MIQUEAS 5 - Qullan Arunaka DC

Diosax marka apnaqirinakap Israel markarux churani

1 1 (14) “Jerusalén marka, jichhax sayt'asiñatak wakicht'asim,

uñisirinakamampi muyuntatätawa,

Israel markan jilïriparuw wal mutuyapxarakini.

2 2 (1) Jumasti, Belén Efrata,

Judá uraqinkir markanakatxa jisk'akïtawa,

jumat Israel markar mayni apnaqirix mistuni,

ukasti nayra wila masinak taypit saraqiriwa.”

3 3 (2) Jichhasti Tatitux jupankirinakarux

uka usur warmin wawachasiñapkamaw apanukuni.

Ukatsti jaya markar apanukut israelitanakaxa,

marka masinakapampiw tantacht'asxani.

4 4 (3) Reyisti markapar awatiñatakiw sartani,

Dios Tatitupan ch'amapampi,

jach'a kankañapampiw awatini.

Jupanakasti samart'atarakiw jakasxapxani,

Tatitux taqi akapachan jach'ar aptatätap layku.

5 5 (4) Jupaw sumankañ apanini.

Kunapachatix Asiriankir jaqinakax markasar mantanipkani,

marka apnaqirinakan utaparus mantapkani ukkhaxa,

jupanakar saykatañatakix paqallqu jilïrinaka,

kimsaqallqu wali aytat jaqinakampi khithañäni.

6 6 (5) Jupanakaw Asiria marka apnaqapxani,

Nimrod marksa, espadampiw apnaqapxani,

asirionakatsti qhispiyapxarakistaniwa,

khitinakatix uraqisan qurpanakapa mantanisin sarnaqapki ukanakata.

Uñisirinakar tukjäwi

7 7 (6) Ukapachasti, walja markanak taypina,

Jacobun markapat jilt'irinakaxa,

Tatitux apayanki uka sullanakjamäniwa,

quranakxar purxatkis uka jallunakjamarakïniwa,

ukanakasti janiw jaqin munañapat utjkiti.

8 8 (7) Ukapachasti, walja markanak taypinxa,

Jacobun markapat jilt'irinakax

ch'umi manqha laq'unak taypin mä leonjamäniwa,

kunjämatix leonax ovej tama taypinkasaxa,

katurasin q'al tukjkixa,

janiraki maysa ukhamaki jilt'aykiti ukhamäniwa.

9 9 (8) Tatay, jumax taqi uñisirinakamarux

ukham nuwantasaw tukjarakïta.

Nuwasiñampi, yaqha diosanakar yupaychañampix tukusxiwa

10 10 (9) Tatitux akham siwa:

“Khaya urunxa caballonakam jiwarayäwa,

nuwasiñatak sarir carronakamsa t'unjarakïwa.

11 11 (10) Markanakamsti q'al tukjarakï,

sayt'asiñanakamsti liwisiyarakïwa;

12 12 (11) layqasiñanakamsa q'al tukjä,

yatir jaqinakamas janiw utjkxarakiniti;

13 13 (12) Yaqha diosanakamsa,

axsarkañ qalanakamsa q'al t'unjä,

kawkïr diosanaktix juma kipka luraskta ukanakarux

jan mayampi yupaychxañamatakiw t'unjä.

14 14 (13) Yaqha diosanakamsti jan mayampitakiw apanukü,

markanakamsa q'alrak tukjä.

15 15 (14) Phiñasiñaxansti, jan jaysañ munapkitän uka markanakatxa,

phuqsusirakïwa.”