1 REYES 5 - Qullan Arunaka DC

Salomón reyix Tironkir Hiram reyimpiw mä arust'äwi luri(2 Cr 2.1-18)

1 1 (15) Tironkir Hiram sat reyix, Salomonar David awkip lanti reyit utt'ayapxatap yatisinxa, yatiyirinakap Salomonan ukar khithäna, Hiram reyix munasiñ chuymampipuniw Davidar uñjirïtayna.

2 2 (16) Ukat Salomón reyix Hiram reyir aka yatiyäwi apayäna:

3 3 (17) “Jumax niy yattawa, David awkixax janiw Tatit Diosapatak mä uta sayt'ayawaykiti, ch'axwanakampi muyuntat uñjasitap layku, uñisirinakapar Tatitun atipjañapkama.

4 4 (18) Ukampis jichhax, Tatitu Diosaxax sumankañ taqi chiqan utjayarapipxitu, janiw uñisirinakaxax utjkxiti, jan walt'añanakas janirakiw axsaraykxituti.

5 5 (19) Ukat nayax Tatit Diosaxar yupaychañatak mä uta utacharapiñ amtasta, David awkixar arsutaparjama: ‘Khitirutix juma lanti reyit qunt'aykä uka wawamaw nayar yupachañatak mä uta utacharapitani’ sasa.

6 6 (20) Ukhamasti, jichhax Líbano qullunakan utjir cedro lawanakay khuchhuyarapita. Yanapirinakaxaw jumankirinakar yanapani, nayasti qawqhtix luqtirinakaman luratapat maykitäta uk churaskämawa, jumax yattawa, nanakat janiw khitis sidonio jaqinakjam lawa khuchhuñ sum yatkiti” sasa.

7 7 (21) Hiram reyisti Salomón reyin mayitap ist'asinxa, wal kusisïna, jach'at sarakïna: “¡Tatitux jichhürux jach'añchatäpan, jupaw Davidar wali yatiñ kankañan mä wawa churi, uka jach'a marka apnaqañapataki!” sasa.

8 8 (22) Ukatsti Hiram reyix Salomonar yatiyxarakïnwa akham sasa: “Iwxankista uka arunak katuqtwa, mayitamarusti phuqhämawa, nayaw cedro lawanaka, pino lawanak churäma.

9 9 (23) Yanapirinakaxaw Líbano qullut qutakam apaqanini, uka chiqatsti yampunakar uñtat ñach'antat apayanïma, kawkhakamatix apañaxa munkäta ukkhakama. Ukawjan uka yampunak jaratatasin lawanak aptasxäta. Jumasti uka lantix, manq'añanak utaxankirinakatak churitäta” sasa.

10 10 (24) Ukhamasti, Hiram reyix qawqhtix cedro lawanaka, pino lawanak munkän uk Salomonar churäna,

11 11 (25) Salomonasti Hiram reyirux wila masinakapatak manq'añanak apayarakïna: Sapa maraw pusi waranqan waranqapa, pusi patak waranqa kilo trigo, pusi waranqa pusi patakan litro oliva q'uma aceite churäna.

12 12 (26) Tatitux arsutaparjamaw Salomonar yatiñ kankañ churäna. Ukhamarus Hiram reyimpi Salomonampix mä suma amtäwiruw mantapxäna, ukat jupanak purax sumankas jakasipxäna.

13 13 (27) Salomón reyisti kimsa tunka waranqa israelit chachanakaruw Tatitun utap lurapxañapatak wayt'äna,

14 14 (28) jupanakasti kimsa tamar jaljasin Líbano markar khithatapxänwa, sapa tamasti tunka waranqa jaqinakanïnwa, sapa phaxsiw wakt'ataparjam jupanakax irnaqapxäna. Mä phaxsix Líbano chiqankapxänwa, pä phaxsisti utanakapan qamapxäna. Uka irnaqañanak wayt'iristi Adoniram sat chachänwa.

15 15 (29) Ukhamarusa Salomón reyin paqallq tunka waranqa q'ipirinakapaw utjarakïna, qullun qala ch'iyiri jaqinakasti kimsaqallq tunka waranqanïnwa,

16 16 (30) ukatsti utachir jaqinakar irnaqayirinakax kimsa waranqa kimsa patakanirakïnwa.

17 17 (31) Reyisti jach'a qalanaka, jila alani qalanak apsuyäna, Tatitun utapan nayrïr qala jaquntañataki, ukatsti k'uthat qalanak apsuyarakïna.

18 18 (32) Salomón reyina, Hiram reyin utachirinakapa, ukhamaraki Guebal jak'ankir jaqinakampiw Tatitun utap lurañatakix lawanak wakicht'apxäna, qalanaksa k'uthapxäna.