SALMOS 57 - Qullan Arunaka DC

SALMO 57Diosat yanap mayisiña(Salmo 108.1-5) 1 Davidan q'uchupa, Davidax Saúl reyin nayraqatapat jaltxasin mä p'iyar imantaskän ukapacha.

1 1 (2) Diosaxay,

nayat khuyapt'ayasita,

jumampi arxatayasiñatakiw thaqsma,

nayat khuyapt'ayasipunita.

Jan walt'añ nayat jithiqañapkamasti,

amparamampi imantayasiñ munta.

2 2 (3) Alaxpachankir Diosaruw art'asï,

taqi kunan yanapir Diosat mayisï.

3 3 (4) Jupaw alaxpachat munasiñapa,

chiqa kankañap apayanitani,

jupaw nayar jiwayañ munirinakat qhispiyitani.

4 4 (5) Jaqnuqataw uraqin uñjasta,

jaqi manq'an leonanak taypinjam jikxatasta;

laka ch'akhanakapax lanzanakjama, mich'inakjamawa,

laxrapax ari espadar uñtatarakiwa.

5 5 (6) Diosaxay, jumax alaxpachat sipan jilanktawa,

¡Qhapaq kankañamax taqpach uraqiruw phuqhanti!

6 6 (7) Nayampi timasirinakax sipit uchantapxi,

uka sipitar jalt'añaxataki;

mä jach'a p'iya jalantañaxatak lurapxi,

ukampis jupanakakiw ukarux jalantxapxi.

7 7 (8) Diosaxay, chuymaxax wakichatawa,

q'uchunak jumatak q'uchuñatak wakichatawa.

8 8 (9) Ajayuxay, p'arxtasimaya;

arpa, salterio p'arxtasipxam;

¡nayasti machaq qhantatin yupaychä!

9 9 (10) Tatay, markanak nayraqatan jach'añchäma,

markanak nayraqatan q'uchunakamp yupaychäma.

10 10 (11) Munasiñamax alaxpachat juk'ampi jach'awa;

aski kankañamax alaxpachkamaw puri.

11 11 (12) Diosaxay, jumax alaxpachat sipan jilanktawa,

¡Qhapaq kankañamax taqpach uraqiruw phuqhanti!