SALMOS 95 - Qullan Arunaka DC

SALMO 95Kusisiñampi Tatitur q'uchupxañäni

1Jutapxam, Tatitur q'uchupxañäni,

arxatir qhispiyirisar kusisit yupaychapxañäni.

2Yuspagarañ chuymamp nayraqatapar mantapxañäni,

jupar jach'achañatak q'uchupxañäni.

3Tatitux jach'a ch'aman Diosawa,

k'ari diosanakat sipan munañaniwa.

4Akapach mik'ay manqhanakax amparapankiwa,

jach'a qullunakas jupankiwa.

5Jach'a lamar qutax jupankiwa,

jupaw lamar qutarux utjayi;

amparapampiw waña uraq lurt'i.

6Jutapxam, killt'asis yupaychapxañäni;

Tatitun nayraqatapar killt'asipxañäni,

jupaw jiwasanakarux irnuqistu.

7Jupaw Diosasaxa,

jiwasanakasti jupan awatit markapäpxtanwa,

jupan irpat ovej tamapäpxtanwa.

Tatitun arup jichhür ist'apxam:

8“Meribá uraqinjam chuymanakam jan qalarayasipxamti,

Masá wasaranjam chuymanakam jan ch'ullqhiptayapxamti,

9nayra awkinakamax luräwinakax uñjkasasa,

nayarux yant'apxitänwa.

10Pusi tunk maraw khä jaqinakatakix q'apisïyäta,

ukat säyäta: ‘Aka markax wali pantjataw sarnaqi;

¡janiw arsutanakaxar jaysapkiti!’ sasa.

11Ukat q'apisiñaxan juramento lurta:

janiw samarañaxar mantapkaniti” sasa.