1Moisesasti saskakïnwa: “Chiqpachatix Tatit Diosamar jaysäta, ukatsti jichhürun churksma uka kamachi arunakaparjam sarnaqarakïta ukapachasti, Diosax taqi aka uraqin utjir markanakxaruw uchätam.
2Ukhamarusa, Diosamar ist'atamat wiñayaw taqi aka aski waxt'äwinak katuqäta:
3Tatitux aski waxt'äwinak churätam kawkhantix jakaskät ukkhana, markansa, pampa uraqinsa.
4Wawanakamasa, achunak apthapitamas askimp phuqt'atäniwa, ukhamarak vacanakamana, ovejanakaman qallunakapasa, taqpach uywanakamasa.
5Achunak imasiñ pirwanakamasa, t'ant'a chapusiñ lamanamas askimp phuqt'atäniwa.
6Jumasti taqi luräwinakaman askimp phuqt'ataw uñjasirakïta.
7“Diosaw jumar nuwantir uñisirinakamarux amparamar katuyätam. Jumamp nuwasirix suma siqicht'ataw jutantapxani, ukampis jumar uñjasax janiw kunjäm jaltxapxatapsa amtasipkaniti.
8“Tatit Diosamaw aski churäwinak apayanïtam, juyra pirwanakamaru, taqi luräwinakamaru, ukatsti churkätam uka uraqin kusisitaw jakäta.
9“Jumatix kamachi arunakap phuqhäta, thakhipanjam arkarakïta ukkhaxa, Tatit Diosamax jupatak yaqhachat marka tukuyätam, kamisatix juramentomp arsuwayktam ukhamarjama.
10Taqi akapach uraqin utjir markanakasti Tatitun sutipan jumampïtap uñjapxani, ukat jumar axsarapxätam.
11Diosax munasiñap uñacht'ayätam, walja wawanak jumar churasa, vacanakaman qallunakapar jiltayasa, uraqinakamar jilarkir achuyasa, kunjämtix awkinakamar churañatak juramentomp arskatayna ukhamarjama.
12Ukatsti jumatak suma imasitap jist'aranini, ukasti alaxpachawa, uraqinakamar wakisit pachapar jallu puriyaniñataki; ukatsti taqi irnaqäwinakamarux askinakampiw phuqt'ätam. Jumax walja markanakaruw mayt'äta, ukampis jumax janiw khititsa mayt'askätati.
13Diosax mä jach'a jilïrit utt'ayätam, janiw qhipankkätati, mayninakat sipan amstankapunïtawa, janipuniw kunapachas aynachan uñjaskätati, jumatix jichhürun Tatit Diosaman kamachi arunakap churksma ukhamar phuqhäta, ukarjam taqi axsart'añamampi sarnaqäta,
14janirak yaqha diosanakarus arkkäta ukapacha.Jan ist'asiritak mutuyäwinaka(Lv 26.14-46)
15“Ukampis jumatix Tatit Diosamar jan ist'käta, janirak kamachi arunakaparjamasa, kamachinakaparjamas sarnaqkäta, jichhürun churksma uka iwxanakarus phuqkarakïta ukkhaxa, taqi aka ñanqhachäwinakaw jumxar jutani:
16Jumasti ñanqhachataw uñjasïta markansa, pampansa.
17Achunak imañ pirwamasa, t'ant'a chapusiñ lamanamas ñanqhachatäniwa.
18Wawanakamasa, yapu apthapitanakamas ñanqhachatäniwa, vacanakamana, ovejanakaman qallunakapasa, taqi uywanakaman qallunakapas ñanqhachatäniwa.
19Jumasti taqi luräwinakaman ñanqhachataw uñjasïta.
20“Taqi luräwinakamanxa, Tatitux ñanqhachäwinaka, pitusiñanaka, llakisiñanak apayanïtam, ukanakasti juk'a urunakan t'unjat uñjasiyätam, juman jan wali luräwinakamampi Tatitur apanukutam layku.
21Kawkïr uraqtix katkäta uka chiqanxa Tatituw axsarkañ usuñanak jumar tukjañatak apayanini.
22Ukhamarakiw apayanïtam jiwañ usunaka, ñanqha usunaka, p'usu usunaka, sinti junt'u pachanaka, waña pachanaka, trigo yapunakam tukjir laq'unaka, ukatsti kunayman usunakaw jumar t'unjañkam arkanaqätam.
23Alaxpachatsti janiw jallux purinkaniti, aka uraqisti janirakiw kunsa achuyarapkätamti.
24Diosasti jallu lantix laq'ampi ch'allampi jumxarux puriyanini, juman t'unjat uñjasiñamkama,
25uñisirinakamamp jumar tukjayañkama. Jumax jupanakamp nuwasirix siqikiw sarantaskäta, ukampis janiw kunjäm jaltxatamsa amtaskätati, taqpach uraqin jakir jaqinakatakix axsarañjamäyätawa.
