ECLESIASTÉS 3 - Qullan Arunaka DC

II. JAKÄWIN UÑTÄWIPA(3.1—12.8)Taqi kunas pachanikiwa

1Aka uraqin taqi kunas pachanikiwa; mä pachakiw taqi kunatakis utji:

2Yuriñ pacha,

jiwxañ pacha.

Ayrunak ayruñ pacha,

ayrutanak jik'thapiñ pacha.

3Jiwayañ pacha,

qullt'añ pacha.

Tukjañ pacha,

utacht'añ pacha.

4Jachañ pacha,

larusiñ pacha.

Llakisiñankañ pacha,

kusisiñankañ pacha.

5Qalanak willtañ pacha,

qalanak apthapiñ pacha.

Qhumantasiñ pacha,

jaljtañ pacha.

6Thaqhañ pacha,

chhaqhayañ pacha.

Imañ pacha,

jaqtañ pacha.

7Ch'iyanuqañ pacha,

ch'ukthapiñ pacha.

Amukt'añ pacha,

parlañ pacha.

8Munasiñ pacha,

uñisiñ pacha.

Ch'axwañ pacha,

sumankañ pacha.

9¿Ukataq irnaqir jaqisti, kuna askirak jikxatisti?

10Diosax jaqir ch'ama tukuñanak katuyatap amuyta, ukat ukanakampix jisk'ar tukuyañataki.

11Diosax pachaparuw taqi kuns munkañ luri; ukhamarus jaqin amuyuparux kunatix wiñayäki uk uchi, janisay jaqix kuntix Diosax lurki, kuntix lurkani uk amuykpan.

12Ukat nayax amuyta, jaqin askipax kusist'aña, k'uchik sarnaqt'aña ukakiwa,

13ukampis jiwasatix manqt'asiñäni, umt'asiñäni, irnaqäwisat kusist'añäni ukaxa, Diosaw ukham jiwasar churistu.

14Kuntix Diosax lurki ukan wiñayatakïtap amuyarakta. Janiw ukar yapt'añas apaqañas wakiskiti; Diosaw ukham luri, jupa nayraqatan axsart'añax utjañapataki.

15Kunatix utjki ukax nayrax utjapunïnwa, ukatsti kunatix utjkani ukanakas niy utjxiwa. Diosaw wasitat utjayaski.

Jakañan jan chiqap luräwinaka

16Akapachan ñanqha lurañanaka, jan walinak utjatap uñjarakta, ukanak lantix aski luraña, chiqapar uñjañaw utjañapäspa.

17Ukat sarakta, Diosaw aski jaqirus ñanqha jaqirus chiqapar uñjaskani, ukampis taqi kun lurañatakix mä pachakiw utji.

18Jaqin sarnaqäwipatsti saraktwa, Tatituw jaqinakarux yant'aski, jupanakan uywanakjamätap amuyasipxañapataki.

19Chiqpachansa jaqinakampi uywanakampix mä sapa tukuyanikiwa: maynis maynisa kipkak jiwapxani, jakayir samanas jupanakatakix janiw yaqha yaqhäkiti. Jaqix janiw uywat sipan jilankkiti; taqi kunas inamayakiwa,

20taqinis mä chiqarukiw puripxani; laq'at luratäpxiwa, pachpa laq'aruw taqinis tukupxani.

21¿Khitis jaqin ajayupan amstar makhatatapa, uywan ajayupas uraq manqhar saraqatap yatisti?

22Ukat nayax amuyta, jaqin askipax luräwipat kusist'añakiwa, ukampis juparux ukhamaw wakt'i, jupan jiwxatapatsti janiw khitis kunatix luraskän uk uñacht'aykaniti.