JOB 29 - Qullan Arunaka DC

IV. JOB CHACHAN QHIP QHIPA ARSUSITAPA(29—31)Ukxarusti Job chachax wasitat arsusi:Job

1-2¡Nayra pachanakanjam sarnaqañar kuttirista,

Diosax nayar imkitän uka urunakanjam wasitat jakirista!

3¡Janiw ch'amakax axsaraykïtänti

Diosaw qhanapamp sarnaqäwixar qhant'ayaniskïtäna;

4nayax waynaskäyätwa, ch'amanïskarakïyätwa,

Diosasti utaxarux munasiñapampiw uñjäna;

5khä urunakan wawanakaxax naya chikäsipkänwa,

taqi ch'aman Diosasti naya jak'axankaskänwa;

6manq'asiñax chiqansti lechex janiw pist'irïkänti,

p'iqixansa q'apkir qullax utjapunirïnwa;

7markan tantachasïwinakapan

jilïrin qunt'asiñaparuw qunt'asirïta.

8Nayar purir uñjasax,

waynanakax maysaruw jittapxirïna,

chuyman jaqinakasti sayt'asisaw nayar katuqapxirïna.

9Wali aytat jilïr jaqinakas naya ukankipan amukt'apxirïnwa,

10Mark apnaqirinakasti, jisk'atak parlasipxirïna

laxranakapas lakanakaparuw lip'kattarakïna.

11Nayar parlir ist'irinakasti,

suma arunakampiw nayar jallallt'apxirïna.

12Nayasti ukapachax wajcharusa,

pisin jakasir jaqirusa yanapt'apunirïyätwa;

13ijma warminakampi, jan kunan jaqinakampix yuspagarapxitänwa,

yanapataxasti chuymanakap kusisiyirïna.

14Chiqapar uñjañ kankañampipuniw mayninakar uñjirïta;

ukham lurañasti nayatakix, isthapiskiristsa ukhamänwa.

15Juykhunakan irpiripäyätwa,

kayu muruqatanakan yanapt'iripäyätwa;

16pist'ata sarnaqirinakan awkipäyätwa,

yaqha markat jutir jaqinakan arxatiripäyätwa!

17Qhuru jaqinakan munañan kankañap tukjtwa,

jan wali lurañanakapsa apanukuytwa.

18Nayax säyätwa:

“Walja maranakaw jakä,

wali chuymaniw pachpa utaxan jiwxarakï.

19Jaliri uma thiyankir quqar uñtatätwa,

sullax layminakap arum tuqir sullantki ukhama.

20Nayan aytat kankañaxax nayamp chikaw machaqkipstaskani,

janiw ch'amaxas tukuskarakiniti” sasa.

21Taqiniw nayar ist'apxitäna,

amukiw iwxa arunakaxsa suyt'apxirïna.

22Janiw khitis arsutaxar kutipaykänti.

Arunakaxax chuymanakapar purkirïnwa,

23jupanakasti nayan arunakax wali suyt'apxirïna,

lupi urunakan jallux suyt'atäki ukhama.

24Lart'asis jupanakar uñkatkäyät ukkhasti,

janis chiqäkasp ukham amuyapxäna,

kusisita ajanuxax jupanakar ch'amañchänwa.

25Nayaw jupanakar sarañ thakhip uñacht'ayirïyäta,

jupanakan lurañanakapäki ukanaksa sarakïyäta,

ejercitop taypinkir reyir uñtataw jupanak taypin jakasïyäta.

Llakisit jikxatasipxipansti, nayaw chuymachirïyäta.