ÉXODO 17 - Qullan Arunaka DC

Qarqat uman mistunitapa(Nm 20.1-13)

1Israelitanakax taqiniw Sin sat wasarat sartawayxapxäna, jupanakasti Tatitun arunakaparjamaw juk'at juk'at sarapxäna. Refidim sat chiqar purisasti ukkharuw utjnuqtapxäna, ukampis janiw umt'añatak uma jikxatapkänti,

2ukat Moisesar mayipxäna:

—¡Umt'añatak uma churapxita! —sasa.

Moisesasti sänwa:

—¿Kunatarak nayaruk mayipxistasti? ¿Kunatarak Diosar ukham yant'apxtasti? —sasa.

3Ukampis israelitanakax umat pharjataw Moisesatak jan walinak parlapxäna akham sasa:

—¿Kunatakis Egiptot irpsunipxista? ¿Wawanakaxampiru, animalanakaxampir umatjam jiwarayañatakit irpsunipxistasti? —sasa.

4Moisesasti Tatituruw yanap mayïna, juparusti sänwa:

—¿Kamacharakï aka jaqinakampisti? Niyapuniw qalamp k'upjas jiwayapxitu —sasa.

5Tatitusti Moisesar sänwa:

—Markan nayraqatapar sayt'asim, ukatsti Israelan jilïrinakap jumamp chik irpam. Nilo jawirar jawq'antktas uka thujrum ayxarusirakim, ukat sarantam.

6Nayasti khaya Horeb sat qullun mä qarqa patan suyäma. Uka qarqar jach'a thujrumamp jisktkät ukkhasti, umaw ukat mistunini, jaqinakan umt'apxañapataki —sasa.

Moisesasti Israelan jilïrinakap nayraqatan ukham luräna.

7Uka chiqarusti Meribá sasaw sutichäna, israelitanakan jupatak arusipxatap layku, ukatsti Masá sutimpiw ucharakïna, Diosar yant'apxatap layku: “¿Tatitux jiwasanak taypinkiti, janicha?” sasa.

Israelitanakan amalecitanakamp nuwasitapa

8Amalecita jaqinakax Refidim sat chiqaruw israelitanakamp nuwasir jutantapxäna.

9Ukat Moisesax Josué chachar säna:

—Mä qawqha chachanak ajlliwayasin amalecitanakamp nuwasir saram. Nayasti arumanthix qullu patan Diosan thujrup amparaxar ayt'ataw ukankä —sasa.

10Josué chachasti, Moisesan arsutaparjamaw amalecitanakamp nuwasir saräna. Ukchañkamasti Moisesampi, Aaronampi, Hur sat chachampix qullu pataruw makhatapxäna.

11Moisesax amparap alayar luqtkän ukkhax, israelitanakaw nuwasiñan atipapxäna; ukampis amparap ayaqasxän ukkhasti, amalecitanakaw atipapxarakïna.

12Moisesax amparanakap alayar luqtkäwix qarjtxänwa, ukat Aaronampi, Hur chachampix mä qala patxar Moisesar qunt'ayasin Moisesan amparanakap purapäxat katxäsipxäna, maynix maysata, maynisti maysataraki. Ukhamat Moisesan amparanakapax intin jalantañapkam jan qarjaskänti,

13Josué chachasti espadampkamaw amalecitanakarux atipjäna.

14Uka qhipatsti, Tatitux Moisesar akham sarakïna:

—Kunatix aka nuwasïwin luraski ukxa qillqam, jan khitin armasiñapataki; Josué chacharusti sarakim, nayaw amalecitanakarux jan mayampitak chhaqtayä —sasa.

15Moisesasti mä altar ukawja chiqar luräna, ukarusti “Tatituw nayan wiphalaxaxa” sasaw sutichäna,

16sarakïnwa:

“¡Tatitusan wiphalapax amparaxankiwa!

¡Tatitux amalecitanakampi,

wawanakapan wawanakapampiw nuwasini” sasa.