1 CORINTIOS 14 - Qullan Arunaka DC

Taqi kunsa yäpar apnaqañxata

1Munasiñanïñatak ch'amachasipxam, ukhamarus ajayun churäwinakap Diosat katuqañ munapxam, ukat juk'ampsa profecía arunak yatiyapxam.

2Khititix jan uñt'at arunakat parlki ukax Diosaruw parlxayi, janiw jaqinakar parlxaykiti, janiw khitis arsutap amuyt'kiti. Ajayupasti imantat arunakat arsu, ukampis janiw khitis arsutap amuyt'kiti.

3Ukatsipana, khititix profecía arunak yatiyki ukax iglesiar jiltayañatakiw parli, ukampiw ch'amañchi, chuymacharaki.

4Jan uñt'at arunakat parlirix jupan askipatakikiw parli; ukampis khititix profecía arunak yatiyki ukax iglesiaruw jiltayi.

5Nayax taqi jumanakan jan uñt'at arunakat parlapxañam munirista; ukampis profecía arunak yatiyapxañam munirista; ukaw jan uñt'at arunak arsuñat sipan askixa, uka arunakax kun sañtix munki uktix qhanañchapxasma ukkhakiw iglesiar yanapt'añatakix askïspa.

6Jichhasti jilatanaka, nayatix jutasin jan uñt'at arunakat parlapxäm ukax janiw jumanakatak askïkaspati, janitix Diosan yatiyäwinakap parlapkirisma, yatiñ kankañat jan parlapkirisma, profecía arunak jan yatiyapkirisma, yatichäwinak jan yatichapkirisma ukaxa.

7Toct'añ yänakatix mä kipkak jachsupxaspa ukaxa, ¿kunjämatarak pinkillumpina, arpampin jachsutapsti mayja mayjätap amuysnasti?

8Mä nuwasiñantix trompetax jan suma qhana phust'askaspa ukasti, janiw khitis nuwasiñatak wakichaskaspati.

9Ukhamarakiw jumanakampix lurasi: jumanakatix jan khitin amuyt'kañ jan uñt'at arunakat parlapxätaxa, ¿kunjämarak kuntix sapkta ukasti yatisispasti? ¡Ina ch'usarukiw parlasipktaxa!

10Aka uraqinsti walja jan uñt'at arunakaw utji, ukanakasti arsutap tuqikiw uñt'atäspa.

11Ukampis nayatix uka arunakan kuntix sañ munki uk jan yatkirista ukaxa, nayampi parliritakix mä jaya markankir jaqjamakïristwa, jupas nayatakix mä jaya markankir jaqjamakïspawa.

12Ukalayku, niyakixay jumanakax ajayun churäwinakap katuqañ munapxstaxa, kunanakatix iglesiar jiltaykaspa ukanakan utjañapay munapxam.

13Ukhamasti jan uñt'at arunak parlirixa, uka arunak qhanañchañatakix Diosat ch'am maypan.

14Ukampis nayatix jan uñt'at arut Diosat mayiristxa, chiqpachansa ajayuxampiw Diosat mayiskta, ukampis amuyuxan janiw kuna asksa jikxatkti.

15Ukhamasti ¿kuna lurañaxarak wakisisti? Ajayumpi, amuyumpi Diosat mayiñaxaw wakisi. Ajayumpi, amuyumpi q'uchuñaxaw wakisi.

16Jumatix ajayumampik Diosar yupaychstaxa, ukat mä aliq jaqitix ist'ätamxa, janiw juman yuspagaratamampix chikachaskaniti, janirakiw juman parlatamsa amuyt'kaniti.

17Juman yuspagaratamax wali sumäskaspawa, ukampis maynitakix janiw askïkaspati.

18Nayax Diosaruw yuspagarta, jumanakat sipan jan uñt'at arunakat juk'ampi parlataxata;

19ukampis iglesian mä phisqa arunaksa, amuyt'kay arunak arsuñ munta, ukhamat mayninakar yatichañataki, tunka waranqa jan uñt'at arunak arsuñat sipansa.

20Jilatanaka, janiy jumanakax wawanakjam lup'ipxamti. Jan ukasti, jan walinak lurañatakik wawjamäpxam; amuyt'asiñansti jach'a jaqinakjamäpxam.

