapar irpanipxtasti? ¿Nanakampi uywanakaxampi jiwarañapti munapxtasti?

5¿Kunatakis Egiptot irpsunipxista aka axsarkañ wasarar puriyaniñkamasti? Akan janiw kunas yapuchañjamäkiti; janiw higo quqanakasa, uva yapunakasa, granado quqanakas utjkiti; ¡umas janirakiw umt'añatak utjkiti! —sasa.

6Moisesampi Aaronampisti jaqinakat jithiqtawayxapxänwa, ukatsti Tatitump Jikisiñ Carpa mantañaruw sarxapxäna; ukkhansti p'iqinakap uraqir puriyañkamaw alt'apxäna. Tatitusti jach'a kankañapampiw jupanakar uñstäna,

7Tatitux Moisesar akham säna:

8—Thujrum ayxarum, ukatsti Aarón jilamamp yanapt'ayasisin taqpach markar tantachthapim. Ukatsti taqpach jaqinak nayraqatan qarqar parlam jupanakar uma churañapataki, ukat qarqat uma jalsunir uñjäta, jupanakana, ukhamarak uywanakapan umt'apxañapataki.

9Moisesasti Tatitun arsutaparjamaw luräna, Tatit nayraqatankkäna uka thujru aytanïna;

10ukxarusti Moisesampi Aaronampix taqpach jaqinakaruw qarqa nayräxar tantachthapipxäna, Moisesasti jupanakarux sänwa:

—Qallasir chuyman jaqinaka, ist'apxam: ¿aka qarqatti umt'apxañamatak uma apsupxästi? —sasa.

11Uka arunak arsusasti, Moisesax amparap aytäna, ukatsti pä kutiw qarqar thujrump jisktäna, ukatsti walja umaw jalsüna. Ukat jaqinakampi, uywanakampix umarapxäna.

12Ukampis Tatitux Moisesampiru, Aaronampirux sänwa:

—Janiw jumanakax nayar iyawsapkistati, janirakiw israelitanakan nayraqatapansa jach'añchapkistati, ukat aka jaqinakamp chikax, churkä uka uraqirux janiw mantapkätati —sasa.

13Ukasti Meribá chiqan lurasïna, uka chiqan israelitanakax Tatitutak arusipxäna, ukampis jupax qullan kankañap uñacht'ayäna.

Edom markankir reyix janiw uraqipanjam Israel markar sarakipayañ munkiti

14Moisesax Cadés chiqatpach jaqinakar khithäna Edom markan reyipar akham sañapataki: “Israelit jilanakamax akham siriw khithanipxitu: ‘Jumax sum yatta nanakan wali ch'ama tukutanakaxa.

15Nanakan nayra awkinakaxax Egiptoruw jakir sarxapxäna, ukatsti walja maranakaw ukan jakapxäna, ukampis egipcionakax nanakar jan wal uñjapxitu, nayra awkinakaxarjamaw uñjapxarakitu;

16ukat nanakax Tatitur yanap mayisipxta, jupasti arnaqasitanakaxar ist'apxituwa, angelap khithanipxitu, jupaw Egipto uraqit irpsunipxitu; jichhasti Cadés markan jikxatasipxta, markamampi qurpa uraqina.

17Jichhasti uraqim chiqay sarakipt'ayapxita, janiw nanakax yapuchat uraqinjam sarapkäti, uva yapunjamsa sarakipapkäti, janirakiw phuch'unakamatsa umt'apkäti. Thakhinjamak sarapxä, uraqinakam sarakipañkamax janiw uka thakhit kawksarus saraqapkäti’ ” sasa.

18Ukampis Edom markankir reyix sänwa:

—¡Janiw uraqixanjam sarakipapkasmati, mantanipxäta ukasti, ejercitoxampiw jumanakar nuwantir mistunï! —sasa.

19Israelitanakasti ukxaruw sapxäna:

—Thakhim chiqak sarakipt'ayapxita, nanakampi uywanakaxampitix phuch'unakamat uma umt'apkä ukax, qullqi churapxäma. Uraqim sarakipt'añak munapxta —sasa.

20Ukampis Edom markankir reyix saskakïnwa:

—¡Janiw uraqixanjam sarakipapkasmati! —sasa.

Ukatsti reyix wali wakichrantat ejercitompiw mistsuwayäna, ukatsti israelitanak nayraqatan sayantäna,

21uraqipanjam jan sarakipayañataki. Israel markasti jan kamacht'irjamäsax, yaqha thakhi thaqhapxäna.Aarón sacerdoten jiwxatapa

22Israelitanakax Cadés chiqat sartawayasax, Hor sat qullu tuqiruw sarxapxäna,

23Edom uraqimpi qurpaski uka chiqan Tatitux Moisesampiru, Aaronampir parläna, akham sasa:

24—“Aaronax jiwxaniwa, janiw jupax Israelan wawanakapar churkta uka uraqir mantkaniti, jumanakan Meribá chiqan arunakaxar jan jaysapxatam layku.

25Jumasti Moisés, Aaronampiru, Eleazar yuqapampir Hor sat qullu patar irpam;

26Aaronax ukan jiwxani. Jiwxipansti, sacerdote isip apsüta, ukatsti Eleazar yuqaparuw ukamp isthapiyäta” —sasa.

27Moisesasti Tatitun arsutaparjamaw luräna. Taqpach israelitanakan uñjkataw Hor sat qullur makhatapxäna.

28Aaronax jiwxän ukkhasti, Moisesax sacerdote isip issuyxäna, ukatsti Eleazar yuqaparuw ukamp isthapiyäna. Uka qhipatsti, Moisesampi, Eleazarampix qullut saraqanxapxäna.

29Israelitanakasti Aaronan jiwatap yatisinxa, kimsa tunka uruw jupat jachapxäna.