ZACARÍAS 7 - Qullan Arunaka DC

d) Ayuno lurañata, Criston qhispiyasiñ utjatapat yatiyäwi(7—8)Jan chiqa ayuno lurañata

1Darío reyin pusi mara Persia marka apnaqäwipana, Quislev sat llätunka phaxsita, pusi uru saraqataruw Tatitux Zacarías profetar yatiyäwinak churäna.

2Uka urunakansti, Betel markax Sarezer, Réguem-mélec chachanakaru, jaqinakapampir kuna khithäna Tatitut yanap mayiri,

3taqi ch'amani Tatitun utapankir profetanakampiru, sacerdotenakampir akham jiskt'añapatakiraki: “¿Nanakax sapa mara phisqa phaxsi saraqataru, jachañampi ayuno lurañampi phuqhasipkakïti, kunjämatix jichhakam lurasipkta ukhamxa?” sasa.

4Ukatsti taqi ch'amani Tatitux nayarux situwa:

5“Taqi markpacharu, sacerdotenakampir akham sarakim: ‘Jumanakax phisqïri, paqallqüri phaxsi saraqataruw ayuno lurañsa, jachañsa phuqhapxtaxa, ukat jichhakamax paqallqu tunka maräxiwa. Ukampis janiw nayar jach'añchañatak lurapktati,

6jan ukasti jumanakan askinakamatakikiw manq'apxtaxa umapxaraktasa’ ” sasa.

7Kuntix jichhax sapksma ukxa, khä urunakaw profetanak tuqi sapxayäsma, kunapachatix Jerusalén markaxa, ukhamaraki uka thiya markanakasa, jaqin phuqt'atäskäna ukapacha, kunapachatix Néguev sat chiqana, ukhamaraki pampanakan suman jakasiñax utjkarakïna ukapacha.

Jan ist'asiñax apanukutäñaruw puriyi

8Tatitux Zacarías profetaruw parläna, juparusti sarakïnwa:

9“Aksti nayaw arsta: Jumanakasti taripañanakamanxa chiqäpxapunim, maynit maynikam munasirïpxam, khuyapayasirïpxarakim.

10Ijma warminakarusa, wajchanakarusa, yaqha markat jutirinakarusa, jan kunaninakarusa, jan t'aqhisiyapxamti. Janirak maynit maynikam ñanqhachasiñsa lup'ipxamti” sasa.

11Ukampis markax janiw kun ist'añsa munkiti. Taqiniw kutiqtawayxapxi, uqaraw tukupxaraki.

12Chuymanakapsa ch'ullqhi diamante qalar uñtat qalarayasipxi, taqi ch'aman Tatitun ajayupampi nayra profetanakap tuqi parlawayki, uka yatichäwinakaru, kamachi arunakaru jan ist'añataki.

Ukat Tatitux wali q'apisïna,

13sarakïnwa: “Kunjämtix jupanakax nayan jawsatax jan ist'añ munapkitänxa, ukhamarakiw nayax jan ist'käti kunapachatix jupanakax art'asipkitani ukkhaxa.

14Ukatpï nayax mä jach'a tutuka thayampjam jupanakar uksar aksar apanuktxa, jan uñt'apkäna uka markanak taypiru, uka qhipatsti uraqipax mä ch'usa wasarar tukutaw qhiparxäna, ukansti janiw khitis jakirjamäkxänti. ¡Jupanakan juchanakap laykuw ukkha suma markax q'ala tukjata, laqayaki qhiparäna!”