21Tatitux Qillqatan siwa: “Aka markarux yaqha markankir jaqinak tuqiw jan uñt'at arunakamp parlä, ukampis janiw ist'apkitaniti” sasa.

22Ukhamasti jan uñt'at arunakat parlañax Cristor jan iyawsirinakatakix mä chimpuwa, iyawsañanïpki ukanakatakisti janiw ukhamäkiti. Ukampis profecía arunak yatiyañax khitinakatix iyawsañanïki ukanakatakikiw mä chimpuxa, Cristor jan iyawsirinakatakix janiw ukhamäkiti.

23Kunapachatix iglesiax tantachatäki ukkhaxa, taqpachanitix jan uñt'at arunak parlasipkätaxa, ukat yaqha aliq jaqixa, jan ukax Cristor jan iyawsir jaqis mantaninixa, jupax jumanakan luqhir tukupxatam amuyani.

24Ukatsipana, taqinitix profecía arunak yatiyapxätaxa, ukat Cristor jan iyawsiri, jan ukax mä aliq jaqitix mantanin ukkhaxa, jumanakan arsutam ist'asax, jupa pachpaw amuyt'asisin chuymap uñantasini.

25Ukhamat chuyma manqhapan utjki ukax qhanar mistuni, ukatsti killt'asisaw Diosar yupaychani, ukat chiqpachapun Diosan jumanak taypinkatap yatini.

Wakiskir lurañxata

26Ukhamax jilatanaka, kunapachatix tantachasipkät ukkhaxa, mayninakax q'uchunak q'uchupxasma, mayninakasti yatichapxasmawa, jan ukax kuntix Diosax sapktam uk qhanañchapxasma, jan ukax jan uñt'at arunakat parlapxasma, uka arunakat qhanañchapxarakisma. Taqi ukanakax purapat jiltañatakïñapawa.

27Kunapachatix jan uñt'at arunakat arsupxät ukkhaxa, paniniki jan ukax kimsanikiw maynit maynit arsuñapa; ukhamarus mayniw ukanakan arsutanakap qhanañchañapa.

28Ukampis janitix qhanañchirix utjkchi ukaxa, jupanakax iglesia nayraqatan uka jan uñt'at arunak jan parlapxpati, jan ukasti, jupa sapatakiki, ukhamarak Diosatakik parlapxpan.

29Ukhamaraki, profetanakatix utjchi ukaxa, paniniki, jan ukax kimsanik parlapxpan, mayninakasti kuntix parlapki uk amuyt'apxpan.

30Ukampis Diosatix mä kunsa mayni qunt'atäskirir yatiyani ukaxa, nayraqat parlirix amukt'añapawa.

31Ukhamat taqpachanix maynit maynit parlasax profecía arunak yatiyapxani, ukat taqpachan yatiqañapataki, ch'amañchasiñapatakiraki.

32Profecía arunakat yatiyañax profetan sarayatäñapawa;

33Diosax janiw pixtuntir Diosäkiti, jan ukasti, sumankañ utjayir Diosawa.

Criston iglesianakapan saräwiparjamasti,

34warminakax iglesian tantachasïwinakapan amukïpxañapawa, janiw parlañapax wakiskiti. Jupanakax chachanakapar jaysapxañapawa, kamisatix kamachix siski ukhamaru.

35Jupanakatix kunsa yatiñ munapxchixa, chachanakapar utan jiskt'asipxpan; mä warmin iglesia tantachasïwinakan parlañapax janiw askïkiti.

36Jumanakax yatipxam, Diosan arunakapax janiw jumanakampi qalltaskiti, janirakiw jumanakakis katuqapktati.

37Maynitix profetjam amuyaschixa, jan ukax Ajayun amuyt'ayatas amuyaschixa, kuntix qillqanipksma ukax Tatitun kamachipätap amuyani.

38Janitix uk katuqkan ukasti, janirakiw Tatitux juparux katuqkaniti.

39Ukhamasti munat jilatanaka, jumanakax profecía arunak yatiyañar ch'amachasipxam, janirak jan uñt'at arunak arsuñsa jark'apxamti;

40taqi kunsa chiqaparu, ukhamarak yäpar lurapxam.