1 CRÓNICAS 21 - Qullan Arunaka DC

Davidax Israel markankirinakaruw jakthapi(2 S 24.1-17)

1Supayax israelitanakatakiw sayt'asïna, ukaw Davidarux Israel markan jaqinakar jakthapiñ amtayäna.

2Ukhamasti Davidax Joab chacharu, markan jilïrinakaparux sänwa:

—Sarapxam, ukatsti Israel markar jakthapinipxam, Beerseba chiqata qalltasina Dan chiqakama, jakthapisasti nayar yatiyapxita, qawqhanïkitix jaqix uk yatiñataki —sasa.

3Ukampis Joab chachax sänwa:

—Tatitusti markaparux pataka mä ukkhamp jilxataypan; ¿janit taqpach jupanakasti juma Jach'a Reyin luqtirinakapäkisti? ¿Kunatarak juma Jach'a Reyisti uk mayïtasti? ¿Kunatarak Israel markasti ukham juchañchasinisti? —sasa.

4Ukampis reyin arsutapax Joab chachan arupat sipansa juk'amp yäqatänwa, ukhamasti Joab chachax Israel markpach muytäna, ukat Jerusalén markarux kutt'xäna.

5Joab chachax Israel markar jakthapkän uk Davidarux yatiyäna, Israel markansti waranqan waranqapa patak waranqa nuwasir jaqinakaw utjatayna, Judá uraqinsti pusi pataka paqallq tunka waranqa jaqinakaraki.

6Ukampis Leví, Benjamín ayllunakat janiw jakthapitäkänti, Joab chachatakix reyin ukham amtatapax janiw sumäkänti.

7Tatitutakix taqi uka luratax janiw askïkänti, ukat Israel markarux mutuyäna.

8Ukatsti Davidax Diosarux akham sänwa:

—Nayax ukham lurasax wali jach'a juch lurta. Ukampis jichhax aka luqtiriman juchanakap pampacht'amaya, nayasti mä jan wali amuyt'an jaqjamaw lurta —sasa.

9Ukhamasti Tatitux Davidan Gad amuyt'ayiriparux sänwa:

10“Davidan ukar saram, ukatsti naya tuqit kimsa amtäwi jupampi lurañ munataxat yatiyanim, ukat kuntix jupax munki nayan lurañax uk ajllispan” sasa.

11Gad chachax Davidan ukaruw saräna, ukatsti sänwa:

—Tatitux akham siwa: “Aka kimsa mutuyäwit may ajllisim:

12kimsa mara mach'äñapa, kimsa phaxsi uñisirinakaman espadampi arknaqatäñata, jan ukax Tatitun espadap tuqi kimsa uru aka uraqin jach'a usumpi tukjatäñapa, Tatitun angelapampi Israel uraqpachan jan walt'añanak utjayasa. Jichhax jumax ajllisim, khititix khithankitu ukar yatiyxañataki” —sasa.

13Davidasti Gad chacharux sänwa:

—Jichhax jan walt'añan jikxatasta. Ukhamasti wakisispaw Tatitun amparapar katuyasxañaxaxa, jupan khuyapayasiñapasti wali jach'awa, janiw jaqinakan amparaparux puriñ munkti —sasa.

14Ukhamasti Tatitux Israel markarux mä jach'a usu apayanïna, ukatsti paqallq tunka waranq israelita jaqinakaw jiwaräna.

15Tatitusti mä angelap Jerusalenar tukjañatak khithanïna. Ukampis kunapachatix angelax tukjaskän ukkhaxa, Tatitux uk uñjasax uka luratapat amtasïna, ukatsti tukjkän uka angelaruw säna: “¡Ukkhakamaki, jan juk'amp lurkxamti!” sasa.

Ukapachasti, Tatitun angelapax jebuseo Ornán chachax trigo jawq'askän uka chiqan jikxatasïna.

16Davidasti uñtasax Tatitun angelaparuw uñji, alaxpachampi aka uraqimpi taypin sayt'atäskänwa, amparapankkän uka espadampisti Jerusalén marka tuqiruw aytäna. Ukhamasti Davidampi jilïr awkinakampix chhankha isimpi isthapitax ajanunakapsa uraqir puriyañkamaw alt'apxäna,

17ukatsti Davidax Diosaruw säna:

—¡Nayaw aka markarux jakthapiyta! ¡Nayaw jan wali lurasax juchachasta! Ukampis ¿kuna juchanirak aka jaqinakasti? Tatay, Diosaxay mutuyäwimax nayxaru, wila masix taypir jutpan, ukampis markamarux janikiy mutuyxamti —sasa.

Davidan mä altar luratapa(2 S 24.18-25)

18Ukhamasti Tatitun angelapax Gad chacharuw säna: Davidax Tatitutak mä altar sayt'aypan, kawkhantix jebuseo Ornán chachax trigo jawq'kän uka chiqaru, sasa.

19Ukhamasti Davidax kuntix Gad chachax siskän uk Tatitun sutipxar luriri saräna.

20Ornán chachasti trigo jawq'askäna, qhipäxar uñtasinsti angelaruw uñji, ukampis jupampïkän uka pusi wawanakapax imantasiriw jaltxapxatayna.

21Kunapachatix Davidax Ornán chachar jak'achasïna ukkhaxa, jupax Davidar uñjasin trigo jawq'añawjat mistunïna, ukatsti Davidan nayraqatapan alt'asïna;

22Davidasti Ornán chacharux sänwa:

—Trigo jawq'aña uraqim aljita, ukawjar Tatitutak mä altar lurañataki. Alapax qawqhäkitix ukhamar aljita, ukhamat aka mutuyäwix markat saraqxañapataki —sasa.

23Ornán chachax sänwa:

—Jach'a munañan rey, katusxam, kunjämtix munkta ukham luraskakim. Nayaw urqu vacanak nakt'äwitak churäma, jawq'añ lawanakxa phäñataki, trigo achusti waxt'äwitaki, ¡Jach'a munañan rey, taqi ukanak churäma! —sasa.

24Ukampis David reyix sänwa:

—Yuspagarsmawa, ukampis qawqhäkitix alapax ukkhampi alañaxawa, Tatitur nakt'äwi luqtañatakix janiw inak apaqkämati —sasa.

25Ukhamaw Davidax Ornán chachar uka uraqin alap qurit lurat suxta patak qullqinak churäna,

26ukatsti ukawjan Tatitutakix mä altar luräna, ukatsti nakt'äwinaka, sumankañ wilañchanak luqtäna. Ukat ukspachaw Tatitur art'äna, Tatitusti alaxpachatpach altärxarux nina apayanïna.

27Ukhamasti Tatitux angelar espadap imasxañapatakiw mayïna.

Diosan utapatak uraqin utjatapa

28Uka urunakansti, Davidax kawkhantix Ornán chachax trigo jawq'askän uka chiqan Tatitun ist'atap yatisax wilañchanak luqtäna.

29Moisesax Gabaón wasaran Tatitun chhujllapa, nakt'ayañ altar lurkchïna ukasa,

30Davidax janiw uka chiqar Diosar jiskt'asirix sarirjamäkänti, Tatitun angelapar espadan uñjasax wal axsaräna.