26Jamach'inakampi, monte animalanakampiw jiwat janchim manq'antani, janiw khiti aliswaqiris utjkaniti.
27“Tatituw jumar egipcionakarjam llixti usunakamp mutuyätam, p'usu usunakampi, sarna usunakampi, jasi jasi usunakampi, janiw uka usunakat waliptkätati.
28Ukhamarakiw luqhiptañampi, juykhuptañampi, pixtusiñanakamp t'aqhisiyätam.
29Ukatsti urunsa mä juykhur uñtataw katt'asis sarnaqäta. Janirakiw kuna luratamas sumäkaniti. T'aqhisiyata, sallqjatapuniw uñjasïta, janiw khitis yanapt'ir jutkarakïtamti.
30Jaqichasiñatakis parlatanïskätawa, ukampis yaqha jaqiw parlatamampix ikintasini; mä utsa lurasiskätawa, ukampis janiw uka utan jakkätati; uva yapunaksa yapuchasiskätawa, ukampis janirakiw achupat kuns manq'kätati.
31Nayraman uñjkataw urqu vacamsa kharirapxani, ukampis janiw aychapxa manq'kätati; asnomsa munkir jan munkir aparapxätam, ukatsti janiw kuttayapkätamti; ovejanakamas uñisiriman amparapankaniwa, janiw khitis uka uñisirinakamat aparañ yanapkätamti.
32Nayraman uñjkataw yuqall wawamasa, imill wawamasa yaqha markankir jaqinakar katuyat uñjasini, jupanakar thaqkäwix qarïtawa, janiw jikxatkätati.
33Jan uñt'at jaqinakaw yapunakamat manq'asini, jumasti t'aqhisiyata jan wali uñjatapuniw sapürus sarnaqäta.
34Ukanak uñjasasti luqhirätawa.
35Tatituw juman qunqurimaru, lankhu charamaru, taqpach janchimar ñanqha llixtinakamp t'aqhisiyätam, janiw kunas k'umarachkätamti.
36“Diosan munañapat jumasa, reyimasa katuntat uñjasini, ukatsti yaqha markar apataw uñjasipxäta, uka marksti janiw jumasa, awkinakamas uñt'apkänti. Ukatsti uka markan yaqha diosanakar yupaychapxäta, lawata, qalat lurat diosanakaru.
37Ukatsti kawkha markarutix Diosax irpkätam uka markanakan p'inqachata, axtasita, jaqin parlasitaw sarnaqäta.
38Yapunakamarux walja jathampiw yapuchaskäta, ukampis juk'a achunakak apthapïta, t'iju t'ijunakaw uka achunak manq'suni.
39Uva yapunaksa yapuchaskätawa, sumsa uñjaskarakïtawa, ukampis janiw mä uvsa apthapkätati, janirakiw mä juk'a vinopsa umt'kätati, laq'unakaw taqi ukanak tukjani.
40Taqpach uraqinakamaruw olivo quqanak ayruskäta, ukampis janiw aceitepampix q'aphirt'ayaskätati, aceitunanakax jupapachpakiw jalartxani.
41Yuqall wawanakamasa, imill wawanakamasa utjaskätamwa, ukampis janiw jumampi chikäkaniti, katuntata yaqha markanakar apataw uñjasipxani.
42Uraqiman utjir taqi quqanakapasa, achunakapas t'iju t'ijunakan tukjataw uñjasini.
43Markaman jakapkani uka yaqha markat jutir jaqinakax sapa kutiw juk'ampi juk'ampi qamiriptapxani, ukampis jumax juk'ampikiw pist'añan sarnaqäta.
44Jupanakasti wali qamirïpxaniwa, qullqsa mayt'ätamwa; ukampis janiw juman kuna mayt'añas utjkätamti. Jupanakax aka uraqin wali aytataw tukupxani, ukampis jumarux janiw yäqapkätamti.
45“Taqi aka ñanqhachäwinakaw jumxarux jutani, ukatsti jumar tukjañatak jikxatañkamaw arkätam, Tatit Diosamar jan ist'añ munatamata, janirak jupan iwxata kamachi arunakapar phuqhañsa munatamata.
46Taqi akanakasti jumatakisa, wawanakamatakisa, wiñayatak mä jach'a uñacht'äwïniwa,
47juman jan kusisiñampi, jan qhana arumpi Diosar yupaychatamata, walja yänak churktam ukasa.
48Tatitux apayankätam uka uñisirinakaruw luqtäta; umatsa, manq'atsa t'aqhisïtawa, isitsa jalstata, kunayman pist'ayasiñanak uñt'äta. Diosax wali ch'ama lurañanakan t'aqhisiyätam, juman t'unjat uñjasiñamkama.
49Diosasti wali jayankir uraqit jumar uñisir marka sartayani, juman jan uñt'at markat jutani, janiw jupanakan parlapsa yatktati. Uka jaqinakax jank'akiw nuwantasiñ yati, jaltir pakalir uñtata;
50wali axsarkay jaqinakäpxiwa, janiw chuyman jaqinakarux axsarapkaniti, janirakiw wawanakatsa khuyapt'ayasipkaniti.
51Jupanakasti uywanakaman qallunakapa, uraqinakaman achunakap manq'antapxani, jan kunan jumar tukuyañkama; janiw jumatakix trigomsa, aceitemsa, vinomsa jilt'aykaniti, vacamana, ovejaman qallunakapsa janirakiw jilt'aykaniti; jumasti manq'atjamaw jiwäta.
52“Uka jaqinakasti, Tatit Diosamax churapktam taqi uka markanakamar muyuntasaw t'unjapxani, jumanakan alkatasiñ jach'a thuru pirqanak tinkurayapxani.
53Uñisirinakamax markanakamar muyuntapkani ukkhaxa, janiw kuna manq'añas utjapkätamti, wali manq'at awtjatätam laykusti, Tatit Diosamax churkätam uka yuqall wawanakamaru, imill wawanakamaruw manq'antasïta.
54Jumanak taypin utjir wali llamp'u chuymani, munasiñan jaqisa jan wal kipka jilapar uñkatani, ukhamarak wali munat warmiparu, qhiparir wawanakaparusa,
55jan jupanakamp chika wawanakapankïr aychapat manq'añataki. Janirakiw kuna manq'añas utjkaniti kunapachatix markanakamar nuwantapkani, ukhamarak wali axsarañanakampi, llakisiñanakampi uñisirinakamax markanakaman t'aqhisiyapkätam ukkhaxa.
56Jumanak taypin jakir llamp'u chuymani warmisa, ukham suma llamp'u chuymanïsin jan q'ara kayus uraqir takt'ir warmisa, munat chachaparusa, wawanakaparus jan wal uñkatani,
57jan jupanakamp chika jichha wawachasit wawapan janchipa, wawa uywañ parisapsa manqañataki; taqi ukanaksti jamasat manq'antani, kunapachatix uñisirinakamax markanakamar muyuntkani ukkhax janiw kuna manq'añas utjkaniti.
58“Jumatix jach'a ch'amani Tatit Diosaman sutipar jan yäqkäta, janirak aka qillqatan yatichäwinakaparjamas sarnaqkäta ukkhaxa,
59Diosax jumampiru, wawanakamampirux mutuyäwinak apayanini, jan qullkaña ñanqha usunakampiw t'aqhisiyapxätam.
60Ukatsti Egipto markar mutuykäna, jumar ukataq axsarayir uka pachpa mutuyäwiw jumxar jutani, janiw samart'aykätamsa.
61Ukhamarusa, Diosax yaqha usunakampi, mutuyäwinakamp apayanïtam, ukanakax janiw aka kamachinakan qillqatäkiti, jumar t'unjañkama.
62Jumasti Israel marka, alaxpacha warawaranakar uñtat waljätawa, ukampis mä juk'anirukiw tuküta, Tatit Diosamar jan ist'atam layku.
63Kamisatix Tatitux suma askinak churasina, jumar mirantayasin kusiskäna, ukhamarakiw kusisini jumar aynacht'ayata, ch'usar tukut uñjasïta ukapachaxa, katkäta uka uraqitxa jan khuyapt'ayasis jik'inukutaw uñjasïta.
64Diosax taqi markanakaruw mä thiyat mä thiykam ananukütam, ukansti yaqha diosanakaruw yupaychäta, lawata, qalat lurat diosanakaru, ukanaksti janiw jumasa, nayra awkinakamas uñt'känti.
65Uka markanakan jakkasin janiw sumankañsa, samarañsa jikxatkätati; qawqhas kusisiñ munaskätawa, ukampis Diosax llakt'atak sarnaqayätam.
66Jakañamax chijinakan muyuntataw jikxatasini, uruy arumaw axsarayasïta, jiwampis chikakïskätawa.
67Axsarañampi atipjayasisasti, willjta tuqirux sätawa: ‘Jank'ak arumäxaspa’ sasa. Arumasti: ‘Jank'ak urüxaspa’ sasaraki.
68Tatitux barconakat Egiptorux kuttayätam, jupax ‘janiw uka thakhinjam kuttätati’ siskchïyätam ukasa; ukatsti uñisirinakamaruw aljätam jupanakan t'aqhisiyat luqtiripäñamataki; ukampis janiw khitis jumar alasiñ munkaniti.”
Who We AreWhat We EelieveWhat We Do
2025 by iamachristian.org,Inc All rights reserved